ខេត្តប៉ៃលិន ៖ រហូតមកដល់ថ្ងៃទី១១ ខែមិថុនា ឆ្នាំ២០២៥នេះ គេសង្កេតឃើញប្រជាពលរដ្ឋមួយចំនួន ដែលប្រកបមុខរបរលក់ដូរដូជា សំលៀកបំពាក់ នំ ចំណី…
ខេត្តប៉ៃលិន ៖ រហូតមកដល់ថ្ងៃទី១១ ខែមិថុនា ឆ្នាំ២០២៥នេះ គេសង្កេតឃើញប្រជាពលរដ្ឋមួយចំនួន ដែលប្រកបមុខរបរលក់ដូរដូជា សំលៀកបំពាក់ នំ ចំណី ម្ហូប អាហារ ផ្លែឈើ និងបង្អែមជាដើម នៅទីតាំងជុំវិញសួនកុមារ ក្បែរវិមានឯករាជ្យ មុខសាលាខេត្តប៉ៃលិន ដោយម្នាក់ៗ មានសកម្មភាព យ៉ាងមមារញឹក ប្រកបដោយបរិយាកាសសប្បាយរីករាយ។ ចំណែកឯអាជ្ញាធរ និងកងសម្លាំងមានសមត្ថកិច្ចគ្រប់ប្រភេទ ក៏បានរក្សាសណ្តាប់ធ្នាប់សាធារណៈ យ៉ាងល្អប្រសើរជូនពួកគាត់ផងដែរ ។
បើតាមប្រភពព័ត៌មានពីស្ត្រីម្នាក់ ឈ្មោះ ឌី ស្រីមាស អាយុ៣៥ឆ្នាំ រស់នៅក្នុងភូមិប៉ាហ៊ីជើង សង្កាត់ប៉ៃលិន ក្រុងប៉ៃលិន ខេត្តប៉ៃលិន ប្រកបមុខរបរលក់ដូរ កណ្តូប ចង្រិតលីង និងកូនឌុកឌឿ នៅផ្នែកខាងជើងសួនកុមារ បានរៀបរាប់ឱ្យដឹងថា ៖ នាងបានប្រកបមុខរបរលក់ដូរនេះ អស់រយៈពេលជាង៣ឆ្នាំមកហើយ ដោយរៀបរាល់ព្រឹក នាងតែងតែទៅផ្សារនាពេលព្រលឹម ដើម្បីរកទិញសត្វកណ្តូប និងចង្រិត និងដង្កូវឌុកឌឿ យកមកលីងបំពងនៅផ្ទះ រហូតដល់ពេលរសៀលទើបដឹកតាមរយៈយកទៅរៀបចំដាក់លក់នៅក្បែរសួនកុមារ គឺចាប់លក់ដូរតាំងពីម៉ោង៤និង០០នាទីរសៀល រហូតដល់ម៉ោង៩និង០០នាទីយប់ ទើបរើសម្ភារៈត្រឡប់មកផ្ទះវិញ ។
នាងបន្តទៀតថា ការលក់ដូរនេះ នៅថ្ងៃខ្លះក៏ដាច់អស់៥ទៅ១០គីឡូក្រាម តែថ្ងៃខ្លះទៀត ក៏នៅសល់តិចតួចដែរ។ ហើយការលក់ដូរនាពេលយប់នេះ នាងគិត១កំប៉ុង តម្លៃ៥០០០ទៅ៦០០០រៀល ដោយសង្កេតឃើញប្រជាពលរដ្ឋ និងភ្ញៀវទេសចរណ៍ ដែលបានដើរលេងពេលយប់ តែងតែទិញយកទៅនាំគ្នាបរិភោគនៅលើសួន ដោយក្លែមជាមួយមិត្តភក្តិ។ ចំណែកអ្នកខ្លះទៀត គេទិញយកទៅហូបជាមួយបាយនៅឯផ្ទះ ឬក៏ទិញយកទៅជួបជុំផឹកស៊ីជាមួយមិត្តភក្តិនៅក្នុងភូមិផ្សេងៗ ទៀត ។
