ខេត្តមណ្ឌលគិរី ៖ ផ្លូវលំជនបទប្រវែងប្រវែង១២,០០០ម៉ែត្រ ត្រូវបានក្រុមការងារអន្តរក្រសួង ចុះវាយតម្លៃបញ្ចប់ការស្ថាបនា នាថ្ងៃទី២០ មិថុនា ២០២៥ ដើម្បីត្រៀមដាក់ឲ្យប្រជាពលរដ្ឋប្រើប្រាស់ជាផ្លូវការ ស្របពេលដែលរដូវដាំដុះផលដំណាំនានា…
ខេត្តមណ្ឌលគិរី ៖ ផ្លូវលំជនបទប្រវែងប្រវែង១២,០០០ម៉ែត្រ ត្រូវបានក្រុមការងារអន្តរក្រសួង ចុះវាយតម្លៃបញ្ចប់ការស្ថាបនា នាថ្ងៃទី២០ មិថុនា ២០២៥ ដើម្បីត្រៀមដាក់ឲ្យប្រជាពលរដ្ឋប្រើប្រាស់ជាផ្លូវការ ស្របពេលដែលរដូវដាំដុះផលដំណាំនានា កំពុងដុះលូតលាស់ល្អងាយស្រួលដឹកជញ្ជូនកសិផល ។
អាជ្ញាធរឃុំស្រែព្រះបានឲ្យដឹងថា កន្លងទៅនេះផ្លូវធ្វើដំណើរ ពីទីប្រជុំជនស្រុកកែវសីមា ឆ្ពោះទៅឃុំស្រែព្រះ ជាពិសេសគឺភូមិពូគង់ និងភូមិអូរច្រារ ជួបប្រទះផលលំបាកជាខ្លាំង មានជង្ហុកធំៗ អូរកាត់ទទឹងផ្លូវ ដុំថ្មរដិបរដុប និងរអិល។ កត្តានេះ បង្កឲ្យអ្នកភូមិ ជួបបញ្ហាការធ្វើដំណើរប្រកបររបរចិញ្ចឹមជីវិត សិស្សពិបាកទៅសាលារៀន អ្នកជំងឺពិបាកទៅមន្ទីរពេទ្យ ចំណែកប្រជាកសិករ មិនអាចដឹកជញ្ជូនកសិផលទាន់ពេលវេលាទៅលក់នៅទីផ្សារ បណ្តាលឲ្យធ្លាក់តម្លៃប៉ះពាល់ជីវភាពរបស់ពួកគាត់។ ប៉ុន្តែពេលនេះ អ្នកភូមិបានសប្បាយចិត្ត ក្រោយផ្លូវបានធ្វើរួចងាយស្រួចធ្វើចរាចរណ៍ទៅមក ការប្រកបរបរនានាគឺរលូនល្អ ។
យោងតាមរបាយការណ៍ មន្ទីរអភិវឌ្ឍន៍ជនខេត្តមណ្ឌលគិរី បានឲ្យដឹងថា ដើម្បីជួយសម្រាលការលំបាករបស់បងប្អូនប្រជាពលរដ្ឋ ដែលអាស្រ័យការធ្វើដំណើរចេញចូលប្រចាំថ្ងៃ រវាងភូមិពូគង់ និងភូមិអូរច្រារ ឃុំស្រែព្រះ ឆ្ពោះទៅទីរួមស្រុកកែវសីមា ក្រុមការងាររបស់មន្ទីរ បានរូតរះបញ្ចប់ការស្ថាបនាផ្លូវប្រវែង ១២,០០០ម៉ែត្រ (១២គីឡូម៉ែត្រ) ទទឹងខ្នងលើទំហំ៦ម៉ែត្រ កម្រាស់២០សង្ទីម៉ែត្រ។ ហើយនៅថ្ងៃទី២០ ខែមិថុនា គណៈកម្មការអន្តរក្រសួងរួមមានតំណាងក្រសួងអភិវឌ្ឍន៍ជនបទ និងតំណាងក្រសួងសេដ្ឋកិច្ចនិងហិរញ្ញវត្ថុ ដឹកនាំដោយលោក ជី ស៊ីថា រដ្ឋលេខាធិការ និងជាសមាជិកគណៈកម្មាធិការលទ្ធកម្ម ចុះត្រួតពិនិត្យ និងវាយតម្លៃបញ្ចប់សុពលភាព១០០% លើគម្រោងការងារផ្លូវជួសជុលថែទាំខួប ក្រាលល្បាយថ្មភ្នំ ក្នុងគម្រោងឆ្នាំ២០២៤ ដែលអនុវត្តដោយ មន្ទីរអភិវឌ្ឍន៍ជនបទខេត្តមណ្ឌលគិរី ដើម្បីឲ្យប្រជាពលរដ្ឋបានប្រើប្រាស់ជាផ្លូវការ ។
មន្ទីរអភិវឌ្ឍន៍ជនខេត្តមណ្ឌលគិរី បានសំនូមពរដល់បងប្អូនប្រជាពលរដ្ឋ ទាំងអស់ដែលរស់នៅតាមបណ្តោយផ្លូវខាងលើ ចូលរួមថែរក្សា ការពារសមិទ្ឋផលដែលទើបទទួលបានថ្មី ឲ្យបម្រើដល់ផលប្រយោជន៍បងប្អូនបានយូរអង្វែង។ហើយចំពោះបងប្អូន ដែលអាស្រ័យការធ្វើដំណើរឆ្លងកាត់ផ្លូវមួយខ្សែនេះ កុំដឹកលើសទម្ងន់ ហាមកាប់កាយគាស់ផ្លូវថ្នល់ ដែលនាំឲ្យមានទឹកហូរច្រោះ ឆាប់ខូចខាតតួផ្លូវ ប្រើប្រាស់មិនបានយូរ និងខាតបងថវិកាជាតិទៀតផង ៕
ចែករំលែកព័តមាននេះ