រាជធានីភ្នំពេញ ៖ កីឡាករថ្នាលកម្ពុជារិទ្ធី គីងកុង និងគឿម សុវណ្ណឃីម កាន់តែធ្វើឱ្យអ្នកស្នេហាវិស័យកីឡាប្រដាល់គុនខ្មែរមានការភ្ញាក់ផ្អើលយ៉ាងខ្លាំង បន្ទាប់ពីដំណើរបេសកកម្មទៅប្រកួតដណ្ដើមខ្សែក្រវាត់នៅប្រទេសជប៉ុនជាលើកទី១របស់ពួកគេទទួលបានជោគជ័យយ៉ាងធំធេង ដោយបាននាំមកជាមួយនូវតំណែងជាម្ចាស់ខ្សែក្រវាត់ត្រឡប់មកមាតុភូមិវិញកាលពីថ្ងៃទី២៥ ខែឧសភា…
រាជធានីភ្នំពេញ ៖ កីឡាករថ្នាលកម្ពុជារិទ្ធី គីងកុង និងគឿម សុវណ្ណឃីម កាន់តែធ្វើឱ្យអ្នកស្នេហាវិស័យកីឡាប្រដាល់គុនខ្មែរមានការភ្ញាក់ផ្អើលយ៉ាងខ្លាំង បន្ទាប់ពីដំណើរបេសកកម្មទៅប្រកួតដណ្ដើមខ្សែក្រវាត់នៅប្រទេសជប៉ុនជាលើកទី១របស់ពួកគេទទួលបានជោគជ័យយ៉ាងធំធេង ដោយបាននាំមកជាមួយនូវតំណែងជាម្ចាស់ខ្សែក្រវាត់ត្រឡប់មកមាតុភូមិវិញកាលពីថ្ងៃទី២៥ ខែឧសភា ឆ្នាំ២០២៥។
សម្រាប់ការប្រកួតលើកនេះ កីឡាករជើងខ្លាំងវ័យក្មេងរិទ្ធី គីងកុង ត្រូវប៉ះជាមួយកីឡាករថ្នាលរបស់ប្រទេសជប៉ុនឈ្មោះMEISIN MAHARAក្នុងប្រភេទទម្ងន់២៥គីឡូក្រាម ដែលជាការប្រកួតដណ្ដើមខ្សែក្រវាត់។ វាជារឿងធ្វើឱ្យមហាជនមានការភ្ញាក់ផ្អើលយ៉ាងខ្លាំងបន្ទាប់ពីគេឃើញរិទ្ធី គីងកុង បានចំណាយពេលត្រឹមតែ២ទឹកប៉ុណ្ណោះក្នុងការផ្ដួលកីឡាករជើងខ្លាំងជប៉ុនឱ្យបោះបង់ការប្រកួតក្លាយជាម្ចាស់ខ្សែក្រវាត់លំដាប់អន្តរជាតិលើកដំបូងបង្អស់នៅក្នុងអាជីពជាអ្នកប្រដាល់របស់គេ។
ចាប់តាំងពីចូលប្រឡូកនៅក្នុងអាជីពជាអ្នកប្រដាល់គុនខ្មែរ កីឡាករដែលទើបតែមានវ័យ៩ឆ្នាំរូបនេះមានស្ថិតិប្រកួតចំនួន១៤លើក ឈ្នះទាំង១៤លើក និងធ្លាប់វាយគូប្រកួតឱ្យបោះបង់ការប្រកួតចំនួន១២លើក ។ នៅពេលនេះ កីឡាកររិទ្ធី គីងកុងត្រូវបានជាប់ឈ្មោះក្នុងប្រវត្តិសាស្ត្រជាកីឡាករវ័យក្មេងបំផុតរបស់កម្ពុជាដែលដណ្ដើមបានខ្សែក្រវាត់នៅក្រៅប្រទេស ។ គេកំពុងតែធ្វើឱ្យមានការចាប់អារម្មណ៍យ៉ាងខ្លាំងក្នុងការផ្សព្វផ្សាយវិស័យកីឡាប្រដាល់គុនខ្មែរនៅលើឆាកអន្តរជាតិ។
ចំណែកកីឡាករ គឿម សុវណ្ណឃីម ក៏មិនអន់ជាងកីឡាកររិទ្ធី គីងកុង ប៉ុន្មានដែរ ដោយគេចំណាយត្រឹមតែ៣ទឹកប៉ុណ្ណោះក៏អាចវាយផ្ដួលកីឡាករជប៉ុនATSUSHI TAKAYAMAឱ្យបោះបង់ការប្រកួតទាំងមិនអស់ចិត្ត។
ទោះជាយ៉ាងណា គឿម សុវណ្ណឃីម ឱ្យបោះបង់ការប្រកួតទាំងមិនអស់ចិត្ត ។ ការប្រកួតក្នុងទឹកទី១ស្ថិតក្នុងភាពប្រដំប្រសងគ្នា លុះចូលដល់ទឹកទី២ គឿម សុវណ្ណឃីម បានបុកជង្គង់ទៅលើពោះទឹកគូប្រកួតផ្ទួនៗធ្វើឱ្យកីឡាករជប៉ុនដួលត្រូវអាជ្ញាកណ្ដាលរាប់ និងបានក្រោកឡើងប្រកួតបន្តទៀតទាំងត្រដាបត្រដួសបំផុត ។ ចូលដល់ទឹកទី៣ មិនបង្អង់យូរគឿម សុវណ្ណឃីមបាបព្យាយាមបញ្ជូនស្នៀតកណ្ដាប់ដៃវាយសន្ធាប់និងបុកជង្គង់ចូលពោះទឹកកីឡាករTAKAYAMAផ្ទួនៗរហូតដល់ថ្នាក់តដៃលែងរួចត្រូវលោកអាជ្ញាកណ្ដាលបញ្ឈប់ការប្រកួតតែម្ដង។
គឿម សុវណ្ណឃីម បានក្លាយជាម្ចាស់ខ្សែក្រវាត់ និងជាម្ចាស់ពានរង្វាន់តំណាងឱ្យកីឡាករថ្នាលកម្ពុជាចំនួន៣នាក់ផ្សេងទៀត មានដូចជា កីឡាកររិទ្ធី លីហួរ ឈ្នះកីឡាករជប៉ុនTAIGA OTAនៅត្រឹមទឹកទី១ កីឡាកររិទ្ធី សុធារិន្ទ ឈ្នះកីឡាករថៃRENTO MATSUDAដោយពិន្ទុ និងកីឡាកររិទ្ធី ចាន់បូរិន ឈ្នះកីឡាករជប៉ុន REO NOMURAដោយពិន្ទុ។
សរុបសេចក្ដីទៅ ដំណើរបេសកកម្មរបស់កីឡាករប្រដាល់ថ្នាលកម្ពុជាទៅប្រកួតនៅប្រទេសជប៉ុនទាំង៥រូបលើកនេះគឺឈ្នះទាំងអស់ក្នុងនោះមានការប្រកួតដណ្ដើមខ្សែក្រវាត់ដែលមានកីឡាកររិទ្ធី គីងកុង និងកីឡាករ គឿម សុវណ្ណឃីម ដែលសុទ្ធតែអាចផ្ដួលគូប្រកួតឱ្យសន្លប់ដូចគ្នា ៕
ចែករំលែកព័តមាននេះ