មកដល់ពេលនេះ ឪពុកម្តាយជាច្រើនបានធ្វើពលីកម្មគ្រប់យ៉ាងដើម្បីកូនៗរបស់ពួកគេដោយខំប្រឹងប្រែងតាំងពីបាតដៃទទេ ប្រឹងប្រែងធ្វើការ ឬរកស៊ីតាំងពីបាតដៃទទេ «ស៊ីអត់ស៊ីឃ្លាន» ប្រឹងសន្សំរហូតកើតជាទ្រព្យពូនជាសម្បត្តិដើម្បីទុកជាកេរ្តិ៍ឲ្យកូន ។ ចុងក្រោយខ្លួនឯងបានតែពលីកម្ម ។ រឿងនេះ…
មកដល់ពេលនេះ ឪពុកម្តាយជាច្រើនបានធ្វើពលីកម្មគ្រប់យ៉ាងដើម្បីកូនៗរបស់ពួកគេដោយខំប្រឹងប្រែងតាំងពីបាតដៃទទេ ប្រឹងប្រែងធ្វើការ ឬរកស៊ីតាំងពីបាតដៃទទេ «ស៊ីអត់ស៊ីឃ្លាន» ប្រឹងសន្សំរហូតកើតជាទ្រព្យពូនជាសម្បត្តិដើម្បីទុកជាកេរ្តិ៍ឲ្យកូន ។ ចុងក្រោយខ្លួនឯងបានតែពលីកម្ម ។
រឿងនេះ វាមិនមែនជារឿងប្លែកសម្រាប់សង្គមកម្ពុជានោះទេ ហើយមកដល់ពេលបច្ចុប្បន្ន នៅតែមានឪពុកម្តាយជាច្រើន នៅតែមានទស្សនៈ និងគំនិតបែបនេះ ។ ប៉ុន្តែទោះបីជាយ៉ាងណាក៏ដោយ សូមកុំលះបង់ខ្លាំងពេក សូមលៃលកហើយឆ្លៀតឱកាសរកសេចក្តីសុខខ្លួនខ្លះ ។ ប្រយ័ត្នដូច ៤ឃ្លាដែលគេ កំពុងតែល្បី ហើយចែកចាយនៅលើបណ្តាញសង្គមទៅ ។ ឃ្លាដែលគេបានចែករំលែកនេះ វា គឺជាការលេងសើចនោះទេ ប៉ុន្តែការចែករំលែកតាមបែបលេងសើចនេះ ក៏វាបង្កប់នូវសេចក្តីពិត និងតថភាពជាក់ស្តែងក្នុងនោះដែរ ។
តើអត្ថន័យ៤ឃ្លា ដែលត្រូវគេចែករំលែកនោះ គឺជាអ្វីខ្លះទៅ? មកដល់ពេលនេះមូលហេតុដែលឪពុកម្តាយជាច្រើនប្រឹងសន្សំលុយមិនហ៊ានដើរលេងនោះ គឺ ៖ ១ សន្សំលុយទុកឲ្យកូន ចាំកូនរៀនចប់ចាំដើរលេង, ២ ពេលកូនរៀនចប់ វាមានប្តីប្រពន្ធ, ៣ ចាប់ផ្តើមមានចៅ ត្រូវមើលចៅ, ៤ ចាស់ដើរលែងរួច ដេកចាំផ្ទះដដែល ។ តាមអ្វីដែលយើងខ្ញុំយល់ប្រយោគទាំងបួននេះ គឺពិតជាតថភាពសង្គម ដែលឆ្លុះបញ្ចាំង២ចំណុចធំ ។ទី១ ពញាក់ពលរដ្ឋវ័យកណ្តាល ដែលជាឪពុកម្តាយ ឬអ្នកដែលទើបចាប់ផ្តើមកសាងគ្រួសារថា ក្រៅពីគួរតែខិតខំធ្វើការសន្សែសន្សំបង្កើនទ្រព្យ ហើយនោះ គួរតែចំណាយខ្លះ ឬមួយភាគណាមួយរកសេចក្តីសុខឲ្យខ្លួនខ្លះ ។
