លោក Amorim នឹងនាំយកកីឡាករពី ASEAN All Stars ទៅរួមក្រុម Man Utd បើតបតាមការចង់បានរបស់លោក
ទីក្រុងគូឡាឡាំពួរ ៖ លោក Ruben Amorim អ្នកចាត់ការក្រុម Manchester United បានប្រកាសនឹងនាំយកកីឡាករពីក្រុមតារាឆ្នើមតំបន់អាស៊ាន ASEAN…
ទីក្រុងគូឡាឡាំពួរ ៖ លោក Ruben Amorim អ្នកចាត់ការក្រុម Manchester United បានប្រកាសនឹងនាំយកកីឡាករពីក្រុមតារាឆ្នើមតំបន់អាស៊ាន ASEAN All Stars ទៅរួមក្រុមរបស់លោក ប្រសិនបើលោកមើលឃើញថា នរណាម្នាក់មានសមត្ថភាពត្រូវនឹងការចង់បានរបស់លោក។
ថ្លែងក្នុងសន្និសិទសារព័ត៌មាន កាលពីថ្ងៃទី២៧ ខែឧសភា ឆ្នាំ២០២៥ ពោលមុនការប្រកួតមិត្តភាពសប្បុរសធម៌អន្តរជាតិរបស់ក្រុមបិសាចក្រហម Man Utd ទល់នឹងក្រុម ASEAN All Stars ដែលធ្វើឡើងនៅកីឡដ្ឋានជាតិ Bukit Jalil ក្នុងទីក្រុងគូឡាឡាំពួរ ប្រទេសម៉ាឡេស៊ី នៅវេលាម៉ោង៧:៤៥នាទីយប់នេះ (ម៉ោងនៅកម្ពុជា) លោក Ruben Amorim បានផ្តល់ចម្លើយពាក់ព័ន្ធនឹងការដោះដូរកីឡាករក្នុងក្រុមរបស់លោក ត្រៀមសម្រាប់ការប្រកួតរដូវកាលក្រោយ។
គ្រូបង្វឹកសញ្ជាតិព័រទុយហ្គាល់វ័យ៤០ឆាំ្នរូបនេះ បានរំលេចពីការបើកទ្វារនាំយកកីឡាករពីក្រុម ASEAN All Stars យ៉ាងដូច្នេះថា «យើងចង់បានកីឡាករល្អបំផុតក្នុងពិភពលោក។ ប្រសិនបើខ្ញុំឃើញនរណាម្នាក់ [ពីក្រុម ASEAN All Stars] ដោយមានសមត្ថភាពគ្រប់គ្រាន់ កីឡាកររូបនោះអាចស្ថិតក្នុងបញ្ជីរបស់យើង! មិនថាក្នុងតំបន់ទេ អ្នកទាំងអស់គ្នាមានឱកាស ប្រសិនបើអ្នកបង្ហាញទម្រង់លេងបាន [ទម្រង់លេងដ៏ល្អ] អ្នកគឺជាកីឡាករល្អបំផុតក្នុងពិភពលោកហើយ!»។
បន្ទាប់ពីចប់ការប្រកួតមិត្តភាពសប្បុរសធម៌អន្តរជាតិទល់នឹងក្រុម ASEAN All Stars ហើយ Man Utd នឹងមានការប្រកួតមិត្តភាពអន្តរជាតិមួយទៀតតទល់នឹងក្រុមជម្រើសជាតិហុងកុង នៅថ្ងៃទី៣០ ខែឧសភា ខាងមុខ នៅកីឡដ្ឋានទីក្រុងហុងកុងផ្ទាល់តែម្តង។ ខណៈការប្រកួតមិត្តភាពទាំងពីរនេះ ជាប្រកួតដ៏សំខាន់សម្រាប់លោក Ruben Amorim ដើម្បីតេស្តសមត្ថភាពកីឡាកររបស់លោក ពិសេសផ្តោតយុវជនតែម្តង ដែលជាកូនសោដ៏សំខាន់ក្នុងផែនការសម្រាប់ទីផ្សារដោះដូរកីឡាករដែលនឹងបើកទ្វារនៅចុងសប្តាហ៍នេះ។
សូមជម្រាបជូនថា កីឡាករ កាន់ ម៉ូ និងកីឡាករ Abdel Kader Coulibaly សមាជិកក្រុមជម្រើសជាតិកម្ពុជា ក៏បានចូលរួមជាមួយក្រុម ASEAN All Stars ប្រកួតតទល់នឹងក្រុម Man Utd ផងដែរ។ សមាជិកក្រុមជម្រើសជាតិកម្ពុជា ខ្សែការពារ កាន់ ម៉ូ របស់ក្លិបវិសាខា និងខ្សែប្រយុទ្ធ Kader របស់ក្លិបអង្គរថាយហ្គឺរ ស្ថិតនៅក្នុងចំណោមកីឡាករឆ្នើម តំបន់អាស៊ានសរុបចំនួន២៦នាក់មកពីប្រទេសកម្ពុជា ថៃ វៀតណាម ឥណ្ឌូណេស៊ី ឡាវម៉ាឡេស៊ី ហ្វីលីពីន អូស្ត្រាលី សិង្ហបុរី មីយ៉ាន់ម៉ា និង ទីម័រខាងកើត ដែលត្រូវបានជ្រើសរើសដោយលោក Kim Sang-sik បច្ចុប្បន្នជាគ្រូបង្វឹកក្រុមជម្រើសជាតិវៀតណាម និងជាអ្នកទទួលភារកិច្ចដឹកនាំក្រុម ASEAN All Stars ប្រកួតមិត្តភាពសប្បុរសធម៌អន្តរជាតិដ៏សំខាន់នេះ។
ក្រៅពី កាន់ ម៉ូ និង Kader កីឡាករប្រកបអាជីពនៅលីគកំពូលកម្ពុជា២រូបផ្សេងទៀត គឺខ្សែប្រយុទ្ធឡាវ Bounphachan Bounkong របស់ក្លិបព្រះខ័នរាជស្វាយរៀង និងខ្សែប្រយុទ្ធទីម័រខាងកើត João Pedro របស់ក្លិបអង្គរថាយហ្គឺរ ក៏ត្រូវបានជ្រើសរើសដោយគ្រូបង្វឹកជនជាតិកូរ៉េខាងត្បូងផងដែរ៕ ប្រភព ៖ Manchester Evening News និង Seasia goal
ចែករំលែកព័តមាននេះ