ខេត្តព្រះសីហនុ+កំពង់ស្ពឺ ៖ នៅព្រឹកថ្ងៃទី២៨ ខែឧសភា ឆ្នាំ២០២៥ ពលរដ្ឋបានរាយការណ៍ថា ត្រីចិញ្ចឹមក្នុងបែរបស់ប្រជាពលរដ្ឋចាប់ផ្តើមងាប់បន្តទៀត នៅចំណុចព្រែកកំពង់ស្មាច់ ក្នុងឃុំសាមគ្គី ។…
ខេត្តព្រះសីហនុ+កំពង់ស្ពឺ ៖ នៅព្រឹកថ្ងៃទី២៨ ខែឧសភា ឆ្នាំ២០២៥ ពលរដ្ឋបានរាយការណ៍ថា ត្រីចិញ្ចឹមក្នុងបែរបស់ប្រជាពលរដ្ឋចាប់ផ្តើមងាប់បន្តទៀត នៅចំណុចព្រែកកំពង់ស្មាច់ ក្នុងឃុំសាមគ្គី ។ ពួកគាត់អះអាងថា ការងាប់ត្រីនេះគឺមកពីរោងចក្រមួយកន្លែងរបស់ក្រុមហ៊ុន គូប៊ុន(ខេមបូឌា)បាយអូថេកណឡជី(cambodia) Biotechnology co.,ltd មានទីតាំងនៅឃុំសាមគ្គី បានបង្ហូរសំណល់រាវចូលទឹកព្រែកធម្មជាតិ ។
ករណីពុលត្រីងាប់នេះ ក៏មានសេចក្ដីរាយការណ៍ពីខេត្តកំពង់ស្ពឺដែរ នៅរសៀលថ្ងៃទី២៧ ខែឧសភា ឆ្នាំ២០២៥ ដែលត្រីតូចធំក្នុងស្ទឹងព្រែកត្នោតបានពុលងាប់ក្នុងភូមិសាស្ត្រក្រុងច្បារមន និងស្រុកសំរោងទង ។
ចំពោះការពុលត្រីងាប់នៅស្រុកព្រៃនប់ ដែលធ្វើឱ្យមានការភ្ញាក់ផ្អើលនៅពេលនេះ កាលពីថ្ងៃទី២៣ ខែឧសភា ឆ្នាំ២០២៥ ក្រុមការងារដឹកនាំដោយលោក ចេន រ៉េត នាយករងរដ្ឋបាលសាលាខេត្ត ដោយមានការចូលរួមពីមន្ត្រីមន្ទីរ ការិយាល័យពាក់ព័ន្ធ និងអាជ្ញាធរមូលដ្ឋាន បានទៅពិនិត្យជាក់ស្តែងនៅទីតាំងរោងចក្រក្រុមហ៊ុនខាងលើឃើញថា រោងចក្រកំពុងធ្វើឃ្លាំងសម្រាប់ស្តុកនិងត្រាំស្បែកគោ តាមលក្ខណៈបច្ចេកទេស។ រោងចក្របានពុំទាន់កែប្រែចំណុចបង្ហូរចេញពីអាងប្រព្រឹត្តិកម្មតាមការណែនាំ និងបញ្ជាឱ្យកែប្រែ ។ ករណីបង្ហូរសំណល់ចេញពីអាងព្រឹត្តិកម្ម ក៏ពុំទាន់បានសម្អាតតាមស្តង់ដារដើម្បីបង្ហូរចូលព្រែក ។
បំពង់ទុយោទំហំ៤០០មិល្លីម៉ែត្រ ភ្ជាប់ពីអាងប្រព្រឹត្តិកម្មរហូតដល់ព្រែកកំពង់ស្មាច់ មានប្រវែងប្រហែល២គីឡូម៉ែត្រ ក្រុមការងារពិនិត្យឃើញថា រោងចក្រពុំបានធ្វើប្រព្រឹត្តិកម្មសម្អាតសំណល់រាវរបស់ខ្លួនតាមស្តង់ដាបច្ចេកទេសឡើយ ដែលជាហេតុធ្វើឱ្យមានការបំពុលទឹក ប៉ះពាល់ដល់ជីវៈចម្រុះ និងការរស់នៅរបស់ប្រជាពលរដ្ឋ ពិសេសប៉ះពាល់ដល់ការចិញ្ចឹមត្រី ខណៈមានកំណកខ្លាញ់កកអណ្តែតលើផ្ទៃទឹក ។
