ដាំកូនឈើលម្អជាង៣០០ដើម នៅតាមដងផ្លូវរមណីយដ្ឋានភ្នំទំព័រ ដើម្បីបរិស្ថានបៃតង និងទេសចរណ៍
ខេត្តពោធិ៍សាត់ ៖ កាលពីរសៀលថ្ងៃព្រហស្បតិ៍ ទី១៩ ខែមិថុនា ឆ្នាំ២០២៥ លោក ខូយ រីដា អភិបាលខេត្តពោធិ៍សាត់…
ខេត្តពោធិ៍សាត់ ៖ កាលពីរសៀលថ្ងៃព្រហស្បតិ៍ ទី១៩ ខែមិថុនា ឆ្នាំ២០២៥ លោក ខូយ រីដា អភិបាលខេត្តពោធិ៍សាត់ បានដឹកនាំមន្ត្រីពាក់ព័ន្ធ កងកម្លាំង និងប្រជាពលរដ្ឋ ដាំកូនឈើក្ងោកចំនួន ៣០០ដើម ដែលផ្តល់ដោយខណ្ឌរដ្ឋបាលព្រៃឈើខេត្ត។ ការដាំនេះ ធ្វើឡើងនៅតាមដងផ្លូវលំចូលទៅកាន់ រមណីយដ្ឋានទឹកធ្លាក់ភ្នំទំព័រ ក្នុងឃុំប្រមោយ ស្រុកវាលវែង ដើម្បីលើកកម្ពស់បរិស្ថានបៃតង និងទេសចរណ៍ ។
លោកអភិបាលខេត្ត បានបញ្ជាក់ថា កូនឈើទាំងនេះ នឹងដាំអមសងខាងផ្លូវប្រវែង ៣,៥០០ម៉ែត្រ ដោយរៀបចំឲ្យមានសោភ័ណភាព និងគុណភាពល្អ ដើម្បីប្រែក្លាយតំបន់នេះទៅជាតំបន់បៃតងទាក់ទាញភ្ញៀវទេសចរ។ គោលបំណងសំខាន់ នៃការដាំនេះ គឺធ្វើឲ្យខេត្តក្លាយជាខេត្តបៃតង និងឆ្លាតវៃ នាពេលអនាគត ក្រោមយុទ្ធសាស្ត្របញ្ចកោណរបស់រាជរដ្ឋាភិបាល ។
លោកក៏បានប្តេជ្ញាថា ការដាំដើមឈើនៅតាមទីសាធារណៈ គឺជាផ្នែកមួយ នៃការបណ្តុះគំនិតឲ្យប្រជាពលរដ្ឋស្រឡាញ់ និងថែរក្សាព្រៃឈើ ដើម្បីកាត់បន្ថយកម្តៅ និងលើកកម្ពស់សោភ័ណភាព។ រដ្ឋបាលខេត្ត ធ្លាប់បានបង្កើតចលនាស្រឡាញ់ព្រៃឈើ និងដាំកូនឈើជាច្រើនកន្លែងរួចមកហើយ ហើយនៅតែបន្តដាំបន្ថែមទៀត ។
លោកសង្ឃឹមថា បន្ទាប់ពីដាំរួច កូនឈើទាំងនេះ នឹងត្រូវបានថែរក្សាបានល្អ ដើម្បីផ្តល់ប្រយោជន៍ដល់មនុស្សជំនាន់បច្ចុប្បន្ន និងអនាគត។ រមណីយដ្ឋានទឹកធ្លាក់ភ្នំទំព័រ ជាតំបន់ទើបរកឃើញថ្មី ហើយកំពុងត្រូវបានអភិវឌ្ឍជាបណ្តើរៗ រួមទាំងការស្ថាបនាផ្លូវ និងដាំដើមឈើលម្អ ដើម្បីទាក់ទាញភ្ញៀវទេសចរ ៕
ចែករំលែកព័តមាននេះ