ទាំងរដ្ឋាភិបាល និងសភាទាំងពីររបស់កម្ពុជា បានមានការសម្រេចចិត្តរួមមួយ ដើម្បីយករឿងជម្លោះព្រំដែនកម្ពុជាជាមួយថៃទៅប្តឹងតុលាការយុត្តិធម៌អន្តរជាតិ ហៅកាត់ថា ICJ ដើម្បីពន្លត់ភ្លើងនយោបាយ ដែលដុតបញ្ឆេះដោយក្រុមជ្រុលនិយមទាំងនៅកម្ពុជា និងថៃ ។…
ទាំងរដ្ឋាភិបាល និងសភាទាំងពីររបស់កម្ពុជា បានមានការសម្រេចចិត្តរួមមួយ ដើម្បីយករឿងជម្លោះព្រំដែនកម្ពុជាជាមួយថៃទៅប្តឹងតុលាការយុត្តិធម៌អន្តរជាតិ ហៅកាត់ថា ICJ ដើម្បីពន្លត់ភ្លើងនយោបាយ ដែលដុតបញ្ឆេះដោយក្រុមជ្រុលនិយមទាំងនៅកម្ពុជា និងថៃ ។
ការសម្រេចចិត្តនះ ធ្វើឡើងនៅក្នុងសមាជលើកទីមួយ នៃរដ្ឋសភា និងព្រឹទ្ធសភា កាលពីព្រឹកថ្ងៃទី២ ខែមិថុនា ។ នៅចំពោះមុខ សមាជិករដ្ឋសភា និងសមាជិកព្រឹទ្ធសភា សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជាបានមានប្រសាសន៍ថា រាជរដ្ឋាភិបាលបានកំពុងតែត្រៀមយកបញ្ហាប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបី ទៅតុលាការយុត្តិធម៌អន្តរជាតិ (ICJ) ។ ទោះបីថៃមិនព្រមក្តី កម្ពុជានឹងយកបញ្ហានេះទៅICJ ដើម្បីបញ្ចប់បញ្ហានេះ ។
នៅក្នុងអ្វីដែលជាយន្តការអន្តរជាតិនោះសម្តេចធិបតី បានបញ្ជាក់ថា «ត្រៀមដាក់ចូលក្នុងរបៀបវារៈសម្រាប់កិច្ចប្រជុំ គណៈកម្មការព្រំដែនចម្រុះពាក់ព័ន្ធនឹងការយកបញ្ហាប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបី ទៅតុលាការយុត្តិធម៌អន្តរជាតិ (ICJ)តែម្ដង ។ ដោយសារក្នុងពេលថ្មីៗនេះ ស្ថានភាពឈានដល់ចំណុចក្តៅបន្ទាប់ពីមានសកម្មភាពជាបន្តបន្ទាប់របស់ក្រុមជ្រុលនិយមមួយចំនួនតូចបានបំផុសនូវចលនាជាតិនិយម ក្នុងប្រទេសទាំងពីរដែលអាចឈានទៅការប្រឈមមុខដាក់គ្នាសារជាថ្មីនៅពេលខាងមុខ» ។
សម្តេចបានសង្កត់ធ្ងន់សារជាថ្មីម្ដងទៀតថា បើទោះជាកម្ពុជាព្យាយាមដោះស្រាយបញ្ហាព្រំដែនដោយសន្តិវិធីតាមយន្តការបច្ចេកទេស និងច្បាប់អន្តរជាតិក៏ដោយក៏កម្ពុជា នៅរក្សាសិទ្ធិក្នុងការការពារ បូរណភាពទឹកដីរបស់ខ្លួនតាមគ្រប់មធ្យោបាយរួមទាំងការប្រើប្រាស់កងកម្លាំងប្រដាប់អាវុធក្នុងករណីមានការព្យាយាមឈ្លានពានបូរណភាពទឹកដីកម្ពុជា ដោយប្រើប្រាស់កម្លាំងកងទ័ព ។