បើតាមស្ត្រីម្នាក់ ឈ្មោះ គុណ ស្រីណុច រស់នៅភូមិអូរតាពុកលើ សង្កាត់ប៉ៃលិន ក្រុងប៉ៃលិន ខេត្តប៉ៃលិន ដែលបានប្រកបរបរលក់ដូរបង្អែមគ្រប់មុខនៅក្បែរសួនកុមារ បានរៀបរាប់ឱ្យដឹងដែរថា នាងបានលក់បង្អែមនេះ អស់រយៈពេល២ឆ្នាំមកហើយ ជារៀងរាល់ថ្ងៃ នាងតែងតែងើបពីព្រឹកព្រលឹម ដើម្បីរៀបចំម្ស៉ៅ និងគ្រឿងផ្សំផ្សេងៗទៀត រក្សាទុកឱ្យមានរបៀបរៀបរយ មុននឹងចេញទៅទិញឥវ៉ាន់នៅឯផ្សារ។ ក្រោយពេលត្រឡប់មកវិញ នាងចាប់ផ្តើមធ្វើនំ បង្អែមទាំងនេះ សរុបចំនួន១០មុខ ពោលគឺចាប់ផ្តើមធ្វើរហូតដល់ម៉ោង៣រសៀល ទើបលើកដាក់ម៉ូតូរ៉ឺម៉កដឹកយកទៅលក់ដូរ ។
ប្រភពបន្តទៀតថា មុនដំបូងនាងលក់ដូរតែប៉ុន្មានមុខប៉ុណ្ណោះ ប៉ុន្តែក្រោយមក ដោយសារលក់ដូរដាច់ជាងមុន ក៏ចេះតែពង្រីកច្រើនឡើងៗ រហូតដល់ជាង១០មុខ ដូចជាបង្អែមផ្លែឈើ បង្អែមបាក់បិន បង្អែមកាឡោជី ពោតចំហុយ នំបាញ់ស៊ុង នំបាញ់ហយ នំអាកោ និងបង្អែមផ្សេងៗ ជាច្រើនទៀត ។
ប្រភពបញ្ជាក់ទៀតថា ជារៀងរាល់យប់ នាងអាចលក់នំ បង្អែមបានជាង១០០ប្រអប់។ តែបើធ្វើប៉ះចំថ្ងៃបុណ្យទាន អាចលក់ដាច់ច្រើនជាងនេះថែមទៀត។ ហើយក្នុង១ថ្ងៃ នាងអាចលក់បានប្រាក់ចំណេញចន្លោះពី ៣០ទៅ៤០ម៉ឺនរៀល។ តែបើប៉ះចំថ្ងៃបុណ្យទាន ឬថ្ងៃដែលមានភ្ញៀវទេសចរចូលទៅលេងកម្សាន្តច្រើននៅក្នុងខេត្តប៉ៃលិន អាចឱ្យនាងលក់ដាច់ច្រើនស្ទើរតែរកពេលសម្រាកមិនបានផងដែរ ។
នាងក៏សូមថ្លែងអំណរគុណដល់អតិថិជន និងភ្ញៀវទេសចរ ព្រមទាំងប្រជាពលរដ្ឋ ដែលរស់នៅក្នុងក្រុងប៉ៃលិន ទាំងអស់ ដែលតែងតែនិយមគាំទ្រ និងទិញនំបង្អែមរបស់ខ្លួនយកទៅទទួលទាន និងសម្រាប់កម្មវិធីផ្សេងៗ ព្រោះជាផលិតផលខ្មែរសុទ្ធសាធ ហើយគ្មានសារធាតុគីមីអ្វីដែលធ្វើឱ្យប៉ះពាល់ដល់សុខភាពនោះឡើយ ៕
ចែករំលែកព័តមាននេះ