ខេត្តកំពង់ឆ្នាំង ៖ អំណោយសប្បុរសជនពីទីជិតឆ្ងាយ ជាពិសេសអំណោយរបស់លោកជំទាវកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ត្រូវបាននាំយកទៅជូនលោកយាយសួស ថន អាយុ៨៥ឆ្នាំ ដែលកំពុងមានជំងឺហើមខ្លួន និងរស់នៅយ៉ាងវេទនាជាមួយប្អូនស្រីឈ្មោះសួស ធឿង អាយុ៦៥ឆ្នាំ ត្រូវបាន
ខេត្តកំពង់ឆ្នាំង ៖ អំណោយសប្បុរសជនពីទីជិតឆ្ងាយ ជាពិសេសអំណោយរបស់លោកជំទាវកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ត្រូវបាននាំយកទៅជូនលោកយាយសួស ថន អាយុ៨៥ឆ្នាំ ដែលកំពុងមានជំងឺហើមខ្លួន និងរស់នៅយ៉ាងវេទនាជាមួយប្អូនស្រីឈ្មោះសួស ធឿង អាយុ៦៥ឆ្នាំ ត្រូវបានប្រគល់ជូនជាបន្តបន្ទាប់ កាលពីព្រឹកថ្ងៃទី៨ កក្កដា ដល់លំនៅឋានលោកយាយទាំងពីរស្ថិតក្នុងភូមិត្រពាំងគ ឃុំជ្រៃបាក់ ស្រុករលាប្អៀរ។
អំណោយដែលបានផ្តល់ជាបន្ទាន់នេះ បន្ទាប់ពីមានការចុះផ្សាយពីជីវិត លោកយាយពីរនាក់បងប្អូនដែលចេញផ្សាយដោយសារព័ត៌មានកោះសន្តិភាពកាលពីថ្ងៃទី៧ កក្កដា និងតាមវ៉េបសាយរបស់ខ្លួន។ អំណោយដែលទៅដល់មុនគេគឺជាអំណោយរបស់លោកជំទាវកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលនាំយកទៅជូនដោយលោកដោក សុទ្ធា អនុប្រធានគណៈកម្មាធិការសាខាកាកបាទក្រហមខេត្ត ព្រមទាំងមន្ត្រីសាខាកាកបាទក្រហមជាច្រើនរូបទៀត អំណោយនេះមានអង្ករ៥០គីឡូក្រាម មុង១ ភួយ១ សារុង១ មីយើង១កេះ ទឹកត្រី៦ដប ទឹកស៊ីអីុវ៦ដប និងថវិកា២០ម៉ឺនរៀល។ គួរបញ្ជាក់ថា សាខាកាកបាទក្រហមខេត្តបានសន្យានឹងធ្វើការជួសជុលជាថ្មីឡើងវិញនូវលំនៅឋានរបស់លោកយាយ ព្រោះដល់រដូវវស្សាហើយគាត់មិនអាចរស់នៅបានទេព្រោះដំបូល ជញ្ជាំងធ្លុះធ្លាយ។
ជាមួយគ្នានេះអំណោយរបស់លោកខៀវ កាញារីទ្ធ រដ្ឋមន្ត្រីក្រសួងព័ត៌មាន និងលោកជំទាវដែលនាំមកជូនលោកយាយដល់លំនៅឋាន ដោយលោកសូ សារ៉េត ទីប្រឹក្សាក្រសួងព័ត៌មានអមដំណើរដោយលោកម៉ម ឈឿន ប្រធានមន្ទីរព័ត៌មានខេត្ត មានអង្ករ៥០គីឡូក្រាម ទឹកស៊ីអ៊ីវ៦ដប មី១កេស និងថវិកា២០មឺុនរៀល។ បន្ទាប់មកអំណោយរបស់លោកខូយ ឃុនហ៊ួរ អភិបាលខេត្តកំពត និងលោកជំទាវអ៊ុន សុគន្ធា អគ្គស្នងការរងនគរបាលជាតិ ដែលអំណោយនេះនាំមកដោយកូនស្រីឈ្មោះហ៊ួរ ច័ន្ទសុភា និងជូនដំណើរដល់លំនៅឋានលោកយាយទុរគតជនដោយលោកស្រីប្រាក់ សៅនី ស្នងការរងនគរបាលខេត្ត និងស្វាមី លោកសំ សិទ្ធី អធិការក្រុងកំពង់ឆ្នាំង។
អំណោយទាំងនេះ មានអង្ករ១០០គីឡូក្រាម មី២កេស ទឹកដោះគោឆៅ១០ឡូ ស្កសរ១០គីឡូក្រាម នំធុង១២ប្រអប់ អំបិល១០គីឡូក្រាម ត្រីខ១០០កំប៉ុង និងថវិកាចំនួន៥០ម៉ឺន រៀល។ ដោយឡែកលោកស្រីប្រាក់ សៅនី និងស្វាមីក៏បានឧបត្ថម្ភបន្ថែមនូវត្រីងៀត២គីឡូក្រាម ទឹកត្រី១យួរ ទឹកស៊ីអ៊ីវ១យួរ មី១កេស និងថវិកា១០ម៉ឺនរៀលផងដែរ។ គួរបញ្ជាក់ថា ខណៈដែលកំពុងប្រគល់អំណោយរបស់សប្បុរសជននោះ លោកជំទាវអ៊ុន សុគន្ធា អគ្គស្នងការរងនគរបាលជាតិបានទូរស័ព្ទមកជូនពរ និងថ្លែងអំណរគុណដល់អ្នកដែលបានចូលរួមមានមន្ត្រីប៉ូលិស មេឃុំ និងមន្ត្រីកាកបាទក្រហមកម្ពុជាទាំងអស់ ពិសេសសូមអរគុណដល់សារព័ត៌មានកោះសន្តិភាពដែលបានផ្សាយពីជីវិតដ៏កម្សត់របស់លោកយាយទាំងពីរ ធ្វើឱ្យរូបគាត់មានការអាណិតអាសូរយ៉ាងក្រៃលែងទើបបានបរិច្ចាគធនធានផ្ទាល់ខ្លួន និងឱ្យកូនស្រីនាំយកអំណោយជូនលោកយាយក្នុងថ្ងៃនេះ។
ក្រោយពីបានទទួលអំណោយជាបន្តបន្ទាប់តែមួយព្រឹកថ្ងៃទី៨ កក្កដា យ៉ាងច្រើននេះមកលោកយាយសួស ធឿង ជាប្អូនបានលើកដៃសំពះថ្លែងអំណរគុណយ៉ាងជ្រាលជ្រៅដោយទឹកចិត្តរំភើបក្រៃលែង និងបួងសួងជូនពរដល់សម្តេច លោកជំទាវ ព្រមទាំងសប្បុរសជនទាំងអស់សូមជួបប្រទះតែសេចក្តីសុខ និងពុទ្ធពរទាំង៤ប្រការកុំបីឃ្លៀងឃ្លាតឡើយ។
ចំណែកលោកតាំង ប៊ុនទត មេឃុំ ជ្រៃបាក់ និងលោកសុខ ផុន មេភូមិត្រពាំងគ ដែលចូលរួមទទួលអំណោយក៏សូមថ្លែងអំណរគុណដោយស្មោះនូវសន្តានចិត្តសប្បុរសជនទាំងអស់ដែរ។ នៅថ្ងៃទី៨ កក្កដា នេះដែរកោះសន្តិភាពក៏បានបញ្ជូនថវិកា និងគ្រឿងឧបភោគបរិភោគដែលទទួលអំពីសប្បុរសជនទៅកាន់ខេត្តកំពង់ឆ្នាំងផងដែរ ដែលការប្រគល់អំណោយបន្តនោះ នឹងចុះផ្សាយនៅថ្ងៃចន្ទ ដើមសប្តាហ៍ក្រោយនេះ៕
ចែករំលែកព័តមាននេះ