ទាំងប្រជាជនកម្ពុជា និងប្រជាជនថៃដែលរស់នៅតាមព្រំដែន គឺពិតជាមិនចង់ឃើញជម្លោះរវាងប្រទេសទាំងពីរឡើយ ពីព្រោះជីវិតរបស់ពួកគេត្រូវដាក់អោយនៅក្នុងស្ថានភាពដ៏លំបាក និងគ្រោះថ្នាក់គ្រប់ពេលវេលា បើសិនជាស្ថានភាពជម្លោះរវាងប្រទេសជិតខាងទាំងពីរ នៅតែបន្តតានតឹង ។ ស្ថានភាពព្រំដែន មកដល់ត្រឹមព្រឹកថ្ងៃទី១១…
ទាំងប្រជាជនកម្ពុជា និងប្រជាជនថៃដែលរស់នៅតាមព្រំដែន គឺពិតជាមិនចង់ឃើញជម្លោះរវាងប្រទេសទាំងពីរឡើយ ពីព្រោះជីវិតរបស់ពួកគេត្រូវដាក់អោយនៅក្នុងស្ថានភាពដ៏លំបាក និងគ្រោះថ្នាក់គ្រប់ពេលវេលា បើសិនជាស្ថានភាពជម្លោះរវាងប្រទេសជិតខាងទាំងពីរ នៅតែបន្តតានតឹង ។
ស្ថានភាពព្រំដែន មកដល់ត្រឹមព្រឹកថ្ងៃទី១១ ខែមិថុនា ឆ្នាំ២០២៥ គឺមិនមានអ្វីប្រែប្រួលទេ ដោយស្ថានការណ៍ព្រំដែន គឺមានបិទមានបើកតាមចំណាត់ការរៀងៗខ្លួន ។ ប៉ុន្តែទោះបីជាយ៉ាងណាក៏ដោយការ ត្រៀមការពារ និងបង្ការហានិភ័យដល់ជនស៊ីវិល និងលទ្ធភាពហានិភ័យផ្សេងៗក៏គួរតែលើកកម្ពស់ ហើយប្រុងប្រយ័ត្នផងដែរ ។
លោក ស សុខា រដ្ឋមន្ត្រីក្រសួងមហាផ្ទៃបានជំរុញឲ្យអាជ្ញាធរដែនដីគ្រប់កម្រិតខិតខំការពារនូវផលប្រយោជន៍ស្របច្បាប់របស់ប្រជាពលរដ្ឋខ្មែរដែលកំពុងធ្វើការរកស៊ី និងរស់នៅក្នុងទឹកដីថៃ ព្រមទាំងត្រៀមវិធានការជម្លៀស ប្រជាពលរដ្ឋដែលកំពុងនៅប្រទេសថៃ ឱ្យវិលចូលក្នុងប្រទេសវិញក្នុងករណីមានការប៉ះទង្គិចគ្នាដោយកម្លាំងប្រដាប់វុធ នៅតាមខ្សែបន្ទាត់ព្រំដែន ។ ទន្ទឹមនេះ លោកក៏បានស្នើឲ្យមានអប់រំណែនាំ និងផ្សព្វផ្សាយជូនប្រជាពលរដ្ឋកុំឱ្យឆ្លងដែនចូលទៅប្រទេសថៃជាបណ្តោះអាសន្ន ប្រសិនបើមិនចាំបាច់ ។
លោកបានប្រាប់ឲ្យអាជ្ញាធរតាមមូលដ្ឋានត្រូវត្រៀមវិធានការសម្រាប់ឆ្លើយតប និងគ្រប់គ្រងស្ថានភាពអាសន្នដែលអាចកើតឡើងជាយថាហេតុ និងផ្តល់កិច្ចសហការឱ្យបានជិតស្និទ្ធជាមួយ កងយោធពលខេមរភូមិន្ទ និងនគរបាលជាតិតាមការចាំបាច់ ដើម្បីការពារថែរក្សាសន្តិសុខសណ្តាប់ធ្នាប់បូរណភាពទឹកដី សុវត្ថិភាព អាយុ និងទ្រព្យសម្បត្តិប្រជាពលរដ្ឋ ក្នុងដែនសមត្ថកិច្ចរបស់ខ្លួន ។
