ខេត្តកណ្ដាល ៖ សំណង់រឹងមួយកន្លែង កំពុងត្រូវបានសាងសង់ឡើង រំលោភលើដីច្រាំងទន្លេមេគង្គ ត្រង់ចំណុចភូមិព្រែកតូច ឃុំព្រែកទម្លាប់ ស្រុកលើកដែក ខេត្តកណ្ដាល ដោយម្ចាស់សំណង់បានបុកគ្រឹះរៀបខឿនចូលដល់ទឹកទន្លេ…
ខេត្តកណ្ដាល ៖ សំណង់រឹងមួយកន្លែង កំពុងត្រូវបានសាងសង់ឡើង រំលោភលើដីច្រាំងទន្លេមេគង្គ ត្រង់ចំណុចភូមិព្រែកតូច ឃុំព្រែកទម្លាប់ ស្រុកលើកដែក ខេត្តកណ្ដាល ដោយម្ចាស់សំណង់បានបុកគ្រឹះរៀបខឿនចូលដល់ទឹកទន្លេ ដើម្បីទប់ដីកុំឲ្យបាក់ស្រុត និងកំពុងបន្តបណ្ដុះសសរឡើង ដើម្បីរៀបធ្វើជាផ្ទះយ៉ាងត្រជាក់ពង អត់មានអ្នកណាហ៊ានដេញទេ ។
ពលរដ្ឋនៅក្បែរទីតាំងនោះ បានឲ្យដឹងថា ម្ចាស់ទីតាំងសំណង់នេះ គឺជាលោក ងី សាវី មេឃុំព្រែកទម្លាប់ ហើយសំណង់នេះគាត់ធ្វើជាផ្ទះលំហែរសម្រាប់សម្រាកកំសាន្តពេលទំនេរពីការងារ។ ពិតជាអ្នកមានអំណាចមែន…អំណាចលុយ…អំណាចម្ចាស់ស្រុក ។
ប៉ុន្តែនៅពេលជួបសម្ភាសន៍ផ្ទាល់ជាមួយអ្នកយកព័ត៌មាន កោះសន្តិភាព លោក ងី សាវី មេឃុំព្រែកទម្លាប់ បានបដិសេធថា សំណង់នេះមិនមែនជារបស់លោកទេ តែជារបស់មិត្តភក្កិលោក ហើយនៅពេលសួរថាតើមិត្តភក្តិនោះជានរណា? ឈ្មោះអ្វី? លោកមេឃុំបែរជាបដិសេធមិនព្រមប្រាប់ ដោយលើកឡើងថា ចង់ដឹងធ្វើអ្វី? នេះបានហៅថាមេឃុំកំពូលអំណាច…ហេ! ហេ!
ជុំវិញការសាងសង់សំណង់ រំលោភលើដីច្រាំងទន្លេចំណីទន្លេនេះ លោក ងី សាវី មេឃុំព្រែកទម្លាប់បានបញ្ជាក់ថា គ្មានអាជ្ញាធរណាមួយហ៊ានចេញច្បាប់អនុញ្ញាតនោះទេ សូម្បីរូបលោកផ្ទាល់ក៏មិនបានអនុញ្ញាតដែរ ប៉ុន្តែលោកក៏មិនបានហាមឃាត់ដែរ ដោយគ្រាន់តែណែនាំឲ្យម្ចាស់សំណង់ ធ្វើយ៉ាងណាកុំឲ្យប៉ះពាល់ដល់ទឹកទន្លេ និងច្រាំងទន្លេ។ ហើយមូលហេតុដែលលោកមិនហាមឃាត់នោះ លោកបានអះអាងថា គ្រាន់តែគេធ្វើជាផ្ទះលំហែប៉ុណ្ណឹង វាពុំមានអ្វីខុសច្បាប់នោះទេ។
ប៉ុន្តែអ្វីដែលសួរឲ្យកត់សម្គាល់នោះ គឺលោកមេឃុំព្រែកទម្លាប់ មិនត្រឹមតែមិនហាមឃាត់គេ កុំឲ្យសង់សំណង់រំលោភដីច្រាំងទន្លេហើយនោះ បែរជាមកគំរាមរកប្ដឹងអ្នកព័ត៌មាន បើសិនហ៊ានផ្សាយព័ត៌មាននេះថែមទៀត តើម្ចាស់សំណង់មួយនេះជានរណា? មានបុណ្យសក្ត័និងអំណាចប៉ុណ្ណា? ទើបអាចធ្វើឲ្យលោកមេឃុំព្រែកទម្លាប់ ហ៊ានចេញមុខការពារដល់ថ្នាក់នេះ…!
ពាក់ព័ន្ធរឿងរ៉ាវមួយនេះ អ្នកយកព័ត៌មាន កោះសន្តិភាព បានព្យាយាមទូរសព្ទ័ទៅលោក ចាប ចាន់វិជ្ជា អភិបាលស្រុកលើកដែកជាច្រើនលើកច្រើនសារ ដើម្បីសុំការបំភ្លឺ ប៉ុន្តែទូរសព្ទ័របស់លោក ខលចូលហើយគ្មានអ្នកទទួលនៅពេលផ្ញើសារតាមប្រព័ន្ធតេឡេក្រាម លោកបានចូលមើលដែរ ប៉ុន្តែមិនឆ្លើយតប…! សង្ស័យខ្លាចអាចម៌ឯងទេដឹង ហេ! ហេ!
គួរបញ្ជាក់ផងដែរថា កាលពីពេលកន្លងទៅ សម្ដេចអគ្គមហាសេនាបតីតេជោ ហ៊ុន សែន កាលនៅជានាយករដ្ឋមន្ត្រី ធ្លាប់បានចេញបទបញ្ជាឲ្យអាជ្ញាធរមូលដ្ឋានគ្រប់ជាន់ថ្នាក់ទាំងអស់ ត្រូវការពារដីសាធារណៈរបស់រដ្ឋ ដូចជាដីបឹងព្រែកទន្លេដីចំណីផ្លូវជាដើម គឺដាច់ខាតមិនឱ្យមានការរំលោភយកពីសំណាក់បុគ្គលណាឡើយ មកដល់ពេលនេះកន្លងទៅច្រើនឆ្នាំដែរហើយ ទំនងជាអាជ្ញាធរស្រុកលើកដែក ភ្លេចបទបញ្ជានេះអស់ហើយមើលទៅ។
ព័ត៌មានបន្ថែមនឹងមានផ្សាយនៅលើកាសែតកោះសន្តិភាព ៕
ចែករំលែកព័តមាននេះ