ទីក្រុងកៀវ៖ នៅឯកិច្ចប្រជុំកំពូលក្រុមប្រទេសនៅតំបន់ខាងជើង បាល់ទិច និងអឺរ៉ុបខាងកើតរៀបចំនៅប្រទេសលីទុយអានី,លោកហ្សេឡិនស្គី និងអគ្គលេខាធិការអង្គការណាតូចូលរួមអបអរសាទរអនាគតប្រធានាធិបតីប៉ូឡូញ លោកខារ៉ូល ណារ៉ូស្គី (Karol Nawrocki) ដែលទើបតែជាប់ឆ្នោតថ្មីៗ។…
ទីក្រុងកៀវ៖ នៅឯកិច្ចប្រជុំកំពូលក្រុមប្រទេសនៅតំបន់ខាងជើង បាល់ទិច និងអឺរ៉ុបខាងកើតរៀបចំនៅប្រទេសលីទុយអានី,លោកហ្សេឡិនស្គី និងអគ្គលេខាធិការអង្គការណាតូចូលរួមអបអរសាទរអនាគតប្រធានាធិបតីប៉ូឡូញ លោកខារ៉ូល ណារ៉ូស្គី (Karol Nawrocki) ដែលទើបតែជាប់ឆ្នោតថ្មីៗ។ ប្រមុខណាតូ លោកម៉ាករូតថឺ (Mark Rutte) ថ្លែងថាលោកត្រៀមខ្លួនធ្វើការជិតស្និទ្ធជាមួយប្រធានាធិបតីថ្មីរូបនេះដែលទទួលបានសំឡេងឆ្នោតជាង៥០%។
លទ្ធផលឆ្នោតលើកនេះជាសញ្ញាមិនល្អទេសម្រាប់រដ្ឋាភិបាលប៉ូឡូញក្រោមការដឹកនាំរបស់នាយករដ្ឋមន្ត្រីដូណាល់ទូស (Donald Tusk) ដែលមាននិន្នាការគំាទ្រការធ្វើសមាហរណកម្មជាមួយសហភាពអឺរ៉ុប។ ប្រធានាធិបតីប៉ូឡូញដែលជិតផុតអាណត្តិ លោកឌូដា (Duda) យល់ថាជ័យជម្នះរបស់លោកណារ៉ូស្គីជាការឆ្លុះបញ្ចាំងឱ្យឃើញថាប្រជាជនប៉ូឡូញគាំទ្រឱ្យបន្តអនុវត្តនយោបាយពង្រឹងទំនាក់ទំនងរវាងប៉ូឡូញ និងអាមេរិក ក៏ដូចជាគាំទ្រការពង្រឹងសន្តិសុខជាតិ និងលើកកម្ពស់ការអភិវឌ្ឍនៅក្នុងតំបន់។
តាមពិត លទ្ធផលឆ្នោតនេះពោរពេញដោយការប្រកៀកប្រកិតគ្នាមែនទែនព្រោះបេក្ខជនម្នាក់ទៀតទទួលបានជាង៤៩%។ ដូច្នេះខុសត្រូវគ្នាប្រហែល១%តែប៉ុណ្ណោះ។ នៅប៉ូឡូញ ប្រធានាធិបតីថ្វីដ្បិតមិនកាន់អំណាច ប៉ុន្តែក៏មានសិទ្ធិជំទាស់នឹងការសម្រេចរបស់រដ្ឋសភា និងរដ្ឋាភិបាលផងដែរ។ ហេតុនេះកម្មវិធីនយោបាយរបស់ដូណាល់ទូស (Donald Tusk) អាចនឹងត្រូវលោកណារ៉ូស្គីប្រើសិទ្ធិដើម្បីជំទាស់។
លោកណារ៉ូស្គីជាអ្នកប្រវត្តិសាស្ត្របែបអភិរក្សនិយម និងក៏ជាកីឡាករប្រដាល់ក្រៅអាជីពផងដែរ។ លោកចាត់ទុកលទ្ធផលឆ្នោតនេះជាការធ្វើប្រជាមតិឡើងវិញចំពោះរបបដឹកនាំរបស់លោកដូណាល់ទូសរយៈពេល១៨ខែកន្លងទៅនេះ។ លោកទូសមិនទាន់បានធ្វើអត្ថាធិប្បាយទៅលើលទ្ធផលឆ្នោតនេះទេ។ សារព័ត៌មានក្នុងស្រុកផ្សាយថាលោកត្រៀមថ្លែងសុន្ទរកថានៅម៉ោង៨យប់៕
ចែករំលែកព័តមាននេះ