កសិករនៅក្នុងប្រទេសវៀតណាម និង ថៃ ដែលកំពុងតែប្រឡងប្រណាំងនាំចេញអង្ករទៅកាន់ពិភពលោកបានកំពុងតែទទួលការលើកទឹកចិត្តឲ្យបង្កបង្កើនផលស្រូវដោយប្រើប្រាស់ពូជស្រូវជប៉ុន នៅក្នុង គោលបំណងជំរុញការនាំចេញអង្កររបស់ពួកគេទៅកាន់ទីផ្សារជប៉ុន។ ដូច្នេះកម្ពុជាគួរតែសិក្សាសក្តានុពលនេះផងដែរ ពីព្រោះផ្ទៃដីដ៏ធំល្វឹងល្វើយនៅក្នុងប្រទេសក៏ប្រហែលជាមានសក្តានុពលដើម្បីចាប់យក ឱកាសនេះផងដែរ ។…
កសិករនៅក្នុងប្រទេសវៀតណាម និង ថៃ ដែលកំពុងតែប្រឡងប្រណាំងនាំចេញអង្ករទៅកាន់ពិភពលោកបានកំពុងតែទទួលការលើកទឹកចិត្តឲ្យបង្កបង្កើនផលស្រូវដោយប្រើប្រាស់ពូជស្រូវជប៉ុន នៅក្នុង គោលបំណងជំរុញការនាំចេញអង្កររបស់ពួកគេទៅកាន់ទីផ្សារជប៉ុន។ ដូច្នេះកម្ពុជាគួរតែសិក្សាសក្តានុពលនេះផងដែរ ពីព្រោះផ្ទៃដីដ៏ធំល្វឹងល្វើយនៅក្នុងប្រទេសក៏ប្រហែលជាមានសក្តានុពលដើម្បីចាប់យក ឱកាសនេះផងដែរ ។
តាមសេចក្តីរាយការណ៍របស់កាសែត Japan News បានឲ្យដឹងថា ពូជស្រូវជប៉ុនមួយប្រភេទដែលកំពុងតែត្រូវបានលើកទឹកចិត្តឲ្យកសិករនៅក្នុងប្រទេសទាំងពីរនេះបង្កបង្កើនផលនោះ គឺជាប្រភេទ ពូជដែលមានឈ្មោះថា ជប៉ូនីកា (japonica)។ ពូជស្រូវជប៉ូនីកានេះ ជាពូជស្រូវដែលផ្តល់អង្ករខ្លីៗ ដូចគ្នាទៅនឹងផលិតផលអង្ករដែលកសិករនៅប្រទេសជប៉ុនបាននិងកំពុងពង្រីកការបង្កបង្កើនផល ចំពេលមាន ការកើនឡើងនូវម្ហូបជប៉ុនមួយប្រភេទដែលគេហៅថា វ៉ាសូគុ ( Washoku)។
ប្រភពដដែលបានអះអាងថា ប្រទេសវៀតណាម និងថៃ គឺស្ថិតក្នុងចំណោមប្រទេសនាំចេញអង្ករកំពូលទាំងបីរបស់ពិភពលោក កំពុងរំពឹងថានឹងមានការកើនឡើងនៃការនាំចេញអង្កររបស់ពួកគេទៅកាន់ប្រទេសជប៉ុន។
ក្រៅពីប្រភេទអង្ករជប៉ូនីកា កសិករនៅក្នុងប្រទេសទាំងពីរក៏បានកំពុងតែបង្កបង្កើនផលស្រូវមួយប្រភេទទៀត ដែលមានឈ្មោះថា សាសានីស៊ីគី (Sasanishiki) ។ ប្រភេទអង្ករទាំងពីរនេះ គ្រាន់តែ នៅផ្សារទំនើបនៅក្នុងទីក្រុងបាងកក គឺគេអាចលក់បានមួយថង់ទម្ងន់៥គីឡូក្រាមប្រមាណជា ៨,៥ ដុល្លារ ។
