រាជធានីភ្នំពេញ ៖ ថៅកែជាជនជាតិចិនម្នាក់ កាលពីថ្ងៃទី២៧ ខែឧសភា ឆ្នាំ២០២៥ កន្លងទៅ បានត្រូវនគរបាលការិយាល័យព្រហ្មទណ្ឌកម្រិតធ្ងន់រាជធានីភ្នំពេញ ចាប់ខ្លួនបញ្ជូនទៅសាលាដំបូង ពាក់ព័ន្ធនឹងករណីប្រើអំពើហិង្សាដោយចេតនា…
រាជធានីភ្នំពេញ ៖ ថៅកែជាជនជាតិចិនម្នាក់ កាលពីថ្ងៃទី២៧ ខែឧសភា ឆ្នាំ២០២៥ កន្លងទៅ បានត្រូវនគរបាលការិយាល័យព្រហ្មទណ្ឌកម្រិតធ្ងន់រាជធានីភ្នំពេញ ចាប់ខ្លួនបញ្ជូនទៅសាលាដំបូង ពាក់ព័ន្ធនឹងករណីប្រើអំពើហិង្សាដោយចេតនា មានស្ថានទម្ងន់ទោស បណ្តាលឲ្យស្លាប់ដល់ជនរងគ្រោះ ។
ជនសង្ស័យឈ្មោះ YUAN BAODONG ភេទប្រុស អាយុ៣២ឆ្នាំ ជាថៅកែគ្រប់គ្រងផ្នែកទឹក-ភ្លើងនៅសណ្ឋាគារអេច ស្ថិតក្នុងសង្កាត់ទន្លេបាសាក់ ខណ្ឌចំការមន ។ អង្គហេតុដែលបណ្តាលឲ្យមានការចាប់ខ្លួនជនសង្ស័យបញ្ជូនទៅសាលាដំបូង ត្រូវបានសមត្ថកិច្ចបង្ហើបឲ្យដឹងថា កាលពីរសៀលថ្ងៃទី២១ ខែឧសភា ឆ្នាំ២០២៥ នៅសណ្ឋាគារអេច បន្ទប់លេខ៨០១ ជននេះ បានប្រើអំពើហិង្សា ដោយយកដំបងដែកទីបវាយជនរងគ្រោះ ជាបុគ្គលិកជនជាតិចិនដូចគ្នា បណ្តាលឲ្យរងរបួសធ្ងន់ ។
លុះនៅពេលដឹកយកទៅមន្ទីរពេទ្យកាល់ម៉ែត ជនរងគ្រោះក៏បានស្លាប់ទៅ ដោយសាររបួសធ្ងន់ពេកមិនអាចជួយសង្គ្រោះបាន ។ ក្រោយកើតមានអំពើហិង្សាធ្វើឱ្យជនរងគ្រោះស្លាប់ សមត្ថកិច្ចនគរបាលព្រហ្មទណ្ឌកម្រិតធ្ងន់ ក្រោមការចង្អុលបង្ហាញពីលោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ និងលោកឧត្តមសេនីយ៍ត្រី ប៊ុន សត្យា ស្នងការរង ទទួលផែននគរបាលព្រហ្មទណ្ឌ និងមានការសហការជាមួយនគរបាលមូលដ្ឋាន បានធ្វើការស្រាវជ្រាវរយៈពេល២ថ្ងៃ ទើបឈានទៅដល់ការឃាត់ខ្លួនជនសង្ស័យពាក់ព័ន្ធនឹងករណីខាងលើនេះ ។
សមត្ថកិច្ចបង្ហើបឲ្យដឹងទៀតថា យោងតាមការបំភ្លឺពីសាក្សីជុំវិញកន្លែងកើតហេតុ និងស្តាប់ចម្លើយសារភាពរបស់ជនសង្ស័យ មានភាពស៊ីសង្វាក់ពាក់ព័ន្ធនឹងបទល្មើសហិង្សាដោយចេតនាមរណភាពជនរងគ្រោះ សមត្ថកិច្ចក៏បានកសាងសំណុំរឿងបញ្ជូនជនសង្ស័យទៅសាលាដំបូងរាជធានីភ្នំពេញតាមនីតិវិធី ៕
ចែករំលែកព័តមាននេះ