ខេត្តព្រៃវែង ៖ យ៉ាងហោចណាស់មនុស្សប្រុសស្រី២នាក់បានរងរបួសស្រាល នៅក្នុងហេតុការណ៍គ្រោះថ្នាក់ចរាចរណ៍មួយ ដែលរថយន្តធុនយក្ស(វ៉េអង) គេចពីម៉ូតូដួលនៅខាងមុខ មកក្រឡាប់លើរថយន្ត lexus GS300 ដែលកំពុងចតនៅចិញ្ចើមផ្លូវរៀបចេញដំណើរ។…
ខេត្តព្រៃវែង ៖ យ៉ាងហោចណាស់មនុស្សប្រុសស្រី២នាក់បានរងរបួសស្រាល នៅក្នុងហេតុការណ៍គ្រោះថ្នាក់ចរាចរណ៍មួយ ដែលរថយន្តធុនយក្ស(វ៉េអង) គេចពីម៉ូតូដួលនៅខាងមុខ មកក្រឡាប់លើរថយន្ត lexus GS300 ដែលកំពុងចតនៅចិញ្ចើមផ្លូវរៀបចេញដំណើរ។
ករណីគ្រោះថ្នាក់ចរាចរណ៍នេះ បានកើតឡើងនៅវេលាម៉ោង៤និង៤០នាទីទៀបភ្លឺ ថ្ងៃទី២៦ មិថុនានៅលើកំណាត់ផ្លូវជាតិលេខ១ ស្ថិតក្នុងភូមិ ស្វាយចេក ឃុំព្រៃឈរ ស្រុកកំពង់បែក ខេត្ត ព្រៃវែង។
រថយន្តបង្កជាប្រភេទរថយន្តវ៉េអងសណ្ដោងរ៉ឺម៉ក ពាក់ស្លាកលេខ កោះកុង 07 00 ចំណែករថយន្តមួយគ្រឿងទៀតដែលរងគ្រោះ ជាប្រភេទរថយន្តលុចស៊ីស GS300 ពណ៌ស ពាក់ស្លាកលេខ ភ្នំពេញ 2CA 3613 បើកបរដោយបុរសម្នាក់ជាជនជាតិប៉ាគីស្ថាន និងមានប្រពន្ធជាជនជាតិខ្មែរ។
បើតាមស្ត្រីម្ចាស់រថយន្ត លុចស៊ីស GS300 បានអោយដឹងថា នៅមុនពេលកើតហេតុ រូបគាត់នឹងប្ដីបានជិះរថយន្តចេញពីក្រុងបាវិត សំដៅទៅភ្នំពេញ ពេលមកដល់ចំណុចកើតហេតុ ក៏បានឈប់រថយន្តដើម្បីប្តូរអោយប្តីបើកម្តង នៅពេលប្តីគាត់ឡើងរថយន្តរៀបចេញដំណើរហើយនោះ ស្រាប់តែមានម៉ូតូមួយគ្រឿង បានដួលនៅខាងមុខរថយន្តផ្នែកខាងឆ្វេងប្រហែល៥០ម៉ែត្រ ស្របពេលនោះក៏មានរថយន្តវ៉េអងមួយគឿងដឹកខ្សាច់ពេញរថយន្តបើកមកដល់ ហើយបើកគេចពីម៉ូតូដែលដួលនោះ រួចក៏រេចង្កូតកាច់ចង្កេះដាច់កន្ទុយក្រោយ ក្រឡាប់មកសង្កត់លើរថយន្តរបស់គាត់ ពាក់កណ្ដាលរថយន្តផ្នែកខាងក្រោយតែម្ដង តែសំណាងល្អប្ដីប្រពន្ធគាត់ទាំងពីរនាក់ជិះនៅខាងមុខ ទើបមិនបានគ្រោះថ្នាក់អ្វីធ្ងន់ធ្ងរ គ្រាន់តែរងរបួសស្រាល។
បន្ទាប់ពីបង្កហេតុរួចមក អ្នកបើកបររថយន្តវ៉េអងមិនស្គាល់អត្តសញ្ញាណ បានចុះពីរថយន្តរត់គេចខ្លួនបាត់ស្រមោល បន្សល់ទុករថយន្តនៅកន្លែងហេតុ ហើយអ្នកដួលម៉ូតូ ក៏លើកម៉ូតូបើកចេញពីកន្លែងកើតហេតុទៅបាត់អស់ផងដែរ។
ក្រោយកើតហេតុមួយសន្ទុះ សមត្ថកិច្ចក៏បានទៅដល់ ជួយអន្តរាគមន៍សម្រួលចរាចរណ៍ និងយករថយន្តទាំង២ ទៅរក្សាទុកដើម្បីរងចាំដោះស្រាយគ្នានៅពេលក្រោយ ៕
ចែករំលែកព័តមាននេះ