រាជធានីភ្នំពេញ ៖ សមត្ថកិច្ចជំនាញនៃនាយកដ្ឋានប្រឆាំងការជួញដូរមនុស្ស និងការពារអនីតិជន ក្រសួងមហាផ្ទៃ សហការជាមួយកម្លាំងស្នងការដ្ឋាននគរបាលរាជធានីភ្នំពេញ និងខណ្ឌដង្កោ បានឆ្មក់បង្ក្រាបទីតាំងភោជនីយដ្ឋាន និងខារ៉ាអូខេយីហោដាយមិនស្តារ ទួលពង្រ…
រាជធានីភ្នំពេញ ៖ សមត្ថកិច្ចជំនាញនៃនាយកដ្ឋានប្រឆាំងការជួញដូរមនុស្ស និងការពារអនីតិជន ក្រសួងមហាផ្ទៃ សហការជាមួយកម្លាំងស្នងការដ្ឋាននគរបាលរាជធានីភ្នំពេញ និងខណ្ឌដង្កោ បានឆ្មក់បង្ក្រាបទីតាំងភោជនីយដ្ឋាន និងខារ៉ាអូខេយីហោដាយមិនស្តារ ទួលពង្រ ឃាត់ខ្លួនមនុស្សប្រុស-ស្រីសរុប១២១នាក់ ពាក់ព័ន្ធករណីបង្កប់សេវាកម្ម អាជីវកម្មផ្លូវភេទ កេងប្រវញ្ចលើស្ត្រីនិងកុមារ ។ ទោះបីជាបែបណា ក្នុងចំណោមមនុស្សទាំង១២១នាក់ កម្លាំងជំនាញបានរកឃើញមានអនីតិជន១៤នាក់ ។
ប្រតិបត្តិការនេះ បានធ្វើឡើងកាលពីយប់ថ្ងៃទី៨ ខែមិថុនា ឆ្នាំ២០២៥ ដឹកនាំដោយលោកឧត្តមសេនីយ៍ទោ សុក សំបូរ ប្រធាននាយកដ្ឋានប្រឆាំងការជួញដូរមនុស្ស និងការពារអនីតិជន ក្រោមការសម្របសម្រួលពីលោក សំម ប្ញទ្ធីវាសនា ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ ។ ទីតាំងបង្កប់សេវាស្រីស្រស់នេះ ស្ថិតនៅក្បាលដី៥៧៦ ផ្លូវ៥០ម៉ែត្រ ភូមិប្រការ សង្កាត់ព្រៃស ខណ្ឌដង្កោ រាជធានីភ្នំពេញ ។
តាមរបាយការណ៍របស់អគ្គស្នងការដ្ឋាននគរបាលជាតិ បានឲ្យដឹងនៅរសៀលថ្ងៃទី៩ មិថុនា ថា ក្នុងប្រតិបត្តិការចុះត្រួតពិនិត្យ និងបង្ក្រាបជាក់ស្តែង កម្លាំងជំនាញបានឆែកឆេរនៅចំពោះមុខតំណាងម្ចាស់ទីតាំង រកឃើញមនុស្សចំនួន១២១នាក់ (ស្រី១០៤នាក់ និងប្រុស១៧នាក់) ក្នុងនោះរកឃើញមានអនីតិជន១៤នាក់ ។
ក្រោយពីឃាត់ខ្លួន កម្លាំងជំនាញបានបញ្ជូនមនុស្សប្រុស-ស្រីទាំង១២១នាក់ ទៅនាយកដ្ឋានប្រឆាំងការជួញដូរមនុស្ស និងការពារអនីតិជន ដើម្បីបន្តនីតិវិធី ៕
ចែករំលែកព័តមាននេះ