រាជធានីភ្នំពេញ ៖ អាជីវករផ្សារប៉េង អុីម ស្ថិតនៅក្នុងភូមិប្រកា សង្កាត់ព្រៃ ស ខណ្ឌដង្កោ រាជធានីភ្នំពេញ បាននាំគ្នាដុតសំបកកង់រថយន្តនៅលើផ្លូវមុខផ្សារកាលពីវេលាព្រឹកថ្ងៃទី០១…
រាជធានីភ្នំពេញ ៖ អាជីវករផ្សារប៉េង អុីម ស្ថិតនៅក្នុងភូមិប្រកា សង្កាត់ព្រៃ ស ខណ្ឌដង្កោ រាជធានីភ្នំពេញ បាននាំគ្នាដុតសំបកកង់រថយន្តនៅលើផ្លូវមុខផ្សារកាលពីវេលាព្រឹកថ្ងៃទី០១ ខែមិថុនា ឆ្នាំ២០២៥ បង្កឲ្យមានផ្សែងហុយឃ្មួលខ្មាញ់ ដើម្បីធ្វើការទាមទារឲ្យម្ចាស់ផ្សារមួយនេះ ចេញសំណងថ្លៃតូបជូនពួកគាត់វិញ ។ ដោយពួកគាត់អះអាងថា ពួកគាត់ជាអ្នកបោះទន់ឲ្យបង្កើតផ្សារនេះឡើង ហើយក្រោយពីការលក់ដូរបានរយៈពេល២ឆ្នាំមិនទាន់រកចំណូលបានផង ផ្សារក៏បិទទ្វារមិនដំណើរការរហូតមក ហើយត្រូវម្ចាស់ផ្សារចាក់សោតូបមិនឲ្យប្រើប្រាស់ថែមទៀត ។
ចំពោះរឿងនេះក្រុមអាជីវករក៏បានអះអាងថា ពួកគាត់ក៏បានដាក់ពាក្យបណ្ដឹងទៅកាន់លោកអភសន្តិបណ្ឌិត ស សុខា រដ្ឋមន្ត្រីក្រសួងមហាផ្ទៃរួចហើយ កាលពីថ្ងៃទី១២ ខែឧសភា ឆ្នាំ២០២៥ កន្លងទៅនេះ ប៉ុន្តែរហូតដល់ពេលនេះនៅមិនទាន់មានដំណឹងអ្វីនៅឡើយ ។
ក្រុមអាជីវករបាននិយាយថា ផ្សារប៉េង អ៊ុីនេះបានបង្កើតឡើងនៅអំឡុងឆ្នាំ២០២១ ដែលមានតូបសរុបចំនួន៥៤០តូប ដែលមានម្ចាស់ឈ្មោះអុឹង ប៉ស៊ាំង និងអុឹង ប៊ុនប៉េង ប៉ុន្តែដំណើរការបានតែ២ឆ្នាំប៉ុណ្ណោះ គឺនៅអំឡុងឆ្នាំ២០២២ ក៏លែងដំណើរការតទៅទៀត ដែលគឹតរហូតមកដល់ឆ្នាំ២០២៥នេះមានរយៈពេល៣ឆ្នាំហើយ ។ បញ្ហានេះបានធ្វើឲ្យពួកគាត់ដែលជាអាជីវករម្នាក់ៗខាតបង់ប្រាក់រាប់ពាន់ដុល្លារ ទៅលើថ្លៃទិញតូបផង និងខាតបង់ទៅលើថ្លៃទំនិញ និងបង់ភាសុីផងដែរ ហើយម្ចាស់ផ្សារបានចាក់សោតូបឈប់ឲ្យប្រើប្រាស់ និងគំរាមដកហូតយកតូបពីពួកគាត់វិញទៀតផង ។
