រាជធានីភ្នំពេញ ៖ ស.ពកងកម្លាំងរក្សាសន្តិភាពកម្ពុជា២រូប ដែលបានធ្វើពលិកម្មក្នុងពេលបំពេញបេសកកម្ម របស់អង្គការសហប្រជាជាតិ នៅសាធារណរដ្ឋស៊ូដង់ខាងត្បូង ត្រូវបានដឹកត្រឡប់មកដល់ប្រទេសកម្ពុជាហើយ នៅល្ងាចថ្ងៃទី២៦ ខែឧសភា ឆ្នាំ២០២៥នេះ…
រាជធានីភ្នំពេញ ៖ ស.ពកងកម្លាំងរក្សាសន្តិភាពកម្ពុជា២រូប ដែលបានធ្វើពលិកម្មក្នុងពេលបំពេញបេសកកម្ម របស់អង្គការសហប្រជាជាតិ នៅសាធារណរដ្ឋស៊ូដង់ខាងត្បូង ត្រូវបានដឹកត្រឡប់មកដល់ប្រទេសកម្ពុជាហើយ នៅល្ងាចថ្ងៃទី២៦ ខែឧសភា ឆ្នាំ២០២៥នេះ ដើម្បីរៀបចំធ្វើបុណ្យតាមប្រពៃណី ។
នាយឧត្តមសេនីយ៍ ឈុំ សុជាត អ្នកនាំពាក្យ ក្រសួងការពារជាតិ បានលើកឡើងបណ្តាញសង្គមនៅយប់ថ្ងៃទី២៦ ឧសភា ឆ្នាំ២០២៥
ពិធីទទួលស.ពយោធិនទាំង២រូប បានប្រព្រឹត្តទៅនៅព្រលានយន្តហោះអន្តរជាតិភ្នំពេញ ក្រោមអធិបតីភាព ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មាធិការជាតិ ដោយមានការចូលរួមពីថ្នាក់ដឹកនាំក្រសួងការពារជាតិ នាយទាហាន នាយទាហានរង និងពលទាហាន នៃបណ្ដាប្រភេទទ័ព និងក្រុមគ្រួសារ នៃស.ព ផងដែរ ។
ស.ពនាយទាហានកម្ពុជាទាំង២រូបនោះ រួមមាន៖ ទី១៖ អនុសេនីយ៍ឯក ដួង ម៉ាហ្គាលី និងទី២ ៖ អនុសេនីយ៍ទោ ផាត មុន្នី ។ ពិធីគោរពវិញ្ញាណក្ខន្ធ អនុសេនីយ៍ឯក ដួង ម៉ាហ្គាលី នឹងត្រូវធ្វើឡើងនៅវត្តជម្ពូវ័ន ស្ថិតក្នុងសង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។ ចំណែកពិធីគោរពវិញ្ញាណក្ខន្ធ អនុសេនីយ៍ទោ ផាត មុន្នី នឹងធ្វើឡើងនៅវត្តសីសទីបមូលីយារាម ហៅវត្តក្បាលកោះ ស្ថិតក្នុងសង្កាត់កោះឧញ៉ាតី ក្រុងអរិយក្សត្រ ខេត្តកណ្តាល ។
កងកម្លាំងមួកខៀវទាំង២រូប បានពលីកាលពីថ្ងៃទី១៣ ខែឧសភា ឆ្នាំ២០២៥ ក្នុងពេលបំពេញបេសកកម្មក្រោមឆត្រអង្គការសហប្រជាជាតិ នៅម៉ាឡាកាល់ ប្រទេសស៊ូដង់ខាងត្បួង ។
ក្នុងនាមអ្នកនាំពាក្យក្រសួងការពារជាតិ ខ្ញុំសូមចូលរួមរំលែកទុក្ខ និងសោកស្តាយចំពោះការបាត់បង់យោធិនទាំង០២រូប ដែលនេះជាការបាត់បង់យោធិនដ៏ឆ្នើម ដែលបានធ្វើពលិកម្ម ដើម្បីបុព្វហេតុជាតិមាតុភូមិ និងថែរក្សាសន្តិភាពពិភពលោករបស់សហប្រជាជាតិ ៕
ចែករំលែកព័តមាននេះ