ខេត្តកណ្តាល ៖ ក្មេងៗដុតសំរាមលេង បណ្ដាលឲ្យឆេះរាលដាលដល់ប៉ារ៉ែតធ្វើពីឈើ និងជ័រ សម្រាប់ទ្រទំនិញ យ៉ាងសន្ធោសន្ធៅ បន្តឆេះទំនិញមុខផ្ទះប្រជាពលរដ្ឋ បង្កការភ្ញាក់ផ្អើលយ៉ាងខ្លាំងដល់បងប្អូនប្រជាពលរដ្ឋ និងសមត្ថកិច្ច…
ខេត្តកណ្តាល ៖ ក្មេងៗដុតសំរាមលេង បណ្ដាលឲ្យឆេះរាលដាលដល់ប៉ារ៉ែតធ្វើពីឈើ និងជ័រ សម្រាប់ទ្រទំនិញ យ៉ាងសន្ធោសន្ធៅ បន្តឆេះទំនិញមុខផ្ទះប្រជាពលរដ្ឋ បង្កការភ្ញាក់ផ្អើលយ៉ាងខ្លាំងដល់បងប្អូនប្រជាពលរដ្ឋ និងសមត្ថកិច្ច ចេញរថយន្តទៅអន្តរាគមន៍បាញ់ពន្លត់ ។
ហេតុការណ៍នេះបានកើតឡើងនៅវេលាម៉ោង០៩និង១៥នាទីព្រឹកថ្ងៃទី១២ ខែមិថុនា ឆ្នាំ២០២៥ នៅចំណុចដីឡូត៍ ភូមិត្រពាំងភូមិ ឃុំពើក ស្រុកអង្គស្នួល ខេត្តកណ្ដាល ។
លោកវរសេនីយ៍ឯក មាន សំណាង អធិការ នៃអធិការដ្ឋាននគរបាលស្រុកអង្គស្នួល បានឲ្យដឹងថា ករណីអគ្គិភ័យនេះ មុនពេលកើតហេតុ មានក្មេងប្រុសស្រី ចំនួន០២នាក់ រួមមាន ៖ ១.ឈ្មោះ ហ៊ន រស្មី ភេទប្រុស អាយុ០៩ឆ្នាំ និង២.ឈ្មោះ មុត ស្រីនិច ភេទស្រី អាយុ០៧ឆ្នាំ ។ បាននាំគ្នាយកសំរាមមកដុតលេង ស្របពេលនោះ ក៏មានខ្យល់បក់បោកអណ្តាតភ្លើងឆេះរាលដាលដល់ប៉ារ៉ែត ធ្វើពីឈើ និងជ័រ សម្រាប់ទ្រទំនិញយ៉ាងសន្ធោសន្ធៅ ដែលមានម្ចាស់ឈ្មោះ ហ៊ាង ម៉េងហួរ ភេទប្រុស អាយុ៣៤ឆ្នាំ មានទីលំនៅភូមិ ត្រពាំងភូមិ ឃុំពលក ស្រុកអង្គស្នួល ខេត្តកណ្ដាល បណ្តាលឲ្យខូចខាតសម្ភារៈ រួមមាន ៖ ប៉ារ៉ែតឈើ ចំនួន ៦០០ប៉ារ៉ែត, ប៉ារ៉ែតជ័រ ចំនួន ៥០០ប៉ារ៉ែត និងកងឈើ ចំនួន ១,០០០កង សរុប ជាទឹកប្រាក់ ចំនួន ៦.០០០$ ( ប្រាំមួយពាន់ដុល្លារ) ។ បន្ទាប់មក ក៏បានរាលដាលដល់សម្ភារៈ ដែលមាននៅមុខផ្ទះប្រជាពលរដ្ឋ បណ្ដាលអោយមានការខូតខាតសម្ភារៈ ប្រហែល ១០% រួមមាន ៖ ម៉ាស៊ីនបោកខោអាវ ចំនួន០១គ្រឿង, កញ្ចក់បង្អួច ចំនួន០២ ,តង់ជ័រ ចំនួន០៣តង់, ធុងទឹកកក ចំនួន០១ ,រោងមាន់ទំហំ 2ម៉ែត្រ x 3ម៉ែត្រ ឆេះខូតខាតទាំងស្រុង ។
តែសំណាងក្នុងហេតុការណ៍នេះ មិនបណ្តាលឲ្យអ្នកម្នាក់របួសនោះទេ និងបានរលត់ទាំងស្រុងនៅវេលាម៉ោង១០និង១០នាទីព្រឹកថ្ងៃដដែល ដោយប្រើប្រាស់រថយន្តពន្លត់អគ្គិភ័យរបស់អធិការដ្ឋាននគរបាលស្រុកអង្គស្នួល ចំនួន ០១គ្រឿង ប្រើប្រាស់ទឹកអស់ចំនួន ០១ឡាន និងប្រើប្រាស់កម្លាំងអន្តរាគមន៍ នៃអធិការដ្ឋាននគរបាលស្រុកអង្គស្នួល សហការជាមួយប៉ុស្ដិ៍នគរបាលរដ្ឋបាលពើក និងកងកម្លាំងទាំងបី កងរាជអាវុធហត្ថស្រុកអង្គស្នួល ប្រជាកាពារ និងប្រជាពលរដ្ឋ ចំនួន៥៧នាក់ ៕
ចែករំលែកព័តមាននេះ