រាជធានីភ្នំពេញ ៖ ចាប់តាំងពីថ្ងៃប៉ះទង្កិចរវាងកងទ័ពកម្ពុជា និងកងទ័ពថៃ ដែលបានកើតឡើងក្នុងមូលដ្ឋានស្រុកជាំក្សាន្ត ខេត្តព្រះវិហារ ក្រសួងព័ត៌មាន បានតាមដានយ៉ាងជាប់លាប់រាល់ការផ្សព្វផ្សាយដោយសារព័ត៌មានជាតិអន្តរជាតិ ការផ្សាយ និងចែកចាយព័ត៌មានផ្សេងៗលើបណ្តាញសង្គមទាំងក្នុង…
រាជធានីភ្នំពេញ ៖ ចាប់តាំងពីថ្ងៃប៉ះទង្កិចរវាងកងទ័ពកម្ពុជា និងកងទ័ពថៃ ដែលបានកើតឡើងក្នុងមូលដ្ឋានស្រុកជាំក្សាន្ត ខេត្តព្រះវិហារ ក្រសួងព័ត៌មាន បានតាមដានយ៉ាងជាប់លាប់រាល់ការផ្សព្វផ្សាយដោយសារព័ត៌មានជាតិអន្តរជាតិ ការផ្សាយ និងចែកចាយព័ត៌មានផ្សេងៗលើបណ្តាញសង្គមទាំងក្នុង និងក្រៅស្រុក ក្នុងរកឃើញជាង៩០ករណី ជាព័ត៌មានក្លែងក្លាយ ។
បើតាមលោក ទេព អស្នារិទ្ធ អ្នកនាំពាក្យក្រសួងព័ត៌មាន នាថ្ងៃ១១ ខែមិថុនា ឆ្នាំ២០២៥ បានលើកឡើងថា ក្នុងចំណោមព័ត៌មានក្លែងក្លាយជាង៩០ករណីនេះ មានប្រមាណ៥០ករណី ជាការផ្សាយបែបញុះញង់ បំពុលសង្គម ។
លោកថា ៖ “ក្នុងចំណោមព័ត៌មានក្លែងក្លាយចំនួន ជាង៩០ករណី ភាគច្រើនប្រភពពីបណ្តាញសង្គម ដែលក្រសួងព័ត៌មានបានកត់ត្រា ចាប់ពីដើមខែមិថុនា រហូតមកទល់ពេលនេះ មានប្រមាណ ៥០ករណី ជាការផ្សាយបែបញុះញង់ បំពុលសង្គម រាប់បញ្ចូលទាំងខ្លឹមសារបែបលេងសើច បំភ្លៃ ប្រមាថ ប៉ះពាល់ដល់ស្មារតី និងទឹកចិត្តរបស់កងកម្លាំងសមត្ថកិច្ច ដែលកំពុងអនុវត្តការងារតាមបណ្តោយព្រំដែន” ។
អ្នកនាំពាក្យបានបន្តថា សម្រាប់ជាវិធានការគ្រប់គ្រងស្ថានភាពទាំងនេះ សម្រាប់ការផ្សាយមាតិកាព័ត៌មានក្លែងក្លាយលើបណ្តាញសង្គម ដែលភាគច្រើនមានប្រភពនៅក្រៅប្រទេស ក្រសួងបានសហការជាមួយក្រសួងពាក់ព័ន្ធ ដើម្បីសហការជាមួយក្រុមហ៊ុនMeta ឬ TikTok ជាដើម ដើម្បីឱ្យក្រុមហ៊ុន block ឬលុបមាតិកា ដែលមាតិកាទាំងនោះ ក៏បំពាននឹងនិយាមប្រតិបត្តិនៃការប្រើប្រាស់បណ្តាញសង្គម Community Standard ផងដែរ ៕
ចែករំលែកព័តមាននេះ