ខេត្តកណ្តាល ៖ ចំថ្ងៃស៊យ ជនសង្ស័យ២នាក់ លួចម៉ូតូគេជិះរត់ចេញពីខេត្តព្រៃវែង តាមផ្លូវជាតិលេខ១ ឆ្ពោះមកភ្នំពេញ មកដល់មុខផ្សារគគីរស្រុកកៀនស្វាយ ក៏ត្រូវបានសមត្ថកិច្ចស្រុកកៀនស្វាយ សហការជាមួយកម្លាំងនគរបាលប៉ុស្តិ៍កំពង់សិង្ហ…
ខេត្តកណ្តាល ៖ ចំថ្ងៃស៊យ ជនសង្ស័យ២នាក់ លួចម៉ូតូគេជិះរត់ចេញពីខេត្តព្រៃវែង តាមផ្លូវជាតិលេខ១ ឆ្ពោះមកភ្នំពេញ មកដល់មុខផ្សារគគីរស្រុកកៀនស្វាយ ក៏ត្រូវបានសមត្ថកិច្ចស្រុកកៀនស្វាយ សហការជាមួយកម្លាំងនគរបាលប៉ុស្តិ៍កំពង់សិង្ហ នៃអធិការដ្ឋាននគរបាលស្រុកព្រះស្តេច ដេញចាប់បានយ៉ាងប្រផាប់ប្រភីងទាំង២នាក់ ផ្អើលខ្លាំងទាំងព្រឹក ។
ហេតុការណ៍នេះបានកើតឡើងនៅវេលាម៉ោង ៧និង ១០នាទីព្រឹក ថ្ងៃទី១១ ខែមិថុនា ឆ្នាំ២០២៥ ចំណុចភូមិក្រាំងក្អុក ឃុំកំពង់សិង្ហ ស្រុកព្រះស្តេច ខេត្តព្រៃវែង ។
សមត្ថកិច្ចស្រុកកៀនស្វាយ បានឲ្យដឹងថា កម្លាំងផ្នែកនគរបាលយុត្តិធម៌ កម្លាំងប៉ុស្តិ៍គគីរ ប៉ុស្តិ៍ដីឥដ្ឋ នៃអធិការដ្ឋាននគរបាលស្រុកកៀនស្វាយ សហការជាមួយកម្លាំងនគរបាលប៉ុស្តិ៍កំពង់សិង្ហ នៃអធិការដ្ឋាននគរបាលស្រុកព្រះស្តេច បានប្រតិបត្តិការតាមចាប់ករណីខាងលើ ដែលលួចម៉ូតូគេជិះរត់ចេញពីខេត្តព្រៃវែង តាមផ្លូវជាតិលេខ១ រហូតឃាត់ខ្លួនសង្ស័យចំនួន០២នាក់ ១-ឈ្មោះ ពេជ្រ យ៉ាទី ភេទប្រុស អាយុ១៩ឆ្នាំ ជនជាតិខ្មែរ មុខរបរកម្មករអូសបន្លែនៅផ្សារដើមគរ មានទីលំនៅភូមិឃ្លាំង ឃុំឈើកាច់ ស្រុកបាភ្នំ ខេត្តព្រៃវែង ។ ២-ឈ្មោះឃឿន ដាវីន ភេទប្រុស អាយុ១៦ឆ្នាំ ជនជាតិខ្មែរ មុខរបរនៅផ្ទះ មានទីលំនៅ សង្កាត់បឹងត្របែក ខណ្ឌចំការមន ក្រុងភ្នំពេញ ។
ក្នុងនោះសមត្ថកិច្ចធ្វើការដកហូតបានម៉ូតូ០២គ្រឿង (-ម៉ាកHONDA C125 ពណ៌ខ្មៅ ផលិតឆ្នាំ២០១៤ ពាក់ផ្លាកលេខ កណ្តាល 1AR-8067 ជារបស់ជនសង្ស័យ -ម៉ាកHONDA C125 ពណ៌ខ្មៅ ផលិតឆ្នាំ២០២២ ពាក់ផ្លាកលេខ កំពត1T-1426 ជារបស់ជនរងគ្រោះ) សោរសម្រាប់កាច់កម៉ូតូ១ឈុត នឹងទូរស័ព្ទដៃ០១គ្រឿង ម៉ាកOPPO ពណ៌ស្វាយលាយស ។
បច្ចុប្បន្នកម្លាំងជំនាញបានប្រគល់ជនសង្ស័យ០២នាក់ឲ្យទៅដើម្បីបន្តតាមនីតិវិធីច្បាប់ ៕
ចែករំលែកព័តមាននេះ