អាជីវករបាននិយាយបន្តទៀតថា ប្រធានផ្សារបានលើកឡើងទាំងមិនពិតថាពួកគាត់អត់បានបង់ប្រាក់ថ្លៃតូបរយៈពេល៣ខែមកហើយ ដូច្នេះខាងផ្សារត្រូវរឹបអូសយកតូបវិញ ប៉ុន្តែធាតុពិតជាក់ស្ដែងមិនដូច្នេះទេ អាជីវករមួយចំនួនបានទូទាត់ប្រាក់ឲ្យម្ចាស់ផ្សាររួចរាល់តាំងពីដំបូងរួចមកហើយ អត់មានជំពាក់ផ្សារទេ ។ ចំណែកអ្នកខ្លះទៀតមិនទាន់បង់គ្រប់មែន ប៉ុន្តែក៏មិនទាន់គ្រប់រយៈពេល៣ខែ ដល់ពេលត្រូវផ្សាររឹបអូសយកតូបនៅឡើយ ។ ស្រាប់តែពេលនេះម្ចាស់ផ្សាររឹបអូសយកតូបទាំងអស់ ទាំងអ្នកដែលបង់ប្រាក់រួចនិងអ្នកដែលមិនទាន់បង់គ្រប់ ដោយម្ចាស់ផ្សារបានដោះស្លាកចេញអស់ រួចបានបិទទ្វារចាក់សោតាមតូបនីមួយៗលែងឲ្យប្រើប្រាស់តែម្ដង ។
ក្រុមអាជីវករបាននិយាយប្រាប់បន្ថែមទៀតថា ម្ចាស់ផ្សារបានបោកប្រាស់ពួកគាត់ ប៉ុន្តែពួកគាត់គ្មានលទ្ធភាពអ្វីត្រូវតតាំងតវ៉ាជាមួយនោះទេ ពួកគាត់សុំត្រឹមតែឲ្យម្ចាស់ផ្សារខាងលើសងថ្លៃតូបម្នាក់៤,៥០០ដុល្លារមកវិញ ប៉ុណ្ណោះ ហើយអ្វីដែលខាតបង់ក្រៅពីនេះដូចជាថ្លៃទិញអីវាន់និងថ្លៃបង់ភាសុីពួកគាត់មិនគិតឡើយ ។ បើបន្តធ្វើទៀតមានតែការខាតបង់កាន់តែខ្លាំងប៉ុណ្ណោះ ព្រោះម្ចាស់ផ្សារធ្វើអ្វីៗស្រេចតែចិត្ត ចង់បិទផ្សារក៏បិទ ចង់ចល័តអ្នកទិញតូបឲ្យទៅផ្សារទី២ ក៏ស្រេចតែចិត្ត គឺម្ចាស់ផ្សារធ្វើអ្វីៗផ្ទុយពីកុងត្រាទាំងអស់ ។
ពួកគាត់បានបញ្ជាក់ផងដែរថា នៅក្នុងតូប១តម្លៃ៤,៥០០ដុល្លារ ហើយការទិញគឺមានកុងត្រារយៈពេល១០ឆ្នាំ ដែលបានន័យថាពួកគាត់អាចអាស្រ័យផលជាមួយតូបរយៈពេល១០ឆ្នាំ ប៉ុន្តែមិនទាន់បានអីផងបែរជាម្ចាស់ផ្សារធ្វើរឿងបែបនេះដាក់ពួកគាត់ទៅវិញ ។ មិនតែប៉ុណ្ណោម្ចាស់ផ្សារខាងលើមានគំរោងឈូសផ្សារចោល ហើយពួកគាត់គាត់មិនឯកភាពទេ ប៉ុន្តែបើចង់ឈូសចោលមែន សុំឲ្យម្ចាស់ផ្សារសងសំណងដល់ពួកគាត់សិន ព្រោះអាជីវករទាំងអស់បានបោះទន់ឲ្យបង្កើតផ្សារនេះឡើង ដូច្នេះត្រូវតែចេញសំណងដល់ពួកគាត់ឲ្យបានរួចរាល់ជាមុនសិ ហើយចង់ឈូសផ្សារចេញយកទីតាំងនេះទៅធ្វើអ្វីទៀតក៏តាមចិត្តចុះ ។
ដោយឡែកអាជ្ញាធរខណ្ឌដង្កោបាននិយាយថា អាជ្ញាធរបានផ្សះផ្សាជម្លោះនេះចំនួន៦លើករួចមកហើយប៉ុន្តែមិនបានសះជាឬព្រមព្រៀងគ្នាឡើយ ហើយបើនៅតែបែបនេះជម្រើសចុងក្រោយមានតែប្រព័ន្ធតុលាការទេដែលអាចបញ្ចប់វិវាទនេះបាន ៕
ចែករំលែកព័តមាននេះ