ទីក្រុងយេរូសាឡឹម៖ បន្ទាប់ពីមានប្រតិកម្មជុំវិញពិភពលោកពាក់ព័ន្ធនឹងករណីទាហានអ៊ីស្រាអែលបាញ់ស្លាប់ជនស៊ីវិលប៉ាឡេស្ទីនដែលទៅបើករបបអាហារសម្រាប់បរិភោគ យោធាអ៊ីស្រាអែលប្រកាសថាខ្លួនក៏កំពុងយកចិត្តទុកដាក់ចំពោះបញ្ហានេះផងដែរ។ អ៊ីស្រាអែលថាខ្លួនកំពុងពិនិត្យសើរើសំណុំរឿងនេះឡើងវិញបន្ទាប់ពីឮថាស្លាប់មនុស្សអស់ជាច្រើន។
ប្រភពខ្លះបង្ហើបឱ្យដឹងថាជនស៊ីវិលប៉ាឡេស្ទីនយ៉ាងតិច២៧នាក់ត្រូវទាហានអ៊ីស្រាអែលបាញ់សម្លាប់នៅពេលពួកគេ (ជនស៊ីវិល) ធ្វើដំណើរតាមច្រកផ្លូវដើម្បីទៅបើកម្ហូបអាហារ។ នោះជាច្រកផ្លូវដែលអ៊ីស្រាអែលអនុញ្ញាតឱ្យធ្វើដំណើរ។ នេះបើយោងតាមមន្ត្រីសុខាភិបាលប៉ាឡេស្ទីន។ ប្រភពខ្លះថាទាហានអ៊ីស្រាអែលបានចេញសារព្រមានអ្នកទាំងនោះ។
បន្ទាប់ពីព្រមានហើយ ជនស៊ីវិលទាំងនោះមិនបានស្ដាប់ ឬខ្លបខ្លាចទាហានទេ។ មើលទៅអាការៈរបស់ជនស៊ីវិលទាំងនោះហាក់ដូចជាមិនត្រឹមតែមិនខ្លាចទេ ប៉ុន្តែហាក់ដូចជាចង់គំរាមកំហែងអាយុជីវិតរបស់ទាហានអ៊ីស្រាអែលទាំងនោះថែមទៀត។ ពេលនោះ ទាហានអ៊ីស្រាអែលខ្លះដល់ថ្នាក់តម្រង់កាណុងកាំភ្លើងទៅរកជនស៊ីវិលតែម្ដង។ នេះបើយោងការបញ្ជាក់របស់លោកដេវីដ មេនសឺ (David Mencer) ជាអ្នកនាំពាក្យអ៊ីស្រាអែល។
លោកថ្លែងបន្តទៀតថាហេតុការណ៍បាញ់ប្រហារនោះកើតឡើងនៅក្នុងចម្ងាយប្រហែល៥រយម៉ែត្រពីកន្លែងចែកអំណោយនៅតំបន់រ៉ាហ្វា។ អ្នកនាំពាក្យអឌ្ឍចន្ទក្រហមអន្តរជាតិប្រាប់ទីភ្នាក់ងារព័ត៌មានរ៉យទ័រថាមន្ទីរពេទ្យរបស់ខ្លួននៅរ៉ាហ្វាទទួលអ្នករបួស១៨៤នាក់។ ក្នុងនោះ ១៩នាក់ត្រូវគ្រូពេទ្យបញ្ជាក់ថាបានដាច់ខ្យល់ស្លាប់បាត់ទៅហើយនៅពេលដឹកទៅដល់ទីនោះ។ ចំណែក៨នាក់ទៀតស្លាប់ក្រោយពេលបញ្ជូនទៅដល់មន្ទីរពេទ្យដោយសារមុខរបួសធ្ងន់ធ្ងរពេក។
គួរកត់សម្គាល់ថាដំណឹងស្លាប់ជនស៊ីវិលទាំងនោះកើតឡើងត្រឹមតែប៉ុន្មានម៉ោងប៉ុណ្ណោះបន្ទាប់ពីមានករណីស្លាប់ទាហានអ៊ីស្រាអែលបីនាក់នៅក្នុងការប្រយុទ្ធគ្នាមួយនៅជ្រោយហ្កាហ្សាខាងជើង។ នៅពេលនោះ អ៊ីស្រាអែលកំពុងវាយសម្រុកទៅមុខដើម្បីចូលកាន់កាប់តំបន់ហ្កាហ្សា។ អ៊ីស្រាអែលអះអាងថាក្រុមហាម៉ាស់បានបាត់បង់មូលដ្ឋានរបស់ខ្លួនអស់ភាគច្រើន៕
ចែករំលែកព័តមាននេះ