ស្ថិត​ក្រោម​សម្ពាធ​បណ្តេញ​ចេញពី​អំណាច នាយក​រដ្ឋមន្ត្រី​ថៃ Paetongtarn បាន​ចុះ​ទាប​យ៉ាង​ខ្លាំង ដោយ​ស្ថិត​នៅ​ក្រោម​គេ​ក្នុង​ចំណោម​មនុស្ស​៤​រូប​ដែល​អាច​ជា​បេក្ខជន​នាយក​រដ្ឋមន្ត្រី ក្នុង​ករណី​លោកស្រី​ចេញពី​អំណាច ។

ទន្ទឹម​ពេល​នឹង​មានការ​ចេញ​ការ​ស្ទង់​មតិ​នេះ​លោក ស្រី ក៏​បាន​បញ្ជូន​បញ្ជី​ឈ្មោះ​គណរដ្ឋមន្ត្រី​ថ្មី​ទៅ​កាន់​ព្រះមហាក្សត្រ​ដោយ​ក្នុង​បញ្ជី​នោះ​លោក ស្រី ក៏​សុំ​កាន់​តំណែង​រដ្ឋមន្ត្រី​វប្បធម៌​ផង​ដែរ ។

ការ​ស្ទង់​មតិ​របស់ Nida Poll បង្ហាញ​ថា ប្រជាប្រិយភាព​របស់​នាយក​រដ្ឋមន្ត្រី Paetongtarn ធ្លាក់​ចុះ​ដល់​9.2% ។

នាយក​រដ្ឋមន្ត្រី Paetongtarn Shinawatra និង​គណបក្ស​ភឿ​ថៃ ដែល​កំពុង​កាន់​អំណាច​បាន​មើលឃើញ​ថា មានការ​ថយ​ចុះ​យ៉ាង​ខ្លាំង​នៃ​ប្រជាប្រិយភាព​នៅ​ក្នុង​ការ​ស្ទង់​មតិ Nida Poll លើក​ទី​ពីរ​សម្រាប់​ត្រីមាស​ទី​ពីរ​នៃ​ឆ្នាំ​នេះ បើ​ធៀប​នឹង​ត្រីមាស​ទី​មួយ ។

ការ​ស្ទង់​មតិ​នៅ​ចន្លោះ​ថ្ងៃ​ទី​១៩ និង​២៥ ខែមិថុនា បាន​រក​ឃើញ​ថា ប្រជាប្រិយភាព​របស់​លោក ស្រី Paetongtarn បាន​ធ្លាក់​ចុះ​មក​ត្រឹម 9.20% ដោយ​ធ្លាក់​ចុះ​ពី​30.9% នៅ​ក្នុង​ត្រីមាស​ទី​មួយ ។

ប្រជាប្រិយភាព​របស់​លោកស្រី ស្ថិត​នៅ​ក្រោយ​មេដឹកនាំ​បក្ស​ប្រឆាំង​លោក Natthaphong Ruengpanyawut អតីត​នាយក​រដ្ឋមន្ត្រី​លោក Prayut Chan-o-cha សូ​ម្បី​តែ​អតីតរដ្ឋមន្ត្រី​មហាផ្ទៃ​លោក Anutin Charnvirakul ៕