ខេត្តកណ្តាល ៖ ជនសង្ស័យម្នាក់ លួចម៉ូតូគេបានហើយ ជិះពីម្ដុំសាលាវិទ្យាល័យសាមគ្គី ក្នុងសង្កាត់បឹងសាឡាង ខណ្ឌទួលគោក រាជធានីភ្នំពេញ មកជួបសមត្ថកិច្ចស្រុកអង្គស្នួល កំពុងល្បាត…
ខេត្តកណ្តាល ៖ ជនសង្ស័យម្នាក់ លួចម៉ូតូគេបានហើយ ជិះពីម្ដុំសាលាវិទ្យាល័យសាមគ្គី ក្នុងសង្កាត់បឹងសាឡាង ខណ្ឌទួលគោក រាជធានីភ្នំពេញ មកជួបសមត្ថកិច្ចស្រុកអង្គស្នួល កំពុងល្បាត ក៏ឃាត់ខ្លួនបាន ខណៈជនសង្ស័យរូបនេះ ក៏ជាមុខសញ្ញាចាស់ ធ្លាប់ជាប់ពន្ធនាគារព្រៃស រយៈពេល០៦ឆ្នាំ ពីបទ លួចមានស្ថានទម្ងន់ទោស (ប្លន់ម៉ូតូ) ។
សមត្ថកិច្ចស្រុកអង្គស្នួល បានឃាត់ខ្លួនជនសង្ស័យរូបនេះ កាលពីវេលាម៉ោង០៦ និង២០នាទីល្ងាចថ្ងៃទី៣១ ខែឧសភា ឆ្នាំ២០២៥ ចំណុចភូមិព្រៃក្រាយ ឃុំព្រៃពួច ស្រុកអង្គស្នួល ខេត្ដកណ្ដាល ។
សមត្ថកិច្ចបានឲ្យដឹងថា ជនសង្ស័យខាងលើមានឈ្មោះ ព្រុំ នុយ ភេទប្រុស អាយុ២៦ឆ្នាំ មុខរបរ មិនពិតប្រាកដ រស់នៅភូមិព្រៃក្រាយ ឃុំព្រៃពួច ស្រុកអង្គស្នួល ខេត្តកណ្ដាល។ ធ្លាបជាប់ពន្ធនាគារនៅមណ្ឌលអប់រំកែប្រែ(ម១)ព្រៃស រយៈពេល០៦ឆ្នាំ ពីបទ.លួចមានស្ថានទម្ងន់ទោស(ប្លន់ម៉ូតូ) និងប្រើប្រាស់គ្រឿងញៀន ជាយូរមកហើយ ។
សមត្ថកិច្ចធ្វើការដកហូតបានវត្ថុតាងចាប់យក ៖
-ម៉ូតូមួយគ្រឿងម៉ាកSuzuki nex ពណ៌ខ្មៅ គ្មានផ្លាកលេខ(ជាមធ្យោបាយដែលជនសង្ស័យធ្វើសកម្មភាពលួចកាច់កបាន)
-ទូរសព្ទដៃមួយគ្រឿងម៉ាក MI ពណ៌ប្រផះ
-ដែកខ្សៀររាងអក្សរតេចំនួន០២ដើម ដែកតាន់ប្រាំបីជ្រុងរៀងអក្សរតេចំនួន០១ ដែកតាន់រៀងសំប៉ែតសម្រាប់កាច់សោកម៉ូតូចំនួន០៥ដើម សរសៃលួសកែច្នៃសម្រាប់ឆ្កឹសមេសោចំនួន០៥សរសៃ នឹងឧបករណ៍សម្រាប់ប្រើប្រាស់គ្រឿងញៀនមួយចំនួន។
សមត្ថកិច្ចបានឲ្យដឹងទៀតថា មុនពេលកើតហេតុកម្លាំងប៉ុស្ដិ៍រដ្ឋបាលព្រៃពួច បានធ្វើការល្បាតក្នុងភូមិសាស្ដ្រនិងតំបន់ងាយរងគ្រោះ ក៏ប្រទះឃើញមុខសញ្ញាជនសង្ស័យម្នាក់ និងម៉ូតូមួយគ្រឿងគួរឲ្យសង្ស័យ។ ភ្លាមនោះ កម្លាំងសមត្ថកិច្ចប៉ុស្តិ៍ព្រៃពួច បានធ្វើការសហការជាមួយកម្លាំងផ្នែកនគរបាលព្រហ្មទណ្ឌ ផ្នែកប្រយុទ្ធប្រឆាំងគ្រឿងញៀន នៃអធិការដ្ឋាននគរបាលស្រុក ធ្វើការឃាត់សួរនាំ នឹងឆែកឆេរក៏ឃើញមានឧបករណ៍សម្រាប់ធ្វើសកម្មភាពកាច់សោ.