ក្រុមការងារបានយកសំណាកទឹកក្មុងព្រែកទល់មុខបំពង់ទុយោរោងចក្រចំនួន១,៥លីត្រទៅពិនិត្យនៅមន្ទីរពិសោធន៍នៃក្រសួងបរិស្ថាន ។ នៅព្រឹកថ្ងៃទី២៨ ខែឧសភា ឆ្នាំ២០២៥ ពលរដ្ឋបានបញ្ជាក់ថា ត្រីចិញ្ចឹមរបស់ពួកគាត់បានងាប់ច្រើនជាងពេលកន្លងទៅ គឺងាប់បង្ហើយក្នុងបែចិញ្ចឹមតែម្តង ដែល១ក្បាលៗមានទម្ងន់ពីជាងកន្លះគីឡូក្រាមទៅជិត១គីឡូក្រាម គឺងាប់រាប់តោន ។
លោក ឯម ភា នាយខណ្ឌរដ្ឋបាលជលផលកំពង់សោម ថ្លែងថា នៅថ្ងៃទី២៣ ខែឧសភា ឆ្នាំ២០២៥ ក្រុមការងារបានទៅពិនិត្យឃើញថា ទឹកព្រែកមានពណ៌ខ្មៅ ហើយមានក្លិនស្អុយ បណ្តាលឱ្យត្រីងាប់ប្រមាណចំនួន ២៦ ៦០០ក្បាល ក្នុងនោះ ក៏មានត្រីដែលរដ្ឋបាលខេត្តបានឧបត្ថម្ភដល់កសិករប្រមាណ២ម៉ឺនក្បាលផងដែរ ។ ត្រីដែលងាប់នោះមាន ត្រីឆ្ពង់ចំនួន ១៨៨ក្បាល ទម្ងន់ ៣២៦គីឡូក្រាម ត្រីនៅតាមដងព្រែកមាន ត្រីអណ្តែងប៉ុយ ត្រីកាតង ត្រីកាកឺមបាយ ត្រីត្បក អន្ទង់ក៏មានងាប់មួយចំនួនអណ្តែតតាមដងព្រែក ដែលនាំឱ្យប៉ះពាល់ដល់អេកូឡូស៊ីទាំងស្រុងផងដែរ ។
លោក Li Jinfao តំណាងក្រុមហ៊ុន គូប៊ុន(ខេមបូឌា)បាយអូថេកណឡជី (cambodia) Biotechnology co.,ltd បានប្រាប់ក្រុមការងារថា រោងចក្រមិនទាន់បានដំណើរការនៅឡើយទេ ប៉ុន្តែរោងចក្រកំពុងសាកម៉ាស៊ីន ហើយប្រហែលជាបុគ្គលិកមានការធ្វេសប្រហែស ទើបបណ្តាលឱ្យសំណល់រាវហូរចូលព្រែកបែបនេះ ។
តំណាងក្រុមហុ៊នរូបនេះបដិសេធថា ក្រុមហ៊ុនបានធ្វើតាមការណែនាំរបស់ក្រសួងបរិស្ថាន មិនបានបង្ហូរសំណល់រាវតាមបំពង់បង្ហូរ ដែលបានបង្កប់បង្ហូរចូលព្រែកនោះទេ ។ ក្នុងនាមតំណាងក្រុមហ៊ុន ចំពោះការបំពុលនេះ បានសន្និដ្ឋានថា អាចបណ្តាលមកពីការហូរចូលសំណល់រាវចេញពីអាងប្រព្រឹត្តិកម្មរបស់រោងចក្រ ។
ជាមួយនឹងការឆ្លើយបកស្រាយរបស់តំណាងក្រុមហ៊ុននេះ មិនបានប៉ុន្មានថ្ងៃផង គឺនៅថ្ងៃទី២៨ ខែឧសភា ឆ្នាំ២០២៥ ពលរដ្ឋបានឲ្យដឹងថា ត្រីចាប់ផ្តើមងាប់ជាបន្តទៀត ព្រោះតែរោងចក្រមិនអនុវត្តតាមការណែនាំរបស់ក្រុមការងារ។ ពួកគាត់សួរថា តើការខាតបង់កើតចេញពីការប្រឹងប្រែងចំណាយដើមទុនជាច្រើនយកមកចិញ្ចឹមត្រីនេះ លុះដល់ត្រីងាប់គ្មានសល់ តើអ្នកណាជួយពួកគាត់បាន ?
