ទីក្រុងអាំស្ទែរដាំ ៖ ការហាមឃាត់ប្រើប្រាស់ទូរសព្ទដៃ និងឧបករណ៍អេឡិចត្រូនិកផ្សេងទៀត នៅតាមសាលារៀនក្នុងប្រទេសហូឡង់ បានធ្វើឲ្យការផ្តោតអារម្មណ៍សិក្សារបស់សិស្ស មានភាពប្រសើរឡើង នេះបើយោងតាមការសិក្សាមួយ ដែលធ្វើឡើងដោយរដ្ឋាភិបាលហូឡង់ នេះបើយោងតាមទីភ្នាក់ងារព័ត៌មានរ៉យទ័រ…
ទីក្រុងអាំស្ទែរដាំ ៖ ការហាមឃាត់ប្រើប្រាស់ទូរសព្ទដៃ និងឧបករណ៍អេឡិចត្រូនិកផ្សេងទៀត នៅតាមសាលារៀនក្នុងប្រទេសហូឡង់ បានធ្វើឲ្យការផ្តោតអារម្មណ៍សិក្សារបស់សិស្ស មានភាពប្រសើរឡើង នេះបើយោងតាមការសិក្សាមួយ ដែលធ្វើឡើងដោយរដ្ឋាភិបាលហូឡង់ នេះបើយោងតាមទីភ្នាក់ងារព័ត៌មានរ៉យទ័រ ចុះផ្សាយនៅថ្ងៃទី៤ ខែកក្កដា ឆ្នាំ២០២៥ ។
ការស្ទង់មតិនៅតាមសាលារៀនឯកជន និងវិទ្យាល័យ ចំនួន ៣១៧ បានបង្ហាញថា មតិចំនួន ៣ ភាគ ៤ ថាការហាមឃាត់នេះ បានជះឥទ្ធិពលវិជ្ជមានដល់ការផ្ចង់អារម្មណ៍របស់សិស្ស។ លើសពីនេះ មតិជិត ២ ភាគ ៣ បានកត់សម្គាល់ឃើញពីភាពប្រសើរឡើង នៃបរិយាកាសសង្គមនៅក្នុងសាលារៀនរបស់ពួកគេ ហើយ ១ ភាគ ៣ បានសង្កេតឃើញពីការអនុវត្តរៀនសូត្រកាន់តែប្រសើរឡើង ក្នុងចំណោមសិស្សទាំងអស់ ។
លោកស្រី Marielle Paul រដ្ឋលេខាធិការក្រសួងអប់រំ បានថ្លែងថា “ការហាមឃាត់នេះ មានផលរំខានតិចតួចប៉ុណ្ណោះ ប៉ុន្តែមានការយកចិត្តទុកដាក់ចំពោះមេរៀនកាន់តែច្រើន និងសិស្សដែលចូលចិត្តរាប់អានគ្នាផងដែរ។ ការមិនឲ្យមានទូរសព្ទដៃនៅក្នុងថ្នាក់រៀន កំពុងមានផលវិជ្ជមានដ៏ល្អអស្ចារ្យ។ វាពិតជាល្អណាស់ ដែលសាលារៀនកំពុងដាក់កម្លាំងកាយកម្លាំងចិត្តលើរឿងនេះ” ។
ការហាមឃាត់នេះ បានចាប់ផ្តើមអនុវត្តតាំងពីថ្ងៃទី១ ខែមករា ឆ្នាំ២០២៤ ហើយក៏អនុវត្តចំពោះសាលាបឋមសិក្សាផងដែរ ។ យ៉ាងណា
សាលារៀនភាគច្រើន ក៏អនុញ្ញាតសម្រាប់ឧបករណ៍គាំទ្រផ្នែកវេជ្ជសាស្ត្រ ដូចជាឧបករណ៍ជំនួយការស្តាប់ ដែលភ្ជាប់ទៅនឹងឧបករណ៍ចល័ត ។