ក្រោយពេលដែលសម្តេចធិបតី ប្រកាសបែបនេះ សម្តេចតេជោ ហ៊ុន សែន ប្រធានព្រឹទ្ធសភានៅក្នុងនាមជាសា្ថប័ននិតិបញ្ញតិក៏បានបង្ហាញជំហរគាំទ្ររាជរដ្ឋាភិបាលលើចំណាត់ការបញ្ហាព្រំដែន ដែលកើតមានឡើងនៅតំបន់ទាំងបួនខាងលើ ។
សម្តេចតេជោ ហ៊ុន សែន បានចេញសារគាំទ្រនៅលើបណ្តាញសង្គមថា សម្តេចគាំទ្រចំពោះការយកបញ្ហានៅមុំ៣ បញ្ហាប្រាសាទតាមាន់ធំ ប្រាសាទតាមាន់តូច តាក្របី ទៅកាន់តុលាការយុត្តិធម៌អន្តរជាតិ(ICJ) ។ សម្តេចតេជោ បានលើកឡើងថា អនុស្សារណៈយោគយល់គ្នាដែលចុះនៅឆ្នាំ២០០០ ហាក់ទៅមុខមិនរួចដែលបង្កឲ្យមានភាពមិនច្បាស់លាស់រហូតចោទប្រកាន់គ្នា និងជម្លោះប្រដាប់អាវុធច្រើនដងមកហើយ ។
សម្តេចតេជោ បានបន្ថែមថា ប្រសិនភាគីថៃមានចិត្តស្មោះត្រង់ចង់ដោះស្រាយពិតប្រាកដ គួរតែ ឯកភាពដឹកដៃគ្នាទៅឱ្យតុលាការជួយកាត់សេចក្តីតែម្តងមិនចាំបាច់កម្ពុជាប្តឹងនោះទេ ។ រឿងព្រំដែន គឺជារឿងដ៏រសើប ហើយត្រូវបានអ្នកននយោបាយជ្រុលនិយមទាំងនៅកម្ពុជា និងថៃប្រើប្រាស់ ដើម្បីផលប្រយោជន៍នយោបាយរបស់ពួកគេ ។
ដូច្នេះ ការសម្រេចចិត្តនាំយករឿងជម្លោះនេះជាមួយប្រទេសថៃទៅកាន់ ICJ គឺជាជម្រើសមួយដែលត្រូវគាំទ្រយ៉ាងខ្លាំងដោយប្រជាជនកម្ពុជាដែលមិនចង់ឃើញបរទេសឈ្លានពានទឹកដីរបស់ខ្លួនឡើយ ។ ជាមួយគ្នានោះ វាក៏ជាសារបញ្ជាក់ទៅកាន់ភាគីថៃថា កម្ពុជាមានសុចរិតភាព និងភាពស្មោះត្រង់ នៅក្នុងការដោះស្រាយជម្លោះដោយឈរលើគោលការណ៍យុត្តិធម៌ និងច្បាប់អន្តរជាតិជាធំ ។
កម្ពុជាបានប្រកាសហើយថា កម្ពុជាចង់បានព្រំដែនប្រកបដោយសន្តិភាពជាមួយប្រទេសជិតខាង ។ ដូច្នេះ ភាគីថៃក៏ត្រូវតែប្រកាន់យកសន្តិភាពនិយមនៅក្នុងការដោះស្រាយបញ្ហាជាមួយកម្ពុជាដែរ ។ ចំណែកអ្នកជ្រុលនិយមទាំងនៅកម្ពុជា និងថៃ ត្រូវឈប់ជាបន្ទាន់ការដុតបញ្ឆេះជម្លោះព្រំដែននេះពីព្រោះវានឹងធ្វើអោយខាតប្រយោជន៍របស់ប្រទេស និងប្រជាជនទាំងសងខាង ៕
ចែករំលែកព័តមាននេះ