ខេត្តបាត់ដំបង ៖ «ពេលនេះ ទីផ្សារត្រសក់ហាក់បានហក់ឡើងខ្ពស់គួរសម ដែលមិនធ្លាប់មានកន្លងមក ។ ការប្រមូលផលលើកនេះ ខ្ញុំហាក់ទទួលបានជោគជ័យលើទីផ្សារ បន្ទាប់ពីខ្ញុំបានបរាជ័យខាតឡុងចុងកាលប្រមូលលើកមុន» ។…
ខេត្តបាត់ដំបង ៖ «ពេលនេះ ទីផ្សារត្រសក់ហាក់បានហក់ឡើងខ្ពស់គួរសម ដែលមិនធ្លាប់មានកន្លងមក ។ ការប្រមូលផលលើកនេះ ខ្ញុំហាក់ទទួលបានជោគជ័យលើទីផ្សារ បន្ទាប់ពីខ្ញុំបានបរាជ័យខាតឡុងចុងកាលប្រមូលលើកមុន» ។ នេះជាការលើកឡើងរបស់កសិករម្នាក់ ដែលមានអាជីពជាអ្នកដាំដំណាំត្រសក់រាប់សិបឆ្នាំកន្លងមក ។
កសិករឈ្មោះ ស្រី នាង ហៅចែនាង អាយុ៤៥ឆ្នាំ មានដំណាំត្រសក់លើផ្ទៃដីទំហំ១ហិចតា នៅភូមិអូរតាគី ឃុំអូរតាគី ស្រុកថ្មគោល ដែលពេលនេះគាត់និងស្វាមី ជាមួយនឹងកម្មករប៉ុន្មាននាក់ទៀត បាននិងកំពុងមមារញឹកខ្លាំងប្រមូលផលត្រសក់ចំពេលដែលទីផ្សារបន្លែនេះកំពុងហក់ឡើងខ្លាំងមិនធ្លាប់មាន ។
អ្នកស្រី ស្រី នាង ហៅចែនាង បាននិយាយនៅព្រឹកថ្ងៃទី០៥ មិថុនា នេះដូច្នេះថា «ថ្ងៃនេះ តំលៃត្រសក់លក់បានចន្លោះពី២៥០០រៀល ដល់៣០០០រៀលក្នុង១គីឡូក្រាម ។ ខ្ញុំប្រមូលផលត្រសក់ពេលនេះ លក់បានថ្លៃជាងកាលប្រមូលផល កាលពីចុងខែមេសាកន្លងទៅ» ។ បើតាមកសិកររូបនេះបានប្រាប់ថា កាលពីចុងខែមេសាកន្លងទៅនេះ (វគ្គមុន) តំលៃត្រសក់លក់បានត្រឹម៥០០រៀល ក្នុង១គីឡូក្រាម តែប្រមូលផលលើកនេះ (វគ្គនេះ) លក់បានតម្លៃចន្លោះពី២៥០០រៀល រហូតដល់៣០០០រៀល ។
កសិកររូបនេះបានបញ្ជាក់ដែរថា បន្លែដែលខ្មែរដាំក្នុងស្រុកស្ទើរគ្រប់ប្រភេទ អាចមានតំលៃខ្ពស់ ប្រសិនបើគ្មានបន្លែនាំចូលពីប្រទេសជិតខាង ។ ផ្ទុយទៅវិញ តំលៃបន្លែខ្មែរចុះថោកស្ទើរគ្មានទីផ្សារនៅពេលសំបូរបន្លែងនាំចូលពីប្រទេសក្បែរខាង ធ្វើឲ្យកសិករខ្មែរមួយចំនួនខាតឡុងចុង រហូតក្ស័យទុនជំពាក់ធនាគារស្ទើរវ័ណ្ឌ.កទៀតផង ។
