ខេត្តព្រៃវែង ៖ ត្រឹមរយៈពេល2ថ្ងៃចុងសប្តាហ៍នេះ មន្ត្រីជលផលខេត្តព្រៃវែង បានចុះបង្ក្រាបបទល្មើសនេសាទប្រភេទរបាំងស្បៃមុង ដែលជនល្មើសបានលួចដាក់នៅតាមវាលបឹងធម្មជាតិ ក្នុងស្រុកពាមជរ បានចំនួន២ករណី ស្មើនឹង២ឃុំ ដោយបានរឹបអូស…
ខេត្តព្រៃវែង ៖ ត្រឹមរយៈពេល2ថ្ងៃចុងសប្តាហ៍នេះ មន្ត្រីជលផលខេត្តព្រៃវែង បានចុះបង្ក្រាបបទល្មើសនេសាទប្រភេទរបាំងស្បៃមុង ដែលជនល្មើសបានលួចដាក់នៅតាមវាលបឹងធម្មជាតិ ក្នុងស្រុកពាមជរ បានចំនួន២ករណី ស្មើនឹង២ឃុំ ដោយបានរឹបអូស និងដុតកម្ទេចចោល នៅឧបករណ៍របាំងស្បៃមុងប្រមាណជាង 3 ពាន់ម៉ែត្រ។
លោក សឿ វិចិត្រ នាយផ្នែករដ្ឋបាលជលផលស្ទឹងស្លូតបានឱ្យដឹងថា នៅថ្ងៃទី 20 សីហា លោកបានដឹកនាំកម្លាំងជំនាញ សហការជាមួយនឹងរដ្ឋបាលស្រុកពាមជរ ចុះធ្វើការបង្ក្រាបបទល្មើសនេសាទនៅចំណុចបឹងកំប្លោក ក្នុងភូមិខ្សាច់ ឃុំកោះសំពៅ ដោយបានរុះរើនិងដុតបំផ្លាញចោល លូស្បៃមុងចំនួន 16 មាត់ របាំងស្បៃមុង 1400 ម៉ែត្រ បង្គោលចម្រឹងឬស្សី 560ដើម និងចាក់ព្រលែងកូនត្រីចំរុះ ចូលទៅក្នុងបឹងធម្មជាតិវិញបានចំនួនជាង 50 គីឡូ។
ដោយឡែកនៅព្រឹកថ្ងៃទី 22 សីហា លោកបានបន្តដឹកនាំកម្លាំង ចុះបង្ក្រាបបទល្មើសនេសាទប្រភេទរបាំងស្បៃមុងនេះមួយករណីទៀត ដែលស្ថិតនៅចំណុចភូមិវាលរបងលើ ឃុំអង្គរអង្គ ស្រុកពាមជរ ដោយបានដុតបំផ្លាញចោលវត្ថុតាងលូស្បៃមុងចំនួន 18 មាត់ របាំងស្បៃមុង 1500 ម៉ែត្រ បង្គោលចម្រឹងឬស្សី 650 ដើម និងចាក់លែងកូនត្រីចម្រុះ ចូលដែនធម្មជាតិវិញបានជាង 20 គីឡូ។
លោក សឿ វិចិត្រ បានបញ្ជាក់ថា មិនមែនត្រឹមតែឧបករណ៍នេសាទប្រភេទរបាំងស្បៃមុងនេះទេដែលត្រូវបានហាមឃាត់ គឺគ្រប់ការនេសាទ និងគ្រប់ឧបករណ៍ទាំងអស់ សុទ្ធតែត្រូវបានហាមឃាត់នៅក្នុងរដូវបិទនេសាទ រយៈពេល 3 ខែនេះ ព្រោះអំឡុងពេលនេះត្រីកំពុងពងកូន ហើយរហូតដល់ថ្ងៃទី 1 ខែវិច្ឆិកា ទើបការបិទនេសាទនេះត្រូវបានបញ្ចប់ ៕
ចែករំលែកព័តមាននេះ