ខេត្តកណ្តាល ៖ ប្តីប្រពន្ធមួយគូ ពេលមានសេចក្តីសុខនៅជាមួយគ្នាបបួលគ្នាជួញដូរគ្រឿងញៀន លុះពេលសមត្ថកិច្ចចុះបង្ក្រាប អាសន្នមកដល់ ប្តីរត់ផាស់ក្រញាំមិនងាកក្រោយ ជាមួយនឹងស្ត្រីម្នាក់ទៀត នៅសល់តែប្រពន្ធត្រូវសមត្ថកិច្ចចាប់ខ្លួន ។…
ខេត្តកណ្តាល ៖ ប្តីប្រពន្ធមួយគូ ពេលមានសេចក្តីសុខនៅជាមួយគ្នាបបួលគ្នាជួញដូរគ្រឿងញៀន លុះពេលសមត្ថកិច្ចចុះបង្ក្រាប អាសន្នមកដល់ ប្តីរត់ផាស់ក្រញាំមិនងាកក្រោយ ជាមួយនឹងស្ត្រីម្នាក់ទៀត នៅសល់តែប្រពន្ធត្រូវសមត្ថកិច្ចចាប់ខ្លួន ។
ការបង្ក្រាបនេះ ធ្វើទ្បើងកាលពីវេលាម៉ោងប្រមាណ៦និង៣៥នាទីល្ងាចថ្ងៃទី៤ ខែសីហា ឆ្នាំ២០២៥កន្លងទៅ នៅចំណុចបន្ទប់ជួល ក្នុងភូមិព្រែករាំង១ សង្កាត់កំពង់សំណាញ់ ក្រុងតាខ្មៅ ។
លោកវរសេនីយ៍ឯក យី វណ្ណដា អធិការនគរបាលក្រុងតាខ្មៅបានឱ្យដឹងថា ជនសង្ស័យ
ជាប្ដីប្រពន្ធមួយគូនេះ រស់នៅក្នុងភូមិ សង្កាត់ខាងលើ ដែលប្ដីឈ្មោះ រិទ្ធ វ៉ាន់រាជ អាយុ២២ឆ្នាំ ប្រពន្ធឈ្មោះ ខន ពិសី អាយុ១៩ឆ្នាំ ជាកម្មការិនី ។ ចំណែកស្ត្រីម្នាក់ទៀតឈ្មោះ មុំរដ្ឋា អាយុ៣៦ឆ្នាំ រស់នៅក្នុងភូមិ សង្កាត់ ខាងលើដែរ ។
ជាមួយនឹងការចាប់ឃាត់ខ្លួននេះ សមត្ថកិច្ចក៏បានដកហូតវត្ថុតាងមាន ថ្នាំញៀន(ម៉ាទឹកកក)ចំនួន៨កញ្ចប់ ជារបស់ឈ្មោះ រិទ្ធ វ៉ាន់រាជ និងឈ្មោះ ខន ពិសី និងថ្នាំញៀន(ម៉ាទឹកកក)ចំនួន១១កញ្ចប់ ជារបស់ឈ្មោះ មុំ រដ្ឋា ជញ្ជីងសម្រាប់ថ្លឹងថ្នាំញៀន១គ្រឿង ទូរស័ព្ទដៃម៉ាកអុបប៉ូចំនួន២គ្រឿង ទុយោសម្រាប់ចូកថ្នាំញៀនចំនួន២ និងសម្ភារៈសម្រាប់វេចខ្ចប់មួយចំនួន ។
លោកអធិការបន្តថា នៅថ្ងៃទី៤ ខែសីហា ឆ្នាំ២០២៥ វេលាម៉ោង៦និង៣៥នាទីល្ងាច ដោយ
ទទួលបានព័ត៌មានរាយការណ៍មកថា នៅភូមិព្រែករាំង១ សង្កាត់កំពង់សំណាញ់ ក្រុងតាខ្មៅ មានការណីជួញដូរគ្រឿងញៀន លោកក៏បានបញ្ជាឱ្យកម្លាំងផ្នែកប្រឆាំងបទល្មើសគ្រឿង
ញៀន សហការជាមួយកម្លាំងប៉ុស្តិ៍នគរបាលរដ្ឋបាលកំពង់សំណាញ់ ឆ្មក់ចូលទៅបង្ក្រាប ។
នៅពេលទៅដល់ បានឃើញជនសង្ស័យឈ្មោះ មុំ រដ្ឋា និងឈ្មោះ រិទ្ធ វ៉ាន់រាជ តែជន២នាក់នេះបានរត់គេចខ្លួនបាត់ នៅសល់តែឈ្មោះ ខន ពិសី និងកូនតូចអាយុ១៨ខែ កំពុងអង្គុយនៅក្នុងបន្ទប់ ក៏បានឃាត់សួរនាំ និងឆែកឆេររកឃើញថ្នាំញៀនចំនួន៨កញ្ចប់ ដែលជនឈ្មោះ រិទ្ធ វ៉ាន់រាជ លាក់ទុកនៅក្នុងថង់ពណ៌ខ្មៅ កប់នៅក្នុងបាវអង្ករ និងចំនួន១១កញ្ចប់ ជារបស់ជនឈ្មោះ មុំ រដ្ឋា ដែលទុកនៅលើពូកក្នុងផ្ទះជាន់ខាងលើ ។
នៅចំពោះមុខសមត្ថកិច្ច ជនសង្ស័យឈ្មោះ ខន ពិសី ឆ្លើយថា ថ្នាំញៀនចំនួន ៨កញ្ចប់ដែលសមត្ថកិច្ចឆែករកឃើញនៅក្នុងបាវអង្ករគឺជារបស់ប្តីរបស់ខ្លួន ឯចំនួន១១កញ្ចប់នៅក្នុងផ្ទះជាន់ខាងលើជារបស់ឈ្មោះ មុំ រដ្ឋា ដែលត្រូវជាម្តាយមីងរបស់ឈ្មោះ រិទ្ធ វ៉ាន់រាជ ពិតប្រាកដមែន ។ ជន សង្ស័យរួមជាមួយវត្ថុតាង ត្រូវបានកសាងសំណុំរឿងបញ្ជូនទៅសាលាដំបូងខេត្តចាត់ការតាមច្បាប់ ៕
ចែករំលែកព័តមាននេះ