កសិករនៅថៃអាយុ៤៤ ឆ្នាំមួយរូប បានអះអាងថា អង្ករដែលបានមកពីស្រូវជប៉ូនីកា អាចធ្វើឲ្យលោកលក់បានតម្លៃថ្លៃជាងអង្ករនៅក្នុងស្រុក ប៉ុន្តែទោះបីជាយ៉ាងណាក៏ដោយ អង្ករដែលថៃបានកំពុងតែ នាំចេញទៅកាន់ទីផ្សារជប៉ុនគឺជាពូជស្រូវនៅក្នុងស្រុកនៅឡើយទេ ។
ដោយឡែកសម្រាប់វៀតណាមឯណោះវិញ មានសេចក្តីរាយការណ៍ថា កាលពីថ្ងៃទី ៥ ខែមិថុនា សមាគមឧស្សាហកម្មអង្ករវៀតណាម បាននាំចេញអង្ករ ៥00 តោនជាលើកដំបូងគឺពូជ ជប៉ូនីកានេះឯង ។ សមាគមនេះបានអះអាងថា អង្ករម៉ាកយីហោថ្មីត្រូវនេះបានត្រូវបង្កបង្កើនផលដោយយកចិត្តទុកដាក់លើការលក់នៅក្នុងប្រទេសជប៉ុន ដែលអ្នកប្រើប្រាស់មានការយកចិត្តទុកដាក់ចំពោះបរិស្ថាន និងស្តង់ដារគុណភាពមានភាពតឹងរ៉ឹង។
ប្រធាន សមាគមនេះ គឺ លោក បូយ បាបង (Bui Ba Bong) បានមានប្រសាសន៍ថា កង្វះខាតអង្កររបស់ប្រទេសជប៉ុននាពេលបច្ចុប្បន្នគឺជាឱកាសដ៏ល្អសម្រាប់អង្ករដែលផលិតនៅវៀតណាមដើម្បីចូលទៅក្នុងទីផ្សារកម្រិតខ្ពស់។
តាមសេចក្តីរាយការណ៍របស់ទីភ្នាក់ងារព័ត៌មាន Reuter បានឲ្យដឹងថា តម្លៃអង្ករនៅទីផ្សារជប៉ុនបានឡើងថ្លៃតាំងពីឆ្នាំទៅមកដល់ពេលនេះនៅតែឡើង ដោយសារតែ កង្វះការផ្គត់ផ្គង់។
ប្រភពដដែលបានរាយការណ៍ថា កាលពីចុងឆ្នាំ២០២៤ ដល់ដើមឆ្នាំ២០២៥ទីផ្សារអង្ករជប៉ុនគឺប្រឈមមុខនឹង បញ្ហាកង្វះការផ្គត់ផ្គងប្រមាណជា ៤០ ម៉ឺនតោនជាហេតុនាំអោយតម្លៃអង្ករឡើងដល់ទៅ៤១ភាគរយ ពោលគឺរហូតដល់ ជិត២៨ ដុល្លារនៅក្នុងមួយថង់៥គីឡូក្រាម ។ តម្លៃអង្កនៅជប៉ុនឡើងថ្លៃរហូតដល់រង្គោះរង្គើរដ្ឋាភិបាលជប៉ុន ។
ពាក់ព័ន្ធនឹងពូជអង្ករ ជប៉ូនីកា នេះ អ្នកជំនាញខាងកសិកម្មមួយរូបបានអះអាងថា ប្រសិនបើថៃនិងវៀតណាមអាចបង្កបង្កើនផលបាន សម្រាប់ដីស្រៃនៅកម្ពុជាលោកជឿជាក់ថាកសិករកម្ពុជាក៏អាចបង្កបង្កើនផលបានផងដែរ ប៉ុន្តែទោះបីជាយ៉ាងណាក៏ដោយ នៅពេលដែលកសិករបង្កបង្កើនផលហើយតើលក់អោយពីណា?
លោកបានលើកឡើងថា ជាធម្មតា ការនាំចេញអង្ករវាទាមទារអន្តរកម្មរវាងទីផ្សារ អ្នកនាំចេញ និងកសិករ ដូច្នេះវាមិនអាចចេះតែធ្វើផ្តេសផ្តាសបានទេ ។
ចែករំលែកព័តមាននេះ