ទីក្រុង​រ៉ូ​ក្លាវ ៖ Chelsea ក្លាយជា​ក្លិប​ដំបូង​គេ ដែល​ឈ្នះ​ពានរង្វាន់​ក្លិប​បាល់ទាត់​អឺរ៉ុប​ទាំង​៥ បន្ទាប់​ពី​ផ្តួល​ក្រុម Real Betis គ្រង​តំណែង​ជើងឯក​ពានរង្វាន់ UEFA Conference League រដូវ​កាល ២០២៤-២៥ កាលពី​ថ្ងៃ​ទី​២៨ ខែឧសភា ឆ្នាំ​២០២៥​។

ជំនួប​វគ្គ​ផ្តាច់ព្រ័ត្រ​ដែល​ធ្វើ​ឡើង​នៅ​ឯ​កីឡដ្ឋាន Wrocław មាន​មូលដ្ឋាន​នៅ​ទីក្រុង រ៉ូ​ក្លាវ (Wrocław) ប្រទេស​ប៉ូ​ឡូញ ក្រោម​វត្តមាន​អ្នក​ទស្សនា​ផ្ទាល់ ៣៩ ៧៥៤​នាក់ បិទ​បញ្ចប់​ដោយ​ក្រុម​តោ​ខៀវ Chelsea គ្រង​ជើងឯក​ពាន​លំដាប់​ទី​៣​អឺរ៉ុប UEFA Conference League រដូវ​កាល ២០២៤-២៥ បន្ទាប់​ពី​យកឈ្នះ​ក្រុម​តំណាង​អេ​ស្ប៉ា​ញ Real Betis ដោយ​លទ្ធផល ៤​ទល់​នឹង​១​។

ដូច្នេះ​តាម​រយៈ​ការ​ឈ្នះ​ជើងឯក UEFA Conference League រដូវ​កាល ២០២៤-២៥ និង​ជា​លើក​ដំបូង​របស់​ក្លិប Chelsea បាន​ក្លាយជា​ក្លិប​ដំបូង​គេ​ដែល​ឈ្នះ​ពាន​ទ្វីបអឺរ៉ុប​ធំ​ទាំង​៥ រួម​មាន UEFA Champions League (២​លើក​), UEFA Europa League (២​លើក​), UEFA Conference League, UEFA Super Cup (២​លើក​) និង UEFA Cup Winners’ Cup (២​លើក​)​។

សូម​ជម្រាប​ថា ក្រុម​តំណាង​អង់គ្លេស​ចំនួន ៦ នឹង​បាន​កៅអី​ស្វ័យប្រវត្តិ​លេង​វគ្គ​ជម្រុះ​ក្នុង​លី​គ​តែ​មួយ ឬ League Phase ពានរង្វាន់​លំដាប់​ទី​១ UEFA Champions League នៅ​រដូវ​កាល​ក្រោយ រួម​មាន ៖ Liverpool, Arsenal, Manchester City, Chelsea, Newcastle United ដែល​បញ្ចប់​នៅ​ចំណាត់ថ្នាក់​កំពូល​ទាំង​៥ នៃ​លី​គំ​ពូ​ល​អង់គ្លេស Premier League និង​មួយទៀត Tottenham Hotspur ដែល​ជា​ម្ចាស់​ជើងឯក​ពាន​លំដាប់​ទី​២ UEFA Europa League រដូវ​កាល ២០២៤-២៥ ដ្បិត​ពួក​គេ​បាន​បញ្ចប់​នៅ​ចំណាត់ថ្នាក់​ទី​១៧ Premier League យ៉ាងណា​ក៏​ដោយ​៕