រាជធានីភ្នំពេញ ៖ ភ្ញៀវកំពុងផឹកកាហ្វេសុខៗ ស្រាប់តែមានខ្យល់កន្ត្រាក់ បក់បោកខ្លាំង បណ្ដាលអោយដើមជ្រៃក្រឹម មួយដើម បានបាក់សង្កត់លើ រ៉ឺម៉កប៉ូតូលក់កាហ្វេ និងម៉ូតូកង់បីឥណ្ឌា…
រាជធានីភ្នំពេញ ៖ ភ្ញៀវកំពុងផឹកកាហ្វេសុខៗ ស្រាប់តែមានខ្យល់កន្ត្រាក់ បក់បោកខ្លាំង បណ្ដាលអោយដើមជ្រៃក្រឹម មួយដើម បានបាក់សង្កត់លើ រ៉ឺម៉កប៉ូតូលក់កាហ្វេ និងម៉ូតូកង់បីឥណ្ឌា ធ្វើអោយផ្អើលភ្ញៀវ នាំគ្នារត់គេចចេញ ។
ហេតុការណ៍បាក់ដើមឈើនេះ បង្កការភ្ញាក់ផ្អើលឡើង នាវេលាម៉ោង០៤និង២០នាទីល្ងាចថ្ងៃទី០២ ខែមិថុនា ឆ្នាំ២០២៥នេះ នៅតាមបណ្តោយផ្លូវលេខ ៥៥ ស្ថិតក្នុងសង្កាត់ បឹងរាំង ខណ្ឌដូនពេញ រាជធានីភ្នំពេញ ។
បើតាមប្រភពពីពលរដ្ឋនៅក្បែរកន្លែងកើតហេតុ បានប្រាប់ថា មុនកើតហេតុ គាត់បានអង្គុយលេងនៅខាងមុខផ្ទះរបស់ខ្លួន ខណៈនោះ ក៏មានខ្យល់កន្ត្រាក់ បោកបក់យ៉ាងខ្លាំង ភ្លាមៗ ស្រាប់តែដើមជ្រៃក្រឹម មួយដើមធំ បានទ្រេត បន្តិចម្តងៗ ហើយបាក់សង្កត់លើរ៉ឺម៉កលក់កាហ្វេ និងម៉ូតូកង់បីឥណ្ឌា កំពុងចតកៀនផ្លូវ រងការខូចខាត តែសំណាងល្អ មិនបង្កអោយភ្ញៀវកំពុងអង្គុយផឹកកាហ្វេ ក្រោមដើមឈើនោះ របួសនោះឡើយ ។ ភ្លាមៗ ម្ចាស់ម៉ូតូកង់បីឥណ្ឌា និងម្ចាស់រ៉ឺម៉កកាហ្វេ បាននាំគ្នា អូសយកចេញពីកន្លែងកើតហេតុ ដើម្បីយកជួសជុលខ្លួនឯង ។
បន្ទាប់ពីបាក់ដើមឈើរួច កម្លាំងជំនាញខណ្ឌដូនពេញ បានចុះមកធ្វើការកាត់លះមែកឈើ យកចេញពីលើផ្លូវ កន្លែងដែលបាក់រលំនោះ កុំអោយកកស្ទះចរាចរណ៍ ៕
ចែករំលែកព័តមាននេះ