រាជធានីភ្នំពេញ ៖ រថយន្តMERCEDES ១គ្រឿងបើកបរដោយយុវជនម្នាក់ខណៈកំពុងបើកបរក្នុងល្បឿនលឿន ស្រាប់តែរេចង្កូតជ្រុលទៅបុករះម៉ូតូអ្នកដំណើរតាមផ្លូវ និងកន្លែងដូរនៅតាមចិញ្ចើមផ្លូវមុខរោងចក្រមួយកន្លែង បណ្តាលឲ្យមានមនុស្សបុរស និងស្រីចំនួន៨នាក់រងរបួសធ្ងន់និងស្រាល ។ មិនតែប៉ុណ្ណោះ…
រាជធានីភ្នំពេញ ៖ រថយន្តMERCEDES ១គ្រឿងបើកបរដោយយុវជនម្នាក់ខណៈកំពុងបើកបរក្នុងល្បឿនលឿន ស្រាប់តែរេចង្កូតជ្រុលទៅបុករះម៉ូតូអ្នកដំណើរតាមផ្លូវ និងកន្លែងដូរនៅតាមចិញ្ចើមផ្លូវមុខរោងចក្រមួយកន្លែង បណ្តាលឲ្យមានមនុស្សបុរស និងស្រីចំនួន៨នាក់រងរបួសធ្ងន់និងស្រាល ។ មិនតែប៉ុណ្ណោះ បណ្ដាលសម្ភារៈលក់ដូរផ្សេងៗជាច្រើនទៀតបានរងការខូចខាត ចំណែករថយន្តនោះក៏បានរងការខូចខាតមុខផងដែរ ហើយយុវជនដែលជាអ្នកបើកបររថយន្តខាងលើនោះបានប្រាប់នគរបាលថា ខ្លួនភាំងស្មារតីក្នុងពេលកំពុងបើកបរ ក៏ជួបគ្រោះថ្នាក់បែបនេះតែម្ដង ។
ឧប្បត្តិហេតុនោះបានកើតឡើងកាលពីវេលាម៉ោង ៥និង៤០នាទីព្រឹកថ្ងៃទី២៧ ខែឧសភា ឆ្នាំ២០២៥ នៅត្រង់ចំណុចមុខរោងចក្រមួយកន្លែង ស្ថិតនៅតាមផ្លូវបេតុងព្រៃស ក្នុងភូមិថ្មី សង្កាត់ដង្កោ ខណ្ឌដង្កោ រាជធានីភ្នំពេញ ។
រថយន្តបង្កខាងលើនោះម៉ាក Mercedes C300 4Matic ពណ៌ស ពាក់ផ្លាកលេខ កម្ពុជា R.PANHAA បើកបរដោយយុវជនម្នាក់ឈ្មោះរតនៈ បញ្ញា អាយុជាង២០ឆ្នាំ ។ ស្នាក់នៅម្ដុំសន្ធរម៉ុក ខណ្ឌទួលគោក រាជធានីភ្នំពេញ ដោយឡែកអ្នករងរបួសគឺជាអ្នកដំណើរ និងអ្នកលក់ដូរនៅចំណុចកើតហេតុខាងលើនោះ ។
សមត្ថកិច្ចបានប្រាប់ថា នៅមុនពេលកើតហេតុយុវជនខាងលើបានបើករថយន្តម៉ាក mercedes ១គ្រឿងនោះតាមផ្លូវបេតុងព្រៃ ស ធ្វើដំណើរក្នុងទិសដៅពីកើតទៅលិច ក្នុងល្បឿនលឿន ។ លុះពេលទៅដល់ត្រង់ចំណុចកើតហេតុដែលមានមនុស្សច្រើនមានទាំងអ្នកដំណើរ កម្មករ និងអ្នកលក់ដូរ រថយន្តនេះពុំបានបន្ថយល្បឿននោះឡើយហើយក៏ស្រាប់តែរេចង្កូតទៅបុកម៉ូតូអ្នកដំណើរចំនួន៣គ្រឿង បណ្ដាលឲ្យដួលរងរបួស ។ បន្ទាប់មកនៅមិនព្រមឈប់ឡើយ ក៏បានបន្តទៅបុកអ្នកលក់ដូរតាមរទេះរួមមានអ្នកលក់ភេសជ្ជៈ លក់គុយទាវ មីឆា បាយឆា នំបុ័ងសាច់ និងនំបញ្ចុក ដែលកំពុងនាំគ្នាលក់ដូរនៅមុខរោងចក្រនោះ ជាបន្តបន្ទាប់ ។ ខណៈនោះបានបណ្ដាលឲ្យរងការខូចខាតអស់នួចំន៦គ្រឿងទៀត ទើបរថយន្តឈប់ស្ងៀម និងបានបណ្ដាលឲ្យមានអ្នករងរបួសនៅក្នុងឧប្បត្តិហេតុនេះសរុបចំនួន៨នាក់ ។
ប្រភពដដែលបានប្រាប់ឲ្យដឹងបន្តទៀតថា ក្រោយពេលកើតហេតុអ្នករងរបួសត្រូវបានរថយន្តមន្ទីរពេទ្យបង្អែកដង្កោដឹកបញ្ជូនទៅសង្គ្រោះនៅមន្ទីរពេទ្យ ចំណែកយុវជនដែលជាអ្នកបើកបររថយន្តខាងលើត្រូវបាននគរបាលឃាត់នាំទៅកាន់ប៉ុស្តិ៍ដង្កោ ដើម្បីធ្វើការសាកសួរ ។ បន្ទាប់មកនគរបាលបានធ្វើការវាស់វែងរួចនាំយករថយន្តខាងលើ រួមជាមួយម៉ូតូព្រមទាំងរទេះលក់ដូរទៅរក្សាទុកនៅអធិការនគរបាលខណ្ឌដង្កោរង់ចាំធ្វើការដោះស្រាយតាមនិតិវិធីច្បាប់ នៅពេលក្រោយ ។
យុវជនដែលជាអ្នកបើកបររថយន្តខាងលើនោះបានប្រាប់នគរបាលថា នៅមុនពេលកើតហេតុខ្លួនបានបើករថយន្តចេញពីសន្ធរម៉ុក ខណ្ឌទួលគោក រាជធានីភ្នំពេញ ក្នុងបំណងទៅលេងផ្ទះបងប្អូន ។ ប៉ុន្តែមិនបានប្រាប់ថាផ្ទះបងប្អូននៅឯណាទេ លុះពេលទៅដល់ត្រង់ចំណុចកើតហេតុពុំដឹងថាយ៉ាងម៉េចនោះទេ ស្រាប់តែភាំងស្មារតី ហើយក៏បានបង្កឲ្យមានគ្រោះថ្នាក់បែបនេះតែម្ដងទៅ ៕
ចែករំលែកព័តមាននេះ