ក្រោមកំដៅថ្ងៃហែង អ្នកស្រី ស្រី នាង និងស្វាមី ជាមួយនឹងកម្មករប្រុស-ស្រីប៉ុនា្មននាក់ទៀត បានបង្ហាញពីសកម្មភាពយ៉ាងមមារញឹកក្នុងការប្រមូលផលត្រសក់ ។ កម្មករខ្លះដើរបេះផ្លែត្រសក់ក្នុងចម្ការដ៏ធំល្វឹងល្វើយ ខណៈម្ចាស់ចម្ការមមារញឹកក្នុងការវេចខ្ចប់ផ្លែត្រសក់ដើម្បីដឹកទៅបោះឲ្យម៉ូយៗនៅឯទីផ្សារ ។
ជាមួយនឹងសកម្មភាពដ៏មមារញឹក ក្រោមដំបូងរោងប្រក់តង់កៅស៊ូតូចមួយ ចែនាង បានឆ្លៀតឆ្លងឆ្លើយជាមួយកោះសន្តិភាពដូច្នេះថា «ទីផ្សារបន្លែឡើងចុះមិនទៀតទាត់ទេ ។ កាលប្រមូលផលខែមុនចំពេលតំលៃត្រសក់ចុះថោកខ្លាំងលក់បានត្រឹម៥០០រៀលក្នុង១គីឡូក្រាម ធ្វើឲ្យខ្ញុំខាតឡុងចុងស្ទើរដាច់ដើម តែប្រមូលផលលើកនេះ ចំពេលទីផ្សារល្អ ប្រហែលជាអាចចំណេញខ្លះ» ។
កសិកររូបនេះក៏បានរៀបរាប់ពីការចំណាយដើមទុនទៅលើការដាំដំណាំត្រសក់នេះដែរថា បច្ចុប្បន្ន គាត់ដាំដំណាំត្រសក់នេះ លើផ្ទៃដីទំហំ១ហិចតា ដែលគាត់បានជួលគេ ។ គាត់ត្រូវចំណាយទុនអស់យ៉ាងតិច៣០លានរៀលសម្រាប់ដាំដុះម្ដង ។ ខ្ទង់ចំណាយនេះ រាប់ចាប់ពីការចាប់ផ្ដើមធ្វើដី (ភ្ជួរ) ទិញពូជ ថ្នាំបាញ់ និងចំណាយលើកម្មករ ចាប់តាំងពីដាំរហូតដល់ប្រមូលផល ។
ដំណាំនេះ យើងត្រូវចំណាយលើសពីមួយខែបន្តិចទើបអាចប្រមូលផលបាន ។ កាលប្រមូលផលវគ្គមុន នៅអំឡុងចុងខែមេសាកន្លងទៅ គាត់ខាតស្ទើរដាច់ដើម ព្រោះត្រសក់លក់បានតំលៃថោក តែចំណាយទុនច្រើន ។ ប៉ុន្តែឆ្នាំនេះ ប្រហែលអាចចំណេញគ្រាន់បើ ព្រោះទីផ្សារត្រសក់នៅមានតំលៃខ្ពស់នៅឡើយ ។
ត្រង់ចំណុចនេះ កសិកររូបនេះ ក៏បានទាញហេតុផលដែរថា បើមិនសូវមានបន្លែនាំចូលពីប្រទេសជិតខាងទេ បន្លែខ្មែរដែលដាំក្នុងស្រុក ស្ទើរគ្រប់ប្រភេទនៅតែអាចរក្សាបានទីផ្សារល្អ ហើយក៏អាចផ្គត់ផ្គង់លើទីផ្សារបានគ្រប់គ្រាន់ដែរ នេះបើតាមគាត់បានកត់សម្គាល់លើទីផ្សារនានានៅក្នុងខេត្តបាត់ដំបងសព្វថ្ងៃ ។ ប៉ុន្តែបើសំបូរបន្លែនាំចូលពីប្រទេសជិតខាងកកកុញច្រើន បន្លែខ្មែរយើងប្រាកដជាចុះថោក វង្វេងរកទីផ្សារមិនឃើញឡើយ ៕
ចែករំលែកព័តមាននេះ