រាជធានីភ្នំពេញ៖ ពាក្យចាស់លោកពោលថា«ឆ្នាំងណាគម្របហ្នឹង» ពិតជាមិនខុសឡើយ ជនសង្ស័យ២នាក់ប្ដីប្រពន្ធមានចិត្តគំនិតជាចោរដូចគ្នា ហើយបានជិះម៉ូតូកង់បី១គ្រឿងដឹកគ្នាចេញដើរលួចទ្រព្យសម្បត្តិអ្នកដទៃ ។ ពេលទៅដល់កន្លែងលក់មួកសុវត្តិភាពនៅតាមចិញ្ចើមផ្លូវមួយកន្លែង ឆ្លៀតពេលម្ចាស់មិននៅជិត រវល់តែប៉ះកង់រ៉ឺម៉កម៉ូតូនៅចិញ្ចើមផ្លូវម្ខាងទៀត គ្មានអ្នកនៅចាំកន្លែង ចោរញីឈ្មោលខាងលើ ក៏បានធ្វើសកម្មភាពលួចយកមួកសុវត្ថិភាពជាង១០មួកដាក់លើម៉ូតូកង់បីរួចជិះគេចខ្លួន ។ ប៉ុន្តែត្រូវអស់លក្ខណ៍ ដោយម្ចាស់ឃើញទាន់ ក៏បានរត់ទៅស្ទាក់ចាប់បានទាំង២នាក់ រួចប្រគល់ទៅឲ្យនគរបាលប៉ុស្តិ៍ចោមចៅទី៣ ធ្វើការសាកសួរនិងចាត់ការតាមផ្លូវច្បាប់តែម្ដង ។
ហេតុការណ៍នោះបានកើតឡើងកាលពីវេលាម៉ោង៨និង២០នាទីព្រឹកថ្ងៃទី២៩ ខែមិថុនា ឆ្នាំ២០២៥ នៅត្រង់ចំណុចក្បែរស្ថានីយ៍ប្រេងឥន្ធនៈសូ គីម៉ិច ផ្លូវជាតិលេខ៤ ស្ថិតនៅក្នុងភូមិអង្គកែវ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
ជនសង្ស័យខាងលើនោះប្ដីឈ្មោះវ៉ិត ពៅ អាយុ៣៦ឆ្នាំ មុខរបរជាងប៉ះកង់ និងប្រពន្ធឈ្មោះមាស កន្និកា អាយុ៤០ឆ្នាំ មុរបររើសអេតចាយ អ្នកទាំង២ស្នាក់នៅផ្ទះជួលសង្កាត់ទួលសង្កែ ខណ្ឌឫស្សីកែវ រាជធានីភ្នំពេញ ជិះម៉ូតូកង់បី១គ្រឿងពណ៍ស ពាក់ស្លាកលេខភ្នំពេញ1II-4621 ។
ចំណែកជនរងគ្រោះឈ្មោះកឹម រតនា ភេទប្រុស អាយុជាង៤០ឆ្នាំ ស្នាក់នៅម្ដុំវត្តស្លែង សង្កាត់ពងទឹក ខណ្ឌដង្កោ រាជធានីភ្នំពេញ រីឯមួកសុវត្ថិភាពដែលត្រូវជនសង្ស័យលួច ហើយដកហូតបានមកវិញនោះមានចំនួន១៤មួក ។
គាត់បានបាននិយាយថា នៅមុនពេលកើតហេតុគាត់បានបើកម៉ូតូ១គ្រឿងម៉ាកហុងដាវ៉េវ ពណ៍ត្រួយចេក សណ្ដោងកន្ទុយរឺ៉ម៉កក្រហម ពាក់ស្លាលេខភ្នំពេញ1FO-2410 ដឹកមួកសុវត្ថិភាពធ្វើដំណើរចេញពីផ្ទះនៅម្ដុំវត្តស្លែង ទៅដាក់លក់នៅលើចិញ្ចើមផ្លូវជាតិលេខ៤ ត្រង់កើតហេតុខាងលើ ។ លុះពេលទៅដល់គាត់បានលើកមួកសុវត្ថិភាពចេញពីរ៉ឺម៉ករៀបចំដាក់លក់ ចៃដន្យពេលនោះរ៉ឺម៉កគាត់ក៏បែកកង់ទៀត ហើយបន្ទាប់ពីរៀបចំដាក់មួកសុវត្ថិភាពដាក់កន្លែងលក់រួចរាល់ គាត់ក៏បានយករ៉ឺម៉កទៅប៉ះនៅចិញ្ចើមផ្លូវម្ខាងទៀត ដែលស្ថិតនៅឆ្ងាយបន្តិចទល់មុខកន្លែងលក់នោះដែរ ។
លោកកឹម រតនា បានប្រាប់ឲ្យដឹងបន្តទៀតថា ដោយសារតែគាត់ម្នាក់ឯងទើបគ្មានអ្នកនៅចាំកន្លែងលក់នោះទេ ប៉ុន្តែគាត់មើលជាងប៉ះកង់រ៉ឺម៉កបណ្ដើរ និងក្រឡែកមើលកន្លែងលក់បណ្ដើរ ហើយបន្តិចក្រោយមក ក៏ឃើញជនសង្ស័យ២នាក់ប្ដីប្រពន្ធនោះជិះម៉ូតូកង់បី១គ្រឿងទៅឈប់ជិតកន្លែងលក់របស់គាត់ ។ ពេលឃើញមុនដំបូង គាត់មិនដឹងថាជាចោរនោះទេ គឺនឹកស្មានថាជាអ្នកដែលទៅរកទិញមួកប៉ុណ្ណោះ ហើយគាត់ក៏បានដើរឆ្លងផ្លូវទៅដើម្បីសួរនាំនិងលក់ឲ្យ ។ ប៉ុន្តែខណៈដើរបានបន្តិច ស្រាប់តែឃើញជនសង្ស័យនាំគ្នាលួចយកមួកសុវត្ថិភាព១ថង់ធំ ហើយយកខាងក្រៅ២ថែមទៀតដាក់ចូលក្នុងម៉ូតូកង់បី រួចព្យាយាមជិះគេចខ្លួន ។
បុរសអ្នកលក់មួកសុវត្ថិភាពរូបនោះបាននិយាយរៀបរាប់ប្រាប់បន្ថែមទៀតថា ពេលឃើញបែបនេះគាត់លែងដើរធម្មតាទៀតហើយ គឺបានរត់ឆ្លងផ្លូវទៅស្ទាក់មុខម៉ូតូកង់បី និងឃាត់ខ្លួនជនសង្ស័យទាំង២នាក់ប្ដីប្រពន្ធនេះបានភ្លាមៗតែម្ដង ។ បន្ទាប់មកបានរាយការណ៍ទៅនគរបាល ដើម្បីឲ្យទទួលយកជនសង្ស័យ រួមទាំងវត្ថុតាងទៅកាន់ប៉ុស្តិ៍នគរបាលរដ្ឋបាលចោមចៅទី៣ ធ្វើការសាកសួរនិងចាត់ការតាមផ្លូវច្បាប់តែម្ដង ៕
ចែករំលែកព័តមាននេះ