ទីក្រុងកៀវ៖ គណៈប្រតិភូអ៊ុយក្រែន និងរុស្ស៊ីចាប់ផ្ដើមជួបគ្នាជាលើកទី២នៅទីក្រុងអ៊ីស្តាន់ប៊ូល ប្រទេសតួកគី។ ប៉ុន្តែគេមិនសង្ឃឹមថាកិច្ចជំនួបនេះអាចនឹងសម្រេចបានកិច្ចព្រមព្រៀងសំខាន់ៗនោះទេ។ គណៈប្រតិភូអ៊ុយក្រែនដឹកនាំដោយរដ្ឋមន្ត្រីការពារជាតិ។ ចំណែករុស្ស៊ីដឹកនាំដោយជំនួយការរបស់លោកពូទីន។ ប្រទេសតួកគីដែលជាម្ចាស់ផ្ទះប្រកាសថាកិច្ចជំនួបនឹងចាប់ផ្ដើមនៅម៉ោង១រសៀល។
ប៉ុន្តែអ្នកនាំពាក្យអ៊ុយក្រែនថ្លែងថាកិច្ចជំនួបនេះនឹងចាប់ផ្ដើមនៅពេលថ្ងៃត្រង់។ ដូច្នេះគេមិនទាន់ដឹងថានឹងចាប់ផ្ដើមនៅពេលណាពិតប្រាកដទេ។ តាមរយៈការធ្វើអត្ថាធិប្បាយផ្សេងៗរបស់មន្ត្រីរដ្ឋាភិបាលអ៊ុយក្រែន និងរុស្ស៊ី គេអាចវាយតម្លៃថាភាគីទាំង២និយាយមិនទាន់ត្រូវគ្នាទេនៅក្នុងបញ្ហាសំខាន់ៗ។ ជាពិសេស លក្ខខណ្ឌដែលភាគីទាំង២ទាមទារពីគ្នាទៅវិញទៅមកដើម្បីបង្កើតកិច្ចព្រមព្រៀងសន្តិភាព។
ទន្ទឹមនឹងនោះ សង្គ្រាមបន្តឆាបឆេះយ៉ាងក្ដៅគគុកដើម្បីព្យាយាមកាន់កាប់ទឹកដីអ៊ុយក្រែនឲ្យបានច្រើន។ មានព្រឹត្តិការណ៍ដ៏គួរឱ្យភ្ញាក់ផ្អើលមួយដែលអ៊ុយក្រែនបើកប្រតិបត្តិការវាយប្រហារទៅលើមូលដ្ឋានកងទ័ពអាកាសរបស់រុស្ស៊ីដែលស្ថិតនៅចម្ងាយ៤ពាន់គីឡូម៉ែត្រពីព្រំដែនអ៊ុយក្រែន។ ជាមួយនឹងដ្រូនជាង១រយគ្រឿង អ៊ុយក្រែនអាចបាញ់កម្ទេចយន្តហោះចម្បាំងរបស់រុស្ស៊ីជាង៤០គ្រឿងត្រឹមតែ១ប៉ប្រិចភ្នែកប៉ុណ្ណោះ។
ប្រមុខដឹកនាំអ៊ុយក្រែនថ្លែងថាផែនការវាយប្រហារនេះបានរៀបចំឡើងរយៈពេលជាងមួយឆ្នាំកន្លះដើម្បីជាការសងសឹកទៅលើរុស្ស៊ីដែលបន្តបាញ់ប្រហារទីក្រុងតូច-ធំរបស់អ៊ុយក្រែន។ ប្រភពពីទីភ្នាក់ងារសម្ងាត់អ៊ុយក្រែនបង្ហើបឱ្យដឹងថារុស្ស៊ីខាតបង់លើកនេះគិតជាទឹកប្រាក់ប្រហែល៧ពាន់លានដុល្លារ។ កងទ័ពអាកាសរុស្ស៊ីប្រកាសថានៅក្នុងចំណោមដ្រូនអ៊ុយក្រែនដែលបញ្ជូនទៅវាយប្រហារទីតាំង៨កន្លែងកាលពីយប់មិញ ខ្លួនអាចបាញ់ទម្លាក់បាន១៦២គ្រឿង។
កាលពីយប់មិញ រុស្ស៊ីបន្តវាយប្រហារអ៊ុយក្រែនដោយដ្រូន និងមីស៊ីល។ អ៊ុយក្រែនថាខ្លួនបានបាញ់ទម្លាក់ដ្រូនរបស់រុស្ស៊ីបាន៥២គ្រឿងនៅក្នុងចំណោម៨០គ្រឿង។ មីស៊ីលផ្លោង២គ្រាប់របស់រុស្ស៊ីបាញ់ត្រូវចំអគារស្នាក់នៅរបស់ប្រជាជននៅទីក្រុងខាគីវកាលពីព្រឹកថ្ងៃចន្ទ។ ចំណែក មួយគ្រាប់ទៀតធ្លាក់ក្បែរសាលារៀនមួយកន្លែង។ ទោះជាយ៉ាងណាក្ដីគ្មាននរណាម្នាក់ស្លាប់ ឬរបួសទេ។ នេះបើយោងតាមអភិបាលក្រុងខាគីវ៕
ចែករំលែកព័តមាននេះ