ជាធម្មតា នៅពេលដែលចាប់ផ្តើម គ្រួសារការសន្សែសន្សំនេះវា គឺជារឿងអទិភាព ប៉ុន្តែវាមិនមែនជាការរិះថាំ មិនហ៊ានចំណាយលើការដើរលេង ហូបចុកឲ្យសមរម្យនោះទេ ។ ជីវិតយើងមិនដឹងកើតហើយស្លា.ប់ពេលណាច្បាស់លាស់នោះទេ ។ ដូច្នេះនៅពេលដែលនៅមានជីវិត ក្រៅពីខំធ្វើការខំចិញ្ចឹមបីបាច់កូនៗ គឺយើងគួរតែចេះបង្កើតកម្មវិធីសប្បាយៗតាមចំណង់ចំណូលចិត្ត ។ សម្ភារៈប្រើប្រាស់ក៏គួរតែគិតគូរ ហើយលៃលកតាមធនធានរបស់យើង ។ ហើយអ្វីដែលសំខាន់ក្រៅពីខិតខំសន្សែសន្សំទុកអោយកូនហើយនោះ ក៏គួរតែលៃលកទុកខ្លួនឯង បម្រុងខ្លះក្រែងកូន ឬកូនប្រសាចិត្តមិនបាន ។
ទី២ កូនចៅដែលជាអ្នកបន្តវេន គួរតែយល់នឹងដឹងអំពីការលះបង់របស់ឪពុកម្តាយដែលបានខិតខំចិញ្ចឹមថែរក្សា តាំងពីតូចក្រូចឆ្មារហូតដល់ធំពេញវ័យមានការអប់រំមានការងារ មានទ្រព្យសល់ទុកឲ្យខ្លួន ។ ដូច្នេះកុំបំភ្លេចពួកគេ ។ នៅពេលដែលខ្លួនមានការងារធ្វើ មានគ្រួសារក៏គួរតែលៃលកពេលវេលាចាត់ចែងនាំឪពុកម្តាយដើរលេង ឬធ្វើនេះធ្វើនោះមិនមែនយកលេសរវល់ ហើយមិនត្រឹមតែមិនយកចិត្តទុកដាក់នឹងពួកគាត់នោះទេ គឺបែរជាយកបន្ទុក ពោល គឺកូនទៅទម្លាក់អោយគាត់ ហើយមិនយកចិត្តទុកដាក់ឲ្យគាត់ទៀត ។ យើងទាំងអស់គ្នាត្រូវចាំថា ទម្រាំបានដល់ថ្ងៃនេះ ឪពុកម្តាយម្នាក់ៗ គឺបានធ្វើពលីកម្មច្រើនណាស់ ដូច្នេះនៅពេលដែលនៅជីវិតចុងក្រោយ មិនគួរយកបន្ទុកដាក់ឲ្យគាត់ ។ ប៉ុន្តែប្រសិនបើគាត់ស្ម័គ្រចិត្តក៏គួរតែលៃលកពេលវេលា ឬចេះចាត់ចេះចែងនាំឪពុកម្តាយទៅនេះទៅនោះឲ្យប្លែកភ្នែកផង ។
សរុបទៅប្រយោគ៤ឃ្លានេះ វាជាប្រយោគលេងសើចទេ ប៉ុន្តែវា គឺជាសារពញាក់អារម្មណ៍យើងទាំងអស់គ្នាឲ្យរិះគិត និងចេះលៃចេះលករៀបចំផែនការគ្រួសារឲ្យច្បាស់លាស់ ។
ជាទូទៅផែនការគ្រួសារ គឺវាមានតាំងពីចំណូល ចំណាយ និងការសន្សំ ហើយលៃលកបំពេញចន្លោះប្រហោង ហើយនៅក្នុងករណីដែលឪពុកម្តាយ និងកូនចេះយល់ចិត្តគ្នាគ្រួសារ និងមានសុភមង្គល ។ ឪពុកម្តាយធ្វើពលីកម្មចំពោះកូនៗ ហើយបើកូនៗមានកត្តញូតាធម៌ចំពោះពួកគេទាំងពីរ គឺជាសកម្មភាពដ៏ប្រពៃដែលយើងគួរតែយកចិត្តទុកដាក់ ៕
ចែករំលែកព័តមាននេះ