សហរដ្ឋអាមេរិក ៖ អភិបាលក្រុងឡូសអេនចឺឡេសលោកស្រីការេនបាស់ កាលពីថ្ងៃទី១០មិថុនាបានដាក់បម្រាមគោចរណ៍ពេលយប់នៅកណ្ដាលក្រុងឡូសអេនចឺឡេស ជាទីក្រុងធំទី២របស់អាមេរិក បន្ទាប់ពីផ្ទុះចលាចលច្រើនយប់។ លោកស្រីថ្លែងទៅកាន់សារព័ត៌មានថា ខ្ញុំចេញការប្រកាសអាសន្នមូលដ្ឋាននិងដាក់បម្រាមគោចរណ៍ នៅកណ្ដាលក្រុងឡូសអេនចឺឡេស ដើម្បីបញ្ចប់អំពើបំផ្លិចបំផ្លាញ…
សហរដ្ឋអាមេរិក ៖ អភិបាលក្រុងឡូសអេនចឺឡេសលោកស្រីការេនបាស់ កាលពីថ្ងៃទី១០មិថុនាបានដាក់បម្រាមគោចរណ៍ពេលយប់នៅកណ្ដាលក្រុងឡូសអេនចឺឡេស ជាទីក្រុងធំទី២របស់អាមេរិក បន្ទាប់ពីផ្ទុះចលាចលច្រើនយប់។
លោកស្រីថ្លែងទៅកាន់សារព័ត៌មានថា ខ្ញុំចេញការប្រកាសអាសន្នមូលដ្ឋាននិងដាក់បម្រាមគោចរណ៍ នៅកណ្ដាលក្រុងឡូសអេនចឺឡេស ដើម្បីបញ្ចប់អំពើបំផ្លិចបំផ្លាញ ចលាចលនិងការប្លន់យករបស់របរ។ លោកស្រីបញ្ជាក់ថាបម្រាមគោចរណ៍នោះមានជាធរមានចាប់ពីម៉ោង២០ម៉ោងក្នុងស្រុករហូតដល់ម៉ោង៦ព្រឹក។ អភិបាលក្រុងរូបនោះជាអ្នកប្រជាធិបតេយ្យរៀបរាប់ថា ហាងទំនិញដល់២៣ទីតាំងរងការលុកចូលប្រមូលយករបស់របរ ហើយខុំ្ញគិតថាបើបណ្ដោយឲ្យពួកអនាធិបតេយ្យដើរអុកឡុក នោះនឹងបង្កឲ្យទីតាំងពាណិជ្ជកម្មនានា រងការបាត់បង់ធ្ងន់ធ្ងរបំផុត។
ចាប់តាំងពីថ្ងៃទី៦មិថុនាមកក្រុងឡូសអេនចឺឡេស ដែលប្រជាជនភាគច្រើនមានដើមកំណើតអីុស្ប៉ានិក ជាកន្លែងមានការប៉ះទង្គិចគ្នានានា រវាងពួកបាតុករដែលប្រឆាំងប្រតិបត្តិការរបស់ប៉ូលិសអន្តោប្រវេសន៍ចាប់ខ្លួនពូកអ្នកគ្មានលិខិតស្នាមរស់នៅសហរដ្ឋអាមេរិកនិងកងកម្លាំងសន្តិសុខ។ ការប៉ះទង្គិចគ្នានៅបន្តតាមកន្លែងមួយចំនួនក្នុងទីក្រុងនេះ។ វិថីនានានៅតែស្ងប់ស្ងាត់នាថ្ងៃទី១០មិថុនានាកណ្ដាលក្រុងបន្ទាប់ពីការប៉ះទង្គិចគ្នានាពេលយប់ រវាងពួកបាតុករដែលដុតកាំជ្រួចភ្លើងដាក់កងកម្លាំងប៉ូលិស។ ប៉ូលិសបានតបតវិញ ជាមួយការបាញ់ឧស្ន័នបង្ហូរទឹកភ្នែក។ ភ្នាក់ងារប៉ូលិសក្រុងឡូសអេនចឺឡេសបានធ្វើអន្តរាគមន៍ចាប់ខ្លួនមនុស្សក្នុងចំណោមបាតុករច្រើនរយនាក់នៅមុខតុលាការមួយ។
ប្រធានាធិបតីអាមេរិកលោកដូណាល់អះអាងថា ទីក្រុងឡូសអេនចឹឡេសដែលកើតមានការប៉ះទង្គិចគ្នា រវាងកងកម្លាំងសន្តិសុខនិងពួកបាតុករប្រឆាំងនយោបាយអន្តោប្រវេសន៍របស់លោក ត្រូវរាតត្បាតដោយពួកសត្រូវបរទេស។ លោកថ្លែងបែបនេះកាលពីថ្ងៃទី១០មិថុនានៅក្នុងមូលដ្ឋានយោធាមួយ។
នៅមុខកងយោធាប្រធានាធិបតីអាមេរិកដែលបញ្ជាឲ្យដាក់ពង្រាយ កងទាហានសហព័ន្ធច្រើនពាន់នាក់នៅទីក្រុងឡូសអេនចឺឡេសថ្លែងថា យើងនឹងមិនបណ្ដោយឲ្យទីក្រុងអាមេរិកមួយត្រូវលុកលុយនិងដណ្ដើមកាន់កាប់ដោយពួកសត្រូវបរទេសឡើយ។ លោកបន្តថាអ្វីដែលលោកអ្នកបានឃើញនៅ កាលីហ្វ័រនីញ៉ា គឹជាការវាយលុកទូទៅមួយប្រឆាំងសន្តិភាពសណ្ដាប់ធ្នាប់សាធារណៈនិងអធិបតេយ្យភាព ពីសំណាក់ពួកបះបោរដែលលើកទង់ជាតិបរទេស ហើយមានទិសដៅបន្តការលុកលុយរបស់បរទេសចូលប្រទេសយើង។
ជាលើកទីមួយហើយក្នុងប្រវត្តិសាស្ត្រអាមេរិកចាប់តាំងពីឆ្នាំ១៩៦៥មក ដែលប្រធានាធិបតីអាមេរិកមួយរូប ដាក់ពង្រាយទ័ពដោយមិនបាច់សួរយោបល់អភិបាលរដ្ឋជាមុន និងដោយមិនបាច់មានការប្រកាសអាសន្ន៕
ចែករំលែកព័តមាននេះ