ក្រៅពីនោះ លោកបានលើកឡើងឲ្យមន្ត្រីត្រូវត្រៀមរៀបចំ និងបម្រុងទុករួចជាមុននូវផែនការជម្លៀសប្រជាពលរដ្ឋដែលត្រឡប់ចូលមកក្នុងប្រទេសវិញ និងអ្នករស់នៅតំបន់ព្រំដែនក្នុងករណីមានការប៉ះទង្គិចគ្នាដោយកម្លាំងប្រដាប់អាវុធដែលអាចកើតឡើងជាយថាហេតុ ឬមានការបិទច្រកទ្វារព្រំដែនក្នុងនោះត្រូវ រៀបចំទីជម្រកសុវត្ថិភាពបណ្តោះអាសន្នមធ្យោបាយដឹកជញ្ជូនជំនួយសង្គ្រោះស្បៀងអាហារ ថ្នាំសង្កូវ ទឹកស្អាត អគ្គិសនី ។ សភាពការណ៍ គឺពិតជាមិនទាន់អាចប៉ាន់ប្រមាណបាននៅឡើយទេ ។ ដូច្នេះការត្រៀមខ្លួនទុកជាមុន ក៏អាចបង្ការនូវហានិភ័យជាយថាហេតុ ណាមួយកើតឡើងបានផងដែរ កុំអោយពេលដែលកើតឡើងមិនដឹងធ្វើយ៉ាងណា ។
ចំណែកប្រជាជនថៃ ដែលរស់នៅតាមព្រំដែនក៏ពិបាកដូចគ្នាផងដែរ នៅក្នុងស្ថានភាពមិនប្រាកដប្រជានេះ ។
សារព័ត៌មាន the Nation បានឲ្យដឹងថា អ្វីដែលប្លែកគឺថា ក្រសួងមហាផ្ទៃថៃបានចេញបទបញ្ជាឱ្យចុះអង្កេតកន្លែងស្នាក់នៅក្នុងខេត្តជាប់ព្រំដែនកម្ពុជាចំនួន៧ ដើម្បីធានាសុវត្ថិភាពរបស់អ្នកស្រុកដែលជាពលរដ្ឋរបស់គេ ។
លោក អនុទិន ចានវីរគល់ (Anutin Charnvirakul ) រដ្ឋមន្ត្រីក្រសួងមហាផ្ទៃថៃ បានស្នើឲ្យ មន្ត្រីនៅក្នុងខេត្ត អ៊ូប៊ុនរជ្ជថានី, ស៊ីសាកេត, សុរិន, បុរីរ៉ាំ, ស្រះកែវ, ចន្ថាបុរី និងត្រាតឲ្យចុះវាស់វែងនិង សិក្សាលម្អិតអំពីជម្រក លើតំបន់សំខាន់ៗចំនួន ដើម្បីឆ្លើយតបទៅនឹងការកើនឡើងនៃភាពតានតឹងជាមួយនឹងកងទ័ពកម្ពុជា បន្ទាប់ពីមានការប្រឈមមុខដាក់គ្នានៅក្នុងតំបន់មុំបី ។
លោក អនុទិន ត្រូវបានគេដឹងថា បានចុះទៅស្រុកមួយក្បែរកន្លែងផ្ទុះអាវុធ ហើយបានដាក់ចេញនូវតម្រូវការ បន្ទាន់មួយដើម្បីពន្លឿនកិច្ចខិតខំប្រឹងប្រែងទាក់ទងនឹងការផ្តល់ និងការថែទាំជម្រកសុវត្ថិភាពជូនពលរដ្ឋថៃ ។
សារព័ត៌មាននេះ បានផ្សាយថា នេះជាវិធានការបន្ទាន់ឆ្លុះបញ្ចាំងពីការព្រួយបារម្ភរបស់រដ្ឋាភិបាលចំពោះសុវត្ថិភាពប្រជាជនដែលរស់នៅតាមបណ្តោយព្រំដែន និងការត្រៀមខ្លួនក្នុងការឆ្លើយតបនឹងការវិវត្តដែលមិនបានគិតទុកជាមុន ៕
ចែករំលែកព័តមាននេះ