កម៉ូតូមួយចំនួននៅក្រោមកែបម៉ូតូរបស់ជនសង្ស័យ ភ្លាមនោះកម្លាំងជំនាញក៏បាននាំខ្លួនជនសង្ស័យ រួមទាំងវត្ថុតាងបញ្ជូនទៅអធិការដ្ឋាននគរបាលស្រុកដើម្បីសួរនាំ ។
នៅចំពោះមុខសមត្ថកិច្ចជនសង្ស័យបានឆ្លើយសារភាពថា ខ្លួនបានលួចម៉ូតូមួយគ្រឿងម៉ាកSuzuki nex ពណ៌ខ្មៅមួយគ្រឿងដែលខ្លួនកំពុងជិះ ពីម្ដុំសាលាវិទ្យាល័សាមគ្គី ក្នុងសង្កាត់បឹងសាឡាង ខណ្ឌទួលគោក រាជធានីភ្នំពេញ ហើយបានកាច់ផ្លាកលេខបោះចោលនៅលូទឹកស្អុយម្ដុំស្ទឹងមានជ័យ រួចបានឆ្លើយបន្តទៀតថា ខ្លួនធ្លាបជាប់ពន្ធនាគារនៅមណ្ឌលអប់រំកែប្រែ(ម១)ព្រៃស រយៈពេល០៦ឆ្នាំ ចាប់ពីឆ្នាំ២០១៩ ដល់ឆ្នាំ២០២៥ ក្នុងពីបទ: លួចមានស្ថានទម្ងន់ទោស(ប្លន់ម៉ូតូ) ផងដែរ និងបានបន្តសារភាពថា ខ្លួនបានប្រើប្រាស់ថ្នាំញៀនរយៈពេល០៧ឆ្នាំមកហើយ ។
លុះនៅថ្ងៃទី០១ ខែមិថុនា ឆ្នាំ២០២៥ វេលាម៉ោង០៩ និង ០៥នាទីព្រឹកនេះ ដោយមានបទបញ្ជាពីលោក ឧត្ដមសេនីយ៍ទោ ស្នងការនគរបាលខេត្ដកណ្ដាល និងមានការសម្របសម្រួលពី ឯកឧត្ដម ព្រះរាជអាជ្ញាខេក្ដកណ្ដាល កម្លាំងផ្នែកជំនាញនៃអធិការដ្ឋាននគរបាលស្រុកអង្គស្នួល សហការជាមួយកម្លាំងផ្នែកជំនាញ កម្លាំងប៉ុស្ដិ៍នគរបាលសៀម នៃអធិការដ្ឋាននគរបាលស្រុកកណ្ដាលស្ទឹង បានចុះពិនិត្យទីតាំងផ្ទះជួលរបស់ឈ្មោះ ព្រុំ ស្រីនាង ភេទស្រី អាយុ៣៤ឆ្នាំ នៅភូមិចំបក់ ឃុំសៀមរាប ស្រុកកណ្ដាលស្ទឹង ខេត្ដកណ្ដាល ត្រូវជាបងបង្កើតរបស់ជនសង្ស័យឈ្មោះ ព្រុំ នុយ (ដែលធ្លាប់ស្នាក់នៅជាមួយ)ជាលទ្ធផលនៃការពិនិត្យឆែកឆេរ មិនឃើញមានវត្ថុតាងឬសម្ភារៈផ្សេងៗ ដែលល្មើសច្បាប់ឡើយ ។
បច្ចុប្បន្ន ជនសង្ស័យរួមជាមួយវត្ថុតាង ត្រូវបានសមត្ថកិច្ចជំនាញ នគរបាលស្រុកអង្គស្នួល កំពុងកសាងសំណុំរឿងបញ្ចូនខ្លួនទៅកាន់តុលាការចាត់ការនីតិវិធីច្បាប់ ៕
ចែករំលែកព័តមាននេះ