រាជធានីភ្នំពេញ ៖ សម្តេចបវរធិបតី ហ៊ុន ម៉ាណែត នាយករដ្ឋមន្ត្រី បានគូសបញ្ជាក់ជាថ្មីថា ជំហររបស់កម្ពុជា នៅតែរក្សាដដែល ក្នុងការដាក់ពាក្យប្តឹងបញ្ហាជម្លោះនៅតំបន់ចំនួន៤…
រាជធានីភ្នំពេញ ៖ សម្តេចបវរធិបតី ហ៊ុន ម៉ាណែត នាយករដ្ឋមន្ត្រី បានគូសបញ្ជាក់ជាថ្មីថា ជំហររបស់កម្ពុជា នៅតែរក្សាដដែល ក្នុងការដាក់ពាក្យប្តឹងបញ្ហាជម្លោះនៅតំបន់ចំនួន៤ ជាមួយថៃ ទៅកាន់តុលាការយុត្តិធម៌អន្តជាតិ (ICJ) ដោយគ្មានការប្រែប្រួលនោះទេ ទោះបីភាគីថៃ បដិសេធក៏ដោយ ។
សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានថ្លែងក្នុង ពិធី “បិទមហាសន្និបាតវិសាមញ្ញកាយរឹទ្ធិជាតិកម្ពុជា” នារសៀលថ្ងៃទី១៧ ខែមិថុនា ឆ្នាំ២០២៥ យ៉ាងដូច្នេះថា ៖ កម្ពុជារក្សាជំហររយកបញ្ហាតំបន់មុំបី ប្រាសាទតាមាន់ធំ ប្រាសាទតាមាន់តូច និងប្រាសាទតាក្របី ប្តឹងតុលាការយុត្តិធម៌អន្តរជាតិ ។ ដោយមិនមានការដកថយចំពោះកិច្ចការងារនោះទេ ។
សម្តេចបវរធិបតី បានបញ្ជាក់ថា ៖ «កម្ពុជាយើងមិនបានត្រឹមតែនិយាយនោះទេ គឺត្រឹមតែ២សប្តាហ៍គត់ យើងបានប្រកាសជាផ្លូវការ ក្រោយមក យើងប្រកាសជាផ្លូវការទៅតុលាការយុត្តិធម៌អន្តរជាតិ តែម្តង បានន័យថា កម្ពុជាយើងមិនដកថយពីការប្រើយន្តការតុលាការយុត្តិធម៌អន្តរជាតិ ដោះស្រាយបញ្ហាទាំង៤នេះ សូមជម្រាបឲ្យច្បាស់ ហើយជាគោលការណ៍របស់យើង» ។
សម្តេចបវរធិបតី ហ៊ុន ម៉ាណែត បានបន្ថែមការដាក់បណ្តឹងទៅតុលាការយុត្តិធម៌អន្តរជាតិ រយៈពេល២សប្តាហ៍ គឺលឿនហើយ ប៉ុន្តែចាំបាច់អ្វីដែលយើងធ្វើចំថ្ងៃទី១៥ ខែមិថុនា ឆ្នាំ២០២៥ ចំខួបថ្ងៃទី១៥ មិថុនា ឆ្នាំ១៩៦២ ក៏ជាប្រផ្នូលល្អរបស់កម្ពុជា ដែលឈ្នះក្តីពីថៃ ក្នុងសំណុំរឿងប្រាសាទព្រះវិហារ ។
សម្តេចបវរធិបតី បានលើកឡើងទោះបីជាថៃបដិសេធ មិនទៅតុលាការយុត្តិធម៌អន្តរជាតិ ជារឿងរបស់ភាគីថៃ ចំណែកកម្ពុជា គឺនៅពេលស៊ីញ៉េហើយ គឺមន្ត្រីយើងបានជិះយន្តហោះយកឯកសារទៅតែម្តង ។
សូមជម្រាបថា សម្តេចបវរធិបតី ហ៊ុន ម៉ាណែត បានសរសេរលើបណ្តាញសង្គមផ្លូវការរបស់សម្តេចនៅរសៀលថ្ងៃទី១៦ ខែមិថុនា ឆ្នាំ២០២៥ថា ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងកិច្ចសហប្រតិបត្តិការអន្តរជាតិ ទើបរាយការណ៍មកថា នៅថ្ងៃចន្ទ ទី១៦ មិថុនា ២០២៥ វេលាម៉ោង ១១:៣០នាទីព្រឹក នៅទីក្រុងឡាអេ (ត្រូវនឹងម៉ោង ៤:៣០នាទី ល្ងាច ម៉ោងនៅរាជធានីភ្នំពេញ) លិខិតផ្លូវការរបស់កម្ពុជា ទៅកាន់តុលាការយុត្តិធម៌អន្តរជាតិ (ICJ) ដើម្បីជួយស្វែងរកដំណោះស្រាយបញ្ហាវិវាទព្រំដែន នៅតំបន់ប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបី ត្រូវបានលោកជំទាវ គឹមសួគ៌ សុវណ្ណារី ឯកអគ្គរាជទូតកម្ពុជាប្រចាំប្រទេសហូឡង់ ប្រគល់ដោយផ្ទាល់ដៃ ជូនលោកក្រឡាបញ្ជី Philippe Gautier នៅតុលាការយុត្តិធម៌អន្តរជាតិ (ICJ) ។
សម្តេចបវរធិបតី បានអះអាងថា កម្ពុជាមិនដកថយទេ ពីការប្រើប្រាស់យន្តការច្បាប់តាមរយៈតុលាការយុត្តិធម៌អន្តរជាតិ (ICJ) ដើម្បីស្វែងរកដំណោះស្រាយបញ្ហាព្រំដែនកម្ពុជា-ថៃ នៅប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបី ។
សម្តេចបវរធិបតី បញ្ជាក់ថា ៖ “រាជរដ្ឋាភិបាល នឹងបន្តធ្វើកិច្ចការនេះ ប្រកបដោយការប្តេជ្ញាចិត្ត និងការទទួលខុសត្រូវខ្ពស់ ដើម្បីការពារបូរណភាពទឹកដី ក៏ដូចជាឧត្តមប្រយោជន៍ជាតិ និងប្រជាជនខ្មែរ” ៕
ចែករំលែកព័តមាននេះ