ចំណែកសេចក្ដីរាយការណ៍ពីខេត្តកំពង់ស្ពឺក៏ឱ្យដឹងដែរថា ត្រីតូចធំបានពុលងាប់នៅក្នុងស្ទឹង
ព្រែកត្នោត មុខវិមានឯករាជ្យ ក្នុងក្រុងច្បារមន កាលពីល្ងាចថ្ងៃទី២៧ ខែឧសភា ឆ្នាំ២០២៥ ។
ពលរដ្ឋម្នាក់និយាយថា ត្រីតូចធំ បានពុលងើបឡើងហែលនៅលើផ្ទៃទឹក ។ ពេលឃើញដូចនោះ ពួកគាត់ក៏នាំគ្នាចុះចាប់ត្រី ខ្លះមានដំបងចាំវាយ ខ្លះទៀតមានមង ខ្លះទៀតមានស្ន ឬច្បូក និងខ្លះទៀតមានកន្ត្រងចាំចូកត្រីយកទៅធ្វើម្ហូប ដែលម្នាក់ៗរកបានត្រីគ្រាន់ធ្វើម្ហូប ។
គាត់បន្តថា ការពុលត្រីតូចធំនេះ ទើបតែកើតមាននៅល្ងាចថ្ងៃទី២៧ ខែឧសភា ឆ្នាំ២០២៥ ដែលសង្ស័យទឹកសំណល់ស្វាយដែលគេបង្ហូរចេញពីរោងចក្រ ឬក្រុមហ៊ុន ចូលមកក្នុងស្ទឹងព្រែកត្នោត ទើបបានជាពុលត្រីទាំងធំទាំងតូចបែបនេះ ហើយបញ្ហានេះ តែងកើតមានរៀងរាល់ឆ្នាំ ខណៈមានភ្លៀងធ្លាក់ ហើយមានទឹកហូរចូលក្នុងព្រែក ។ កាលពីប៉ុន្មានឆ្នាំមុន ស្ទឹងព្រែកត្នោតនៅមុខសួនសម្តេចព្រះសង្ឃរាជ ជួន ណាត ក៏ធ្លាប់មានត្រីពុលងាប់ដែរ ដែលរាល់ពេលធ្លាក់ភ្លៀងម្តងៗ ក្រុមហ៊ុន និងរោងចក្រកែច្នៃស្វាយ តែងតែបង្ហូរសំណល់ចូលស្ទឹង ។
ពលរដ្ឋម្នាក់ទៀតលើកឡើងថា កាលពីថ្ងៃទី២៥ ខែឧសភា ឆ្នាំ២០២៥ នៅម្តុំវត្តតោងហោង ក្នុងឃុំតាំងសំរោង ស្រុកភ្នំស្រួច និងម្តុំស្ពានជប៉ុន ក្នុងភូមិពាមឃ្លៃ ឃុំទំព័រមាស ស្រុកសំរោងទង ក៏មានត្រីពុលក្នុងស្ទឹងព្រែកត្នោតដែរ ។ ពាក់ព័ន្ធនឹងត្រីតូធំពុលក្នុងស្ទឹងព្រែកត្នោតផ្អើលអ្នកស្រុកនេះ មិនទាន់មានអាជ្ញាធរ ឬមន្ត្រីជំនាញនៅក្នុងខេត្តកំពង់ស្ពឺ បញ្ជាក់ពីមូលហេតុអ្វីឱ្យច្បាស់លាស់នៅឡើយទេ៕
ចែករំលែកព័តមាននេះ