លោកថាក់ស៊ីនបានឆ្លងផុតរឿងក្តីប្រមាថព្រះមហាក្សត្រ ប៉ុន្តែតើត្រកូលថាក់ស៊ីនអាចឆ្លងផុតព្យុះភ្លៀងច្បាប់ ដើម្បីបន្តជីវិតនយោបាយដែរឬទេ? គ្រួសារមហាសេដ្ឋីរបស់ប្រទេសថៃ ស៊ីណាវ៉ាត្រា ត្រូវបានគេអះអាងថា បានកំពុងត្រៀមខ្លួនសម្រាប់ទទួលនូវការសម្រេចចិត្តរបស់តុលាការធម្មនុញ្ញ ដែលជាសាលក្រមដែលមានអំណាច និងឥទ្ធិពលអាចបញ្ចប់អាជីពនយោបាយត្រកូលនេះបាន ។…
លោកថាក់ស៊ីនបានឆ្លងផុតរឿងក្តីប្រមាថព្រះមហាក្សត្រ ប៉ុន្តែតើត្រកូលថាក់ស៊ីនអាចឆ្លងផុតព្យុះភ្លៀងច្បាប់ ដើម្បីបន្តជីវិតនយោបាយដែរឬទេ?
គ្រួសារមហាសេដ្ឋីរបស់ប្រទេសថៃ ស៊ីណាវ៉ាត្រា ត្រូវបានគេអះអាងថា បានកំពុងត្រៀមខ្លួនសម្រាប់ទទួលនូវការសម្រេចចិត្តរបស់តុលាការធម្មនុញ្ញ ដែលជាសាលក្រមដែលមានអំណាច
និងឥទ្ធិពលអាចបញ្ចប់អាជីពនយោបាយត្រកូលនេះបាន ។
បច្ចុប្បន្ននេះ ទាំងជោគវាសនា និងអនាគតរបស់លោកថាក់ស៊ីន ស៊ីណាវ៉ាត្រា ដែលជាឪពុក និងលោកស្រី ផៃថងថាន ស៊ីណាវ៉ាត្រា ដែលជាកូនស្រី គឺសុទ្ធតែស្ថិតនៅក្នុងកណ្តាប់ដៃអ្នកច្បាប់ ដែលពីមុនស្ថាប័ននេះធ្លាប់បានពិឃាតអាជីពនយោបាយរបស់បុគ្គលនៅក្រោមស្រមោលរបស់លោកជាច្រើនរូបរួចមកហើយ ចាប់តាំងពីលោកត្រូវខ្ទាតពីអំណាចនាឆ្នាំ២០០៦មកនោះ ។
សន្តតិវង្សនយោបាយ ស៊ីណាវ៉ាត្រា ដើរតួនាទីនយោបាយយ៉ាងសំខាន់នៅប្រទេសថៃ ហើយក៏ជាចំណុចស្នូលនៃភាពចលាចលមិនឈប់ឈនៅក្នុងប្រទេសថៃររយៈពេល២ទសវត្សរ៍ អាចនឹងស្រអាប់ ហើយក៏អាចជាការប្រយុទ្ធចុងក្រោយបំផុតរបស់ត្រកូលនេះ ដោយសារតែសេចក្តីសម្រេចដែលអាចដកតំណែងនាយករដ្ឋមន្ត្រីផៃថងថាន ។
មកដល់ពេលនេះ បញ្ហាបណ្តឹងតុលាការពាក់ព័ន្ធនឹងរឿងក្តីត្រកូលថាក់ស៊ីន ដែលមានបីរឿងនេះ គឺសុទ្ធតែជាបញ្ហាដែលអាចឲ្យអាជីពនយោបាយរបស់អ្នកទាំងពីរប្រឈម នឹងការបញ្ចប់ ។
បទចោទប្រកាន់១ នៅក្នុងចំណោមបទចោទប្រកាន់បី ដែលអាចនឹងអោយលោកស្រី ផៃថងថាន អាយុ៣៩ឆ្នាំ ត្រូវអស់តំណែង នាយករដ្ឋមន្ត្រី ហើយលោកថាក់ស៊ីន ដែលមានអាយុ៧៦ឆ្នាំ ដែលជាបុគ្គលដ៏មានឥទ្ធិពលពីក្រោយរដ្ឋាភិបាលចម្រុះថៃវិលត្រឡប់ទៅរកពន្ធនាគារត្រូវជម្រះមួយករណីហើយនៅព្រឹកថ្ងៃសុក្រនេះ ។
