ទីក្រុងញូដេលី៖ ទំនាក់ទំនងឥណ្ឌា-អាមេរិកមើលទៅប្រហែលជាមិនអាចផ្អែមល្ហែមដូចកាលពីមុនឡើយបន្ទាប់ពីរដ្ឋបាលរបស់លោកត្រាំដំឡើងពន្ធគយ២៥% ហើយអាចនឹងដំឡើងថែមទៀត។ អាមេរិកចោទថាឥណ្ឌាទិញប្រេងឆៅពីរុស្ស៊ី។ ជាការឆ្លើយតប ឥណ្ឌា និងរុស្ស៊ីវាយបកវិញ។ ឥណ្ឌាចោទប្រកាន់ថាអាមេរិក និងអឺរ៉ុបប្រើស្តង់ដារ២ដើម្បីគាបសង្កត់ខ្លួន។ ជាក់ស្ដែង…
ទីក្រុងញូដេលី៖ ទំនាក់ទំនងឥណ្ឌា-អាមេរិកមើលទៅប្រហែលជាមិនអាចផ្អែមល្ហែមដូចកាលពីមុនឡើយបន្ទាប់ពីរដ្ឋបាលរបស់លោកត្រាំដំឡើងពន្ធគយ២៥% ហើយអាចនឹងដំឡើងថែមទៀត។ អាមេរិកចោទថាឥណ្ឌាទិញប្រេងឆៅពីរុស្ស៊ី។ ជាការឆ្លើយតប ឥណ្ឌា និងរុស្ស៊ីវាយបកវិញ។ ឥណ្ឌាចោទប្រកាន់ថាអាមេរិក និងអឺរ៉ុបប្រើស្តង់ដារ២ដើម្បីគាបសង្កត់ខ្លួន។ ជាក់ស្ដែង ឥណ្ឌាថាពួកអឺរ៉ុបក៏ធ្លាប់ទិញទំនិញរុស្ស៊ីដែរដូចជាឧស្ម័នជាដើម។ ម៉េចក៏អាមេរិកមិនដាក់ទណ្ឌកម្មអឺរ៉ុបផងដែរទៅ?
លោកត្រាំថាពន្ធគយ២៥%លើទំនិញឥណ្ឌាមិនទាន់អស់ត្រឹមនេះទេ។ លោកត្រៀមដំឡើងពន្ធថែមទៀតបើឥណ្ឌាមិនព្រមដកខ្លួនថយ ហើយនៅតែបន្តទិញប្រេងពីរុស្ស៊ី។ ជាកិច្ចឆ្លើយតប, រុស្ស៊ីចោទប្រកាន់ថាអាមេរិកប្រើយុទ្ធសាស្ត្រដាក់សម្ពាធ ទាំងខុសច្បាប់ដើម្បីគាបសង្កត់ឥណ្ឌា។ អ្នកនាំពាក្យវិមានក្រឹមឡាំងថ្លែងថាយើងបានស្ដាប់ឮច្រើនហើយពីការគំរាមកំហែង គាបសង្កត់ឱ្យប្រទេសដទៃឈប់មានទំនាក់ទំនងពាណិជ្ជកម្មជាមួយរុស្ស៊ី។ យើងគិតថានេះមិនមែនជាទង្វើស្របច្បាប់ទេ។
ទោះជាយ៉ាងណាក្ដី អ្នកនាំពាក្យរូបនេះសូមមិនបង្គាប់បញ្ជាឱ្យឥណ្ឌាជ្រើសរើសយកប្រទេសនេះ ឬប្រទេសនោះទេ។ រុស្ស៊ីជឿថារដ្ឋអធិបតេយ្យទាំងឡាយមានសិទ្ធិពេញលេញក្នុងការជ្រើសរើសដៃគូពាណិជ្ជកម្ម ឬដៃគូសេដ្ឋកិច្ចដោយខ្លួនឯងដើម្បីជាប្រយោជន៍រៀងៗខ្លួន។ ការនិយាយបែបនេះហាក់ដូចជាពិបាកនឹងធ្វើឱ្យឥណ្ឌាអនុវត្តយុទ្ធសាស្ត្រខ្លួនមួយជិះទូកពីរ។
ប្រភពខ្លះថាឥណ្ឌាឥឡូវនេះរាងញ៉ាកដែរ និងមិនសូវហ៊ានទិញប្រេងពីរុស្ស៊ីជាចំហ និងគគ្រឹកគគ្រេងដូចមុនទេ។ ថ្មីៗនេះ នាវា២គ្រឿងដែលកំពុងដឹកប្រេងពីរុស្ស៊ីសំដៅទៅឥណ្ឌាសុខៗក៏ស្រាប់តែបង្វែរទិសដៅផ្សេងវិញបន្ទាប់ពីឮថាលោកត្រាំចង់ដាក់ទណ្ឌកម្មរុស្ស៊ី។ ឥឡូវនេះ លោកត្រាំកំណត់ឱសានវាទត្រឹមថ្ងៃទី៨ ខែសីហាត្រូវតែមានដំណោះស្រាយពាក់ព័ន្ធនឹងសង្គ្រាមអ៊ុយក្រែន។ បើមិនដូច្នេះទេ លោកនឹងដាក់ទណ្ឌកម្មរុស្ស៊ី។ ប្រទេសដែលទិញទំនិញពីរុស្ស៊ីក៏រងទណ្ឌកម្មដូចគ្នា។
នៅសល់ពេលត្រឹមតែពីរបីថ្ងៃទៀតប៉ុណ្ណោះនឹងដល់ថ្ងៃឱសានវាទ។ ប៉ុន្តែលោកពូទីនហាក់ដូចជាមិនបានបង្ហាញសញ្ញាដកថយនោះទេ។ មន្ត្រីជាន់ខ្ពស់របស់លោកនៅតែបញ្ជាក់ថារុស្ស៊ីចង់បានកិច្ចព្រមព្រៀងសន្តិភាព ប៉ុន្តែទន្ទឹមនឹងនោះ រុស្ស៊ីក៏មិនផ្លាស់ប្ដូរគោលដៅរបស់ខ្លួនជាដាច់ខាត។ ឥណ្ឌាថាការគំរាមកំហែងរបស់លោកត្រាំជារឿងមិនយុត្តិធម៌ទាល់តែសោះ។ ឥណ្ឌាថាខ្លួននឹងខិតខំការពារផលប្រយោជន៍សេដ្ឋកិច្ចរបស់ខ្លួន។ បើដូច្នេះមែន ទំនាស់ពាណិជ្ជកម្មរវាងឥណ្ឌា និងអាមេរិកនឹងឡើងកម្ដៅកាន់តែខ្លាំង។ ប៉ុន្តែចំណុចមួយដែលឥណ្ឌាមិនបដិសេធថាខ្លួនពិតជាបានទិញប្រេងឆៅពីរុស្ស៊ីក៏ជាការទទួលស្គាល់ជាប្រយោលថាខ្លួនបានប្រព្រឹត្តខុសនឹងការដាក់ទណ្ឌកម្មរុស្ស៊ីពីសំណាក់ក្រុមបស្ចិមប្រទេស៕
ចែករំលែកព័តមាននេះ