ទីក្រុងម៉ូស្គូ៖ សង្គ្រាមអ៊ុយក្រែនមិនអាចបញ្ចប់ដោយងាយៗទេលុះត្រាតែអង្គការណាតូដកកងទ័ពចេញពីរដ្ឋជាសមាជិករបស់ខ្លួននៅតំបន់បាល់ទិច។ ខាងលើនេះជាការថ្លែងរបស់អនុរដ្ឋមន្ត្រីការបរទេសរុស្ស៊ី លោកសឺហ្គេ រីយ៉ាបកូស (Sergei Ryabkov)។ មានន័យថារុស្ស៊ីចាប់ផ្ដើមផ្លាស់ប្ដូរជំហរ និងដាក់លក្ខខណ្ឌបន្ថែមទៀតជាថ្នូរនឹងការបញ្ចប់សង្គ្រាមអ៊ុយក្រែន។
លោករីយ៉ាបកូសថ្លែងថាឫសគល់នៃសង្គ្រាមអ៊ុយក្រែនមិនមែនពាក់ព័ន្ធតែនឹងបញ្ហាអ៊ុយក្រែន១មុខនោះទេ។ ប៉ុន្តែក៏ពាក់ព័ន្ធនឹងការវាតទីរបស់អង្គការណាតូចូលតំបន់អឺរ៉ុបខាងកើតផងដែរ។ ទីនេះធ្លាប់ជាតំបន់ត្រួតត្រា ឬទទួលឥទ្ធិពលពីរុស្ស៊ី ក្រោយមកសហភាពសូវៀត និងចុងក្រោយវិលមករុស្ស៊ីវិញ។ ប៉ុន្តែប្រទេសខ្លះចង់មានចៅហ្វាយថ្មី និងបត់ក្បាលចូលអង្គការណាតូជាបន្តបន្ទាប់។ លោករីយ៉ាបកូសថ្លែងថាបើណាតូយល់ព្រមដកកងទ័ពពីបាល់ទិច សង្គ្រាមអ៊ុយក្រែនអាចងាយស្រួលបញ្ចប់។
សព្វថ្ងៃនេះ កម្លាំងរបស់ណាតូនៅបាល់ទិចកាន់តែខ្លាំងឡើងៗជាលំដាប់។ ណាតូមានមូលដ្ឋាន និងបញ្ជាការដ្ឋានជាច្រើនដូចជានៅប៊ុលការី អេស្តូនី ហុងគ្រី ឡាតវី លីទុយអានី ប៉ូឡូញ រ៉ូម៉ានី និងស្លូវ៉ាគីជាដើម។ ឥឡូវនេះ ណាតូកំពុងធ្វើសមយុទ្ធយោធាបាញ់គ្រាប់កាំភ្លើងពិតនៅប្រទេសប៊ុលការី។ ស៊ុយអែត និងហ្វាំងឡង់ដែលធ្លាប់ប្រកាន់ជំហរអព្យាក្រឹតរវាងអាមេរិក និងសូវៀតក៏បត់ក្បាលចូលណាតូផងដែរ។
កាលពីមុននេះ រុស្ស៊ីទាមទារឱ្យអ៊ុយក្រែនមិនចូលអង្គការណាតូ។ ប៉ុន្តែលើកនេះរុស្ស៊ីដាក់លក្ខខណ្ឌថែមទៀតថាមិនត្រឹមតែអ៊ុយក្រែនមិនចូលណាតូទេ ណាតូត្រូវតែដកថយពីបាល់ទិច។ ខាងលើនេះជាអ្វីដែលលោករីយ៉ាបកូសថ្លែងប្រាប់ទីភ្នាក់ងារព័ត៌មានតាស់របស់រុស្ស៊ី (TASS)។ លោកថ្លែងថាដំណើរឆ្ពោះទៅទិសខាងកើតរបស់ណាតូជាបុព្វហេតុចម្បងនៃសង្គ្រាម។
ប្រភពសម្ងាត់ពីរុស្ស៊ីដែលដឹងរឿងច្បាស់ពាក់ព័ន្ធនឹងការចរចាបញ្ហាអ៊ុយក្រែនបានបង្ហើបឱ្យដឹងថានៅក្នុងចំណោមលក្ខខណ្ឌដែលលោកពូទីនទាមទារនោះមានចំណុចមួយលោកស្នើសុំឱ្យក្រុមបស្ចិមប្រទេសសន្យាជាលាយលក្ខណ៍អក្សរថាត្រូវបញ្ឈប់ដំណើរទៅមុខរបស់អង្គការណាតូ។ មានន័យថាមិនពង្រីកសមាជិកភាពរបស់ខ្លួនទៅទិសខាងកើតជាបន្តទៀតទេ៕
ចែករំលែកព័តមាននេះ