រាជធានីភ្នំពេញ ៖ នៅក្នុងជំនួបសម្តែងការគួរសមសម្តេចអគ្គមហាសេនាបតីតេជោ ហ៊ុន សែន នារសៀលថ្ងៃទី៦ កក្កដា ឆ្នាំ២០១១ នៅភូមិគ្រឹះក្បែរវិមានឯករាជ្យ លោកយូស៊ីអ៊ីសា កៃណូម៉ា ប្រធានក្រុមហ៊ុន MINIBEA បានជម្រាបសម្តេចតេជោនាយករដ្ឋមន្ត្រីថា ក្រុមហ៊ុន របស់លោកគ្រោងប្រារព្ធពិធីសម្ពោធបើកឱ្យដំណើរ
រាជធានីភ្នំពេញ ៖ នៅក្នុងជំនួបសម្តែងការគួរសមសម្តេចអគ្គមហាសេនាបតីតេជោ ហ៊ុន សែន នារសៀលថ្ងៃទី៦ កក្កដា ឆ្នាំ២០១១ នៅភូមិគ្រឹះក្បែរវិមានឯករាជ្យ លោកយូស៊ីអ៊ីសា កៃណូម៉ា ប្រធានក្រុមហ៊ុន MINIBEA បានជម្រាបសម្តេចតេជោនាយករដ្ឋមន្ត្រីថា ក្រុមហ៊ុន របស់លោកគ្រោងប្រារព្ធពិធីសម្ពោធបើកឱ្យដំណើរការរោងចក្រផលិតម៉ូទ័រគ្រប់ប្រភេទក្នុងប្រទេសកម្ពុជានៅថ្ងៃទី១៧ ធ្នូ ឆ្នាំ២០១១ ខាងមុខនេះ នៅតំបន់សេដ្ឋកិច្ចពិសេស ។
តាមរយៈការប្រារព្ធពិធីសម្ពោធដាក់ឱ្យដំណើរការជាលើកដំបូងនេះ លោកសូមគោរពអញ្ជើញសម្តេចតេជោនាយករដ្ឋមន្ត្រីធ្វើជាអធិបតីដ៏ខ្ពង់ខ្ពស់ក្នុងពិធីនោះ ដើម្បីជាការគាំទ្រ និងលើកទឹកចិត្តដល់ដំណើរការវិនិយោគរបស់ក្រុមហ៊ុន ។
ជាការឆ្លើយតប សម្តេចអគ្គមហាសេនាបតីតេជោ ហ៊ុន សែន បានយល់ព្រមទទួលការគោរពអញ្ជើញពីក្រុមហ៊ុន និងបានលើកទឹកចិត្តដល់ក្រុមហ៊ុនក្នុងគម្រោងការវិនិយោគរបស់ខ្លួន ពិសេសចូលរួមអភិវឌ្ឍន៍ធនធានមនុស្សនៅកម្ពុជា។
ទាក់ទងនឹងការវិនិយោគនេះដែរ លោកយូស៊ីគីអ៊ីសា កៃណូម៉ា មានប្រសាសន៍ថា រហូតមកដល់ពេលនេះ ក្រុមហ៊ុនរបស់លោកបានបញ្ជូនបុគ្គលិកចំនួន៣០០នាក់ ទៅសិក្សានៅបរទេសដែលក្នុងនោះបុគ្គលិកចំនួន២០០នាក់បានរៀនចប់សព្វគ្រប់ហើយបានវិលត្រឡប់មកប្រទេសកម្ពុជាវិញដែរ ។ ជាមួយគ្នានេះដែរ លោកប្រធានក្រុមហ៊ុនបន្តថា លោកមានបំណងបញ្ជូនបុគ្គលិកបន្ថែម១០០នាក់ទៀត ទៅបន្តការសិក្សាខាងបច្ចេកទេសនេះ ដើម្បីមកបម្រើការងារក្នុងរោងចក្រដែលនឹងដាក់ឱ្យដំណើរការនៅចុងឆ្នាំ២០១១នេះ ។ បន្ថែមពីលើនេះទៀត លោកបានបញ្ជូនអ្នកជំនាញការឱ្យទៅសិក្សាដើម្បីធ្វើជាអ្នកគ្រប់គ្រងចំនួន២០នាក់រួចមកហើយ ។ ជាមួយគ្នានេះដែរ លោកបានធ្វើការជាមួយលោកពេជ្រ សោភ័ណ លោកអ៊ឹម សិទ្ធី លោកជំទាវអ៊ឹង កន្ថាផាវី ដើម្បីធ្វើយ៉ាងណាផ្តល់ឱកាសដល់កម្ពុជាបានទទួលនូវការហ្វឹកហ្វាត់នូវបច្ចេកវិជ្ជាដ៏ទំនើបនេះ ៕
ចែករំលែកព័តមាននេះ