ទីក្រុងឥស្លាមម៉ាបាត៖ មានករណីអ្នកទោសជាង២រយនាក់រត់ចេញពីពន្ធនាគារនៃទីក្រុងការ៉ាជី ប្រទេសប៉ាគីស្ថាន។ សាក្សីនិយាយថាអ្នកទោសទាំងនោះមានឱកាសរត់ចេញពីគុកបន្ទាប់ពីមានគ្រោះរញ្ជួយដីកើតឡើងជាបន្តបន្ទាប់។ ដូច្នេះ អនុរក្សពន្ធនាគារមើលស្ថានការណ៍មិនស្រួលក៏អនុញ្ញាតឱ្យអ្នកទោសដើរចេញដោយសេរីពីបន្ទប់ឃុំឃាំង។ ប៉ុន្តែមិនមែនមានន័យថាដោះលែងពួកគេឱ្យមានសេរីភាពនោះទេ។
អ្នកទោសរាប់រយនាក់ត្រូវគេអនុញ្ញាតឱ្យស្នាក់នៅមួយដុំនៅក្នុងបរិវេណពន្ធនាគារ។ អគ្គនាយកដ្ឋានពន្ធនាគារប៉ាគីស្ថានប្រាប់ថាស្ថានភាពនៅពេលនោះមានភាពរញ៉េរញ៉ៃមែនទែនដោយសារក្រុមអ្នកទោសមានចំនួនច្រើនពេក។ ពេលនោះជាពេលយប់ទៅទៀត។ ដូច្នេះពិបាកគ្រប់គ្រងបំផុត។ នាយកដ្ឋានប្រាប់ថាយើងគ្មានកម្លាំងគ្រប់គ្រាន់ដើម្បីគ្រប់គ្រងអ្នកទោសទាំងនោះប្រកបដោយប្រសិទ្ធភាពខ្ពស់នោះទេ។
ទោះជាយ៉ាងណាក្ដី នាយកដ្ឋានខាងលើប្រាប់ថានៅទីនេះគ្មានអ្នកទោសលំដាប់ខ្ពស់, អ្នកទោសបរទេស និងអ្នកទោសជនជាតិឥណ្ឌាទេ។ នៅទីនេះភាគច្រើនជាអ្នកទោសស្រាលៗដែលប្រព្រឹត្តបទល្មើសតូចៗ។ ករណីអ្នកទោសហែកគុកលើកនេះមានចំនួនច្រើនមិនធ្លាប់មាននៅប្រទេសប៉ាគីស្ថាន។ ករណីនេះកើតឡើងមុនយប់ថ្ងៃចន្ទបន្តិច និងបង្កបញ្ហាភាពជ្រួលច្របល់រហូតដល់ថ្ងៃអង្គារ។ នេះជាពន្ធនាគារធំជាងគេប្រចាំទីក្រុងការ៉ាជី (Karachi) ដែលដាក់អ្នកទោស៦ពាន់នាក់។
នគរបាលប៉ាគីស្ថានប្រាប់ថាអ្នកទោសម្នាក់បានកញ្ឆក់កាំភ្លើងពីឆ្មាំគុក, ក្រោយមកក៏មានការប្រទាំងប្រទើសគ្នាដោយអាវុធ, ច្រកទ្វារធំនៃពន្ធនាគារក៏របើកឡើង។ នៅក្នុងការបាញ់តដៃគ្នានោះ អ្នកទោសម្នាក់ត្រូវបានបាញ់ស្លាប់ ខណៈដែលឆ្មាំគុកបីនាក់រងរបួស។ ប្រធានអនុរក្សពន្ធនាគារ លោកអាសាត សា (Arshad Shah) ប្រាប់ថានៅយប់កើតហេតុនោះមានឆ្មាំគុកសរុប២៨នាក់បំពេញការងារ។ ប៉ុន្តែគួរឱ្យស្ដាយ ពន្ធនាគារនេះគ្មានបំពាក់ប្រព័ន្ធកាមេរ៉ាសុវត្ថិភាពទេ។
ទីភ្នាក់ងារព័ត៌មានរ៉យទ័របានចុះទៅពិនិត្យមើលសភាពការណ៍នៅពន្ធនាគារក្រោយហេតុការណ៍នោះ។ គេឃើញថាទ្វារ-បង្អួចបែកកញ្ចក់អស់រលីង។ ចំណែកប្រព័ន្ធអគ្គិសនីក៏រងការខូចខាតផងដែរ។ បន្ទប់ប្រជុំ និងកន្លែងសម្រាប់ក្រុមគ្រួសារសួរសុខទុក្ខអ្នកទោសក៏ត្រូវគេរើកកាយខ្ទេចខ្ទីអស់។ ក្រោយពេលទទួលដំណឹងនេះ សាច់ញាតិរបស់អ្នកទោសក៏ប្រមូលផ្ដុំគ្នានៅមុខគុកដើម្បីចង់ដឹងថាតើសាច់ញាតិរបស់ខ្លួនមានសុខទុក្ខយ៉ាងណានៅពេលនេះ? និងបានលួចរត់ចេញពីគុកដែរឬទេ?
អ្នកទោសហែកគុកទាំងនោះមិនប្រាកដជារួចខ្លួន និងរស់នៅសុខសប្បាយនោះទេ។ ប្រធានពន្ធនាគារទីក្រុងការ៉ាជីប្រាប់ថារហូតមកដល់នេះ សមត្ថកិច្ចចាប់បានអ្នកទោស៨០នាក់ត្រឡប់មកវិញហើយ។ លោកយល់ថានេះជាកំហុសរបស់អ្នកគ្រប់គ្រងពន្ធនាគារដែលអនុញ្ញាតឱ្យអ្នកទោសចេញក្រៅបន្ទប់ឃុំឃាំងដោយសារការភ័យខ្លាចជ្រុលពេកពេលមានគ្រោះរញ្ជួយដី។ អ្នកទោសដែលកំពុងរត់គេចខ្លួនសូមវិលត្រឡប់មកវិញជាប្រញាប់។ បើមិនដូច្នេះទេពួកគេនឹងមានទោសកំហុសត្រួតគ្នាកាន់តែច្រើន៕
ចែករំលែកព័តមាននេះ