រាជធានីភ្នំពេញ ៖ រថយន្តចំនួន ៥គ្រឿង បានបុករុញបន្តកន្ទុយគ្នារងការខូចខាតទាំងធ្ងន់ធ្ងរ ខណៈពេលដែលរថយន្តដឹកទំនិញមួយគ្រឿង បានបត់ចូលឃ្លាំង ។ គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង៤រសៀលថ្ងៃទី១៦…
រាជធានីភ្នំពេញ ៖ រថយន្តចំនួន ៥គ្រឿង បានបុករុញបន្តកន្ទុយគ្នារងការខូចខាតទាំងធ្ងន់ធ្ងរ ខណៈពេលដែលរថយន្តដឹកទំនិញមួយគ្រឿង បានបត់ចូលឃ្លាំង ។
គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង៤រសៀលថ្ងៃទី១៦ ខែមិថុនា ឆ្នាំ២០២៥ នៅចំណុចផ្លូវភ្លោះ សង្កាត់គីឡូម៉ែត្រលេខ៦ ខណ្ឌឬស្សីកែវ រាជធានីភ្នំពេញ ។
រថយន្តដែលបង្កគ្រោះថ្នាក់ម៉ាក lexus LX 470 ពណ៌ខ្មៅ ពាក់ស្លាកលេខ ភ្នំពេញ 2AF-0919 បើកបរដោយបុរសម្នាក់ ពុំស្គាល់អត្តសញ្ញាណឡើយ ។
តាមសាក្សីនៅកន្លែងកើតហេតុ បានឲ្យដឹងថា នៅមុនពេលកើតហេតុ គេឃើញរថយន្តដឹកទំនិញមួយគ្រឿង បានធ្វើដំណើរក្នុងទិសដៅពីជើងទៅត្បូង ហើយបត់ឆ្វេងចូលឃ្លាំង ទម្លាក់ទំនិញ ។ នៅពេលនោះ មានរថយន្តចំនួន៤គ្រឿង ដែលធ្វើដំណើរក្នុងទិសដៅពីត្បូង ទៅជើង បញ្ច្រាសទិសគ្នា បង្អង់ល្បឿន និងឈប់បន្តកន្ទុយគ្នា ដើម្បីឲ្យរថយន្តដឹកទំនិញបាត់ឆ្លងផ្លូវ ។ ខណៈនោះស្រាប់តែរថយន្តម៉ាកឡិចស៊ីស LX 470 ពណ៌ខ្មៅពាក់ស្លាកលេខ ភ្នំពេញ 2AF-0919 មួយគ្រឿង ដែលធ្វើដំណើរក្នុងល្បឿនលឿន ក៏បានបុករថយន្តម៉ាក JMC មួយគ្រឿង ពេញទំហឹង ហើយរុញទៅបុករថយន្តម៉ាកតាកូម៉ាមួយគ្រឿង ហើយរុញទៅបុករថយន្តម៉ាកស៊ីណាមួយគ្រឿង និងបុករុញទៅបុករថយន្ត ម៉ាកឡិចស៊ីសមួយគ្រឿងទៀត ជាបន្តបន្ទាប់គ្នា បណ្ដាលឲ្យរថយន្តចំនួន៤គ្រឿង បានរងការខូចខាត ។ ដោយឡែក រថយន្តបង្ក ក៏រងការខូចខាតផងដែរ ។
បន្ទាប់ពីកើតមានគ្រោះថ្នាក់ចរាចរណ៍ នគរបាលមូលដ្ឋាន ក៏បានចុះទៅសម្រួលចរាចរណ៍ ហើយទាក់ទងទៅនគរបាលការិយាល័យចរាចរណ៍ផ្លូវគោក ចុះទៅវាស់វែងយករថយន្តបញ្ជូនទៅកាន់ការិយាល័យ ដើម្បីដោះស្រាយសងការខូចខាត ៕
ចែករំលែកព័តមាននេះ