សាលក្រមតុលាការលើលោកថាក់ស៊ីន ពាក់ព័ន្ធនឹងពិរុទ្ធភាពរបស់លោកអំឡុងកិច្ចសម្ភាសន៍ជាមួយប្រព័ន្ធផ្សព្វផ្សាយកាលពីឆ្នាំ២០១៥ ថា បានប្រមាថដល់រាជាធិបតេយ្យដ៏មានឥទ្ធិពល ដែលជាឧក្រិដ្ឋកម្មធ្ងន់ធ្ងរនៅក្នុងប្រទេសថៃ ពោលគឺអាចជាប់ពន្ធនាគារ
រយៈពេលដល់ទៅ១៥ឆ្នាំ ត្រូវបានតុលាការថា ជម្រះបញ្ជីហើយ។
សាលក្រមព្រឹកនេះបញ្ជាក់ថា លោកមិនបានប្រមាថមហាក្សត្រ និងរាជានិយមថៃទេ ប៉ុន្តែ ក្រៅពីនោះ លោកនៅប្រឈមបទចោទមួយទៀត ពាក់ព័ន្ធនឹងពិរុទ្ធភាព បោកប្រាស់ពលរដ្ឋ កាលពីឆ្នាំ២០២៣ ពាក់ព័ន្ធនឹងការគេចពីការជាប់ពន្ធនាគារមកនៅបន្ទប់មន្ទីរពេទ្យប៉ូលិសលំដាប់ពិសេស ។
អ្នកវិភាគបានលើកឡើងថា រឿងក្តីក្តាំពីរករណីនៅសល់លើត្រកូលនេះ គឺសុទ្ធតែជះឥទ្ធិពលដល់អាជីពនយោបាយ ។
មកដល់ពេលនេះ រដ្ឋាភិបាលចម្រុះដឹកនាំដោយភឿថៃកំពុងតែរង្គោះរង្គើរ ហើយបើលទ្ធផលតុលាការអវិជ្ជមាននោះរដ្ឋាភិបាលនេះនឹងដួលរលំ ឬនៅត្រឹមជារដ្ឋាភិបាលចាំផ្ទះ ។
សាស្ត្រាចារ្យច្បាប់នៃសាកលវិទ្យាល័យ ធម្មាសាត ( Thammasat) លោក ព្រីងយ៉ា ធីវ៉ាណារូមីគុល ( Prinya Thaewanarumitkul) បាននិយាយប្រាប់សារព័ត៌មានបរទេសថា លោកជឿថា ការបោះឆ្នោតថ្មីនឹងប្រព្រឹត្តទៅនៅពាក់កណ្តាលឆ្នាំ២០២៦ ឬប្រហែលជាឆាប់ៗនេះ ហើយលោកជឿថា នៅក្នុងការបោះឆ្នោតខាងមុខ ឱកាសដែលគណបក្សភឿថៃអាចទទួលបានសំឡេងប្រជាប្រិយភាពគឺលែងទំនងហើយ ។
តាមការចុះផ្សាយដោយរ៉យទ័រ អ្នកនាំពាក្យរដ្ឋាភិបាលដឹកនាំដោយគណបក្សភឿថៃបានបដិសេធមិនធ្វើអត្ថាធិប្បាយលើសេចក្តីសម្រេចរបស់តុលាការនាពេលខាងមុខទេ។ សរុបទៅ សូមបន្តតាមដានដំណើរវិវត្តន៍ទៅមុខទៀត ពីព្រោះសាលក្រមនៃការសម្រេចចិត្តគឺ នឹងចេញជាបន្តបន្ទាប់ចាប់ពីថ្ងៃសុក្រនេះតទៅ រហូតដល់រង្វង់ខែកញ្ញា ប៉ុន្តែកុំភ្លេចថា តុលាការធម្មនុញ្ញថៃ គឺបានពិឃាតអាជីពនយោបាយរបស់នាយករដ្ឋមន្ត្រីក្រោមស្រមោល លោកថាក់ស៊ីន គឺចំនួន៤រូបរួចមក
ហើយ ។
ចែករំលែកព័តមាននេះ