ទីក្រុងវ៉ាស៊ីនតោន៖ ត្រាំខឹងសម្បារនឹងពូទីនយ៉ាងខ្លាំងដែលបន្តសង្គ្រាមដ៏បង្ហូរឈាមនៅអ៊ុយក្រែនមិនចេះចប់មិនចេះហើយ ហើយបដិសេធមិនទទួលយកបទឈប់បាញ់។ លើកនេះ លោកត្រាំពន្លះលោកពូទីនយ៉ាងចាស់ដៃរហូតដល់ថ្នាក់ចាត់ទុកថាមេដឹកនាំរុស្ស៊ីកាន់តែឆ្កួតមែនទែនហើយ។ ត្រាំថាគាត់កំពុងពិចាណាដាក់ទណ្ឌកម្មរុស្ស៊ីបន្ថែមទៀតផងដែរពីលើទណ្ឌកម្មដែលមានស្រាប់។
ទន្ទឹមនឹងនោះ លោកត្រាំក៏ឆ្លៀតរិះគន់លោកហ្សេឡិនស្គីផងដែរ។ លោកបង្ហោះសារនៅលើបណ្ដាញសង្គមដូចខាងលើនេះនៅពេលប្រជាជនអ៊ុយក្រែនកំពុងគេងលក់នៅក្នុងដំណេកស្រាប់តែរុស្ស៊ីបន្តវាយប្រហារតាមអាកាសដ៏ខ្លាំងក្លាក្លាអស់រយៈពេលបីយប់ជាប់គ្នា។ កងទ័ពអាកាសអ៊ុយក្រែនថ្លែងថារុស្ស៊ីវាយប្រហារបញ្ជូនដ្រូន៣៥៥គ្រឿង និងមីស៊ីល៩គ្រាប់ទៅវាយប្រហារអ៊ុយក្រែនកាលពីយប់មិញ។
លោកត្រាំថ្លែងថាដូចគាត់និយាយតាំងពីយូរមកហើយថាលោកពូទីនចង់បានទឹកដីអ៊ុយក្រែនទាំងមូល។ ដូច្នេះគាត់មិនមែនចង់បានត្រឹមតែមួយចំណែកនោះទេ។ ត្រាំថាពាក្យសម្ដីដែលគាត់និយាយនោះកំពុងក្លាយជាការពិតហើយ។ ប៉ុន្តែត្រាំព្រមានថាបើពូទីនហ៊ានធ្វើដល់ថ្នាក់នេះ (ចង់បានដីអ៊ុយក្រែនទាំងមូល) ប្រទេសរុស្ស៊ីត្រូវតែដួលរលំ។
អស់ពីរិះគន់លោកពូទីន លោកត្រាំក៏ងាកទៅរិះគន់លោកហ្សេឡិនស្គីវិញម្ដង។ លោកថាមេដឹកនាំអ៊ុយក្រែនរូបនេះបើនៅតែបន្តអនុវត្តនយោបាយដូចសព្វថ្ងៃនេះ គាត់ពិតជាមិនអាចជួយប្រទេសជាតិរបស់គាត់បានឡើយ។ ពាក្យសម្ដីដែលគាត់និយាយចេញមកបង្កតែបញ្ហាជារៀងរហូត។ ត្រាំថាគាត់មិនចូលចិត្តពាក្យសម្ដីទាំងនោះទេ។ បើឈប់បានគួរតែឈប់ទៅ។
អ្នកសារព័ត៌មានបានទាក់ទងទៅវិមានក្រឹមឡាំងដើម្បីធ្វើអត្ថាធិប្បាយទៅលើពាក្យសម្ដីរបស់លោកត្រាំដែលថាលោកពូទីនកាន់តែឆ្កួតមែនទែនហើយ។ វិមានក្រឹមឡាំងមិនបានឆ្លើយតបដោយត្រង់ៗទេ។ ក្រឹមឡាំងសូមអំណរគុណលោកត្រាំ និងប្រជាជនអាមេរិកដែលខិតខំចរចាគ្នា។ ប៉ុន្តែក្រឹមឡាំងយល់ថាលោកត្រាំហាក់ដូចជាប្រើប្រាស់អារម្មណ៍ជ្រុលពេកហើយ។
កងទ័ពអាកាសអ៊ុយក្រែនអះអាងថារុស្ស៊ីវាយប្រហារទីតាំង៥កន្លែងកាលពីយប់មិញ។ នៅតំបន់អូដេសា (Odesa) រុស្ស៊ីបាញ់ប្រហារបណ្ដាលឱុ្យរបួសកុមារម្នាក់អាយុ១៤ឆ្នាំ។ ចំណែកនៅភាគខាងលិច មន្ត្រីថ្នាក់មូលដ្ឋានអះអាងថាផ្ទះរបស់អ្នកស្រុក និងរោងចក្របានរងការខូចខាត។ វិមានក្រឹមឡាំងថ្លែងថាការមូលហេតុដែលខ្លួនចេះតែវាយប្រហារអ៊ុយក្រែនព្រោះអ៊ុយក្រែនចូលចិត្តវាយប្រហារទីតាំងជនស៊ីវិលនៅប្រទេសរុស្ស៊ី។
ក្រោយពេលលោកត្រាំបង្ហោះសារដូចខាងលើនេះ លោកហ្សេឡិនស្គីមិនបានឆ្លើយតបដោយត្រង់ៗទេ។ លោកនិយាយដោយប្រយោលថាពិភពលោកហាក់ដូចជាខិតខំនិយាយបញ្ចុះបញ្ចូលលោកពូទីនច្រើនពេកហើយ ហើយគួរតែខិតខំដាក់សម្ពាធលោកពូទីនវិញល្អជាង។ លោកយល់ថាបើចង់ដោះស្រាយបញ្ហាជាមួយរុស្ស៊ីគឺដោះស្រាយដោយប្រើប្រាស់កម្លាំងគាបសង្កត់។ ជាថ្មីម្ដងទៀត លោកហ្សេឡិនស្គីអំពាវនាវឱ្យក្រុមសម្ព័ន្ធមិត្តដាក់ទណ្ឌកម្មរុស្ស៊ីបន្ថែមទៀត៕
ចែករំលែកព័តមាននេះ