សូមរម្លឹកដែរថា អំឡុងខែកក្កដា ឆ្នាំ២០២៣ រដ្ឋាភិបាលប្រទេសហូឡង់ បានប្រកាសថា ទូរសព្ទ និងឧបករណ៍ចល័ត រួមទាំងថេប្លេត និងនាឡិកាឆ្លាតវៃ នឹងត្រូវហាមឃាត់ពីថ្នាក់រៀន ដើម្បីកុំឱ្យមានការរំខានដល់ការសិក្សារបស់សិស្ស ។
គំនិតផ្តួចផ្តើមនេះ កំពុងត្រូវបានណែនាំដោយមានការសហការជាមួយសាលារៀន ហើយនឹងចូលជាធរមាននៅដើមឆ្នាំក្រោយ(ឆ្នាំ២០២៤) ។ យ៉ាងណាក៏ដោយ វានឹងមានករណីលើកលែងមួយចំនួន បូករួមទាំងសិស្សដែលមានតម្រូវការផ្នែកវេជ្ជសាស្ត្រ ឬពិការភាព និងសម្រាប់ថ្នាក់ដែលផ្តោតលើជំនាញឌីជីថល ។
រដ្ឋមន្ត្រីក្រសួងអប់រំ កាលជំនាន់នោះ ធ្លាប់លើកឡើងថា ៖ «ទោះបីជាទូរសព្ទចល័តតែងនៅជាប់ជាមួយយើងក៏ដោយ ប៉ុន្តែវាមិនមែនជារបស់នៅក្នុងថ្នាក់រៀននោះទេ។ សិស្ស ត្រូវតែផ្តោតអារម្មណ៍ចំពោះការរៀន ហើយត្រូវទទួលឱកាសរៀនសូត្រ ឱ្យបានល្អបំផុត។ ការស្រាវជ្រាវវិទ្យាសាស្ត្រ ក៏បានបញ្ជាក់ថា ទូរសព្ទដៃរំខានដល់ការរៀនសូត្ររបស់សិស្ស» ។
ការសិក្សាជាច្រើន បានរកឃើញថា ការកំណត់ម៉ោងលេងឧបករណ៍ចល័ត ឬទូរសព្ទរបស់កុមារ ត្រូវបានផ្សារភ្ជាប់ទៅនឹងការយល់ដឹង និងការផ្តោតអារម្មណ៍កាន់តែប្រសើរឡើង។ រដ្ឋាភិបាលបាននិយាយថា វាអាស្រ័យលើសាលានីមួយៗ ក្នុងការយល់ព្រមលើច្បាប់ជាមួយគ្រូ ឪពុកម្តាយ និងសិស្ស ថាតើពួកគេចង់ហាមឃាត់ឧបករណ៍ទាំងអស់ចេញពីសាលារៀនដែរ ឬទេ ?
លទ្ធផល នឹងត្រូវបានពិនិត្យឡើងវិញ នៅចុងឆ្នាំសិក្សា ២០២៤/២០២៥ ដើម្បីមើលថា តើវាដំណើរការបានល្អប៉ុណ្ណា ? តើត្រូវការ ដាក់ការហាមឃាត់នេះ ក្នុងផ្លូវច្បាប់ដែរ ឬទេ ? ។ រហូតមកឆ្នាំនេះ សាលារៀននៅប្រទេសហូឡង់ទទួលបានផ្លែផ្កាហើយ ដោយការហាមឃាត់ទូរសព្ទ និងឧបករណ៍អេឡិចត្រូនិក គឺពិតជាជួយដល់ការពង្រឹងការសិក្សា និងបរិយាកាសក្នុងបន្ទប់រៀន ។
សូមជម្រាបថា ប្រទេសផ្សេងទៀត រួមទាំងប្រទេសហ្វាំងឡង់ អង់គ្លេស និងបារាំង ក៏បានស្នើផងដែរ នូវការហាមប្រាមទូរសព្ទចល័ត ដើម្បីបង្កើនការរៀនសូត្ររបស់សិស្ស ៕
ចែករំលែកព័តមាននេះ