ខេត្តព្រៃវែង ៖ ប្រជាកសិករជាច្រើនគ្រួសារដែលប្រកបមុខរបរដាំឈូកនៅភូមិជ្រៃក្រហ៊ឹម ឃុំកំពង់ឫស្សី ស្រុកពោធិ៍រៀង ខេត្តព្រៃវែង កំពុងត្រូវប៉ាន់ខ្លាំង ព្រោះផ្លែឈូកឆ្នាំនេះ មានតំលៃថ្លៃជាងឆ្នាំមុនៗ ដោយ១គីឡូលក់បានតម្លៃ៦៥០០រៀល…
ខេត្តព្រៃវែង ៖ ប្រជាកសិករជាច្រើនគ្រួសារដែលប្រកបមុខរបរដាំឈូកនៅភូមិជ្រៃក្រហ៊ឹម ឃុំកំពង់ឫស្សី ស្រុកពោធិ៍រៀង ខេត្តព្រៃវែង កំពុងត្រូវប៉ាន់ខ្លាំង ព្រោះផ្លែឈូកឆ្នាំនេះ មានតំលៃថ្លៃជាងឆ្នាំមុនៗ ដោយ១គីឡូលក់បានតម្លៃ៦៥០០រៀល ខណៈដែលឆ្នាំមុនៗលក់បានតម្លៃត្រឹម៤៥០០រៀល ទៅ៥០០០រៀលប៉ុណ្ណោះ ហើយពួកគាត់ក៏សង្ឃឹមថា នៅពេលខាងមុខ តំលៃនេះអាចនឹងឡើងខ្ពស់ជាងនេះទៅទៀត ។
បងស្រី យឹម ដានី បានលើកឡើងថា បើទោះបីការដាំឈូកត្រូវចំណាយដើមទុនច្រើន និងការថែទាំច្រើនជាងដំណាំស្រូវក៏ពិតមែន តែវាផ្តល់ផលប្រយោជន៍អោយគាត់បានច្រើនជាងស្រូវ ហើយមិនពិបាកយកទៅលក់នៅទីផ្សារទេ ព្រោះពេលដែលឈូកទុំល្មមបេះ គ្រាន់តែប្រឡេះយកគ្រាប់ចេញ ពេលនោះ គឺមានឈ្មួញមកទិញដល់ផ្ទះតែម្តង ។
បងស្រីបានបន្តទៀតថា រូបគាត់និងស្វាមីបានប្រកបមុខរបរដាំឈូកនេះរយ:ពេល៣ឆ្នាំហើយ ដែលដំណាំឈូកនេះ បានធ្វើអោយជីវភាពក្នុងគ្រួសារគាត់ធូរធាច្រើន ដោយមិនត្រឹមតែអាចផ្គត់ផ្គង់ការហូបចុកប្រចាំថ្ងៃប៉ុណ្ណោះទេ ថែមទាំងសល់ប្រាក់សម្រាប់អោយកូនបានរៀនសូត្រទៀតផង។
ទោះជាយ៉ាងនេះក្តី បងស្រីបានបញ្ជាក់ថា គ្រួសារគាត់ក៏ដូចជាគ្រួសារអ្នកដាំឈូកផ្សេងៗទៀត នៅតែមិនបោះបង់ចោលមុខរបរធ្វើស្រែនោះទេ គឺធ្វើស្រែផងនិងដាំឈូកផង គាត់ធ្វើស្រែដើម្បីបានអង្ករទុកបរិភោគដោយមិនបាច់ទិញអង្ករគេហូប រីឯការដាំឈូកគឺទុកដើម្បីផ្គត់ផ្គង់រាល់ការចំណាយផ្សេងៗក្នុងគ្រួសារ។
បងប្អូនប្រជាកសិករដែលជាអ្នកដាំឈូកនៅស្រុកពោធ៍រៀង បានសំណូមពរដល់បងប្អូនប្រជាពលរដ្ឋខ្មែរយើងទាំងក្នុងនិងក្រៅប្រទេស សូមជួយគាំទ្រដល់ដំណាំកសិកម្មរបស់ខ្មែរយើង ដែលជាដំណាំក្នុងស្រុក ដើម្បីអោយដំណាំទាំងនេះមានតំលៃថ្លៃ ក៏ដូចជាលើកទឹកចិត្តដល់ប្រជាកសិករយើងទាំងអស់ អោយដាំដំណាំក្នុងស្រុកអោយបានច្រើនជាងនេះ៕
ចែករំលែកព័តមាននេះ