ប្រទេស​ស្វី​ស ៖ ប្រធាន​សហព័ន្ធ​បាល់ទាត់​ពិភពលោក FIFA លោក Gianni Infantino បាន​អះអាង​ថា ស្ថាប័ន​លោក​កំពុង​មានការ​ពិភាក្សា​មួយ​ជុំវិញ​លទ្ធភាព​ដែល​ខ្សែប្រយុទ្ធ Cristiano Ronaldo អាច​លេង​ក្នុង​ព្រឹត្តិការណ៍ FIFA Club World Cup ឆ្នាំ​២០២៥ នា​ពេល​ខាង​មុខ​នេះ បើ​ទោះបីជា​ក្រុម Al Nassr បាន​ខកខាន​ឱកាស​ប្រកួត​ពានរង្វាន់​នៅ​រដូវក្តៅ​នេះ​យ៉ាងណា​ក៏​ដោយ​។ នេះ​បើ​យោង​តាម​ប្រភព​ពី​សារព័ត៌មាន BBC ចេញផ្សាយ​កាលពី​ថ្ងៃ​ទី​២៤ ខែឧសភា ឆ្នាំ​២០២៥​។

ក្រុម Al Nassr សមាជិក​លី​គ​កំពូល​អា​រ៉ា​ប៊ី​សា​អូឌីត Saudi Pro League បាន​បរាជ័យ​ក្នុង​ការ​ទទួល​បាន​កៅអី​លេង​ព្រឹត្តិការណ៍ FIFA Club World Cup ឆ្នាំ​២០២៥ នៅ​សហរដ្ឋអាមេរិក ដែល​មាន​រហូត​ដល់​ក្រុម​ចំនួន​៣២​ក្រុម​ចូលរួម ដោយ​នឹង​ចាប់ផ្តើម​ចាប់ពី​ថ្ងៃ​ទី​១៤ ខែមិថុនា ដល់​ថ្ងៃ​ទី​១៣ ខែកក្កដា ខាង​មុខ​នេះ​។ ប៉ុន្តែ​ទោះ​យ៉ាងណា​ក៏​ដោយ លោក Infantino បាន​អះអាង​ថា ខ្សែប្រយុទ្ធ​ឆ្នើម​ព័រ​ទុ​យ​ហ្គា​ល់ Cristiano Ronaldo វ័យ​៤០​ឆ្នាំ ដែល​ផុត​កុងត្រា​ជាមួយ​ក្លិប Al Nassr នៅ​រដូវក្តៅ​នេះ នៅ​តែ​អាច​មាន​វត្តមាន​ប្រកួត​ព្រឹត្តិការណ៍​នេះ​។

អំឡុង​ពេល​បទ​សម្ភាសន៍​ជាមួយ​តារា​យូ​ធូប​ដ៏​ល្បី​របស់​សហរដ្ឋអាមេរិក IShowSpeed លោក Infantino បាន​និយាយ​អំពី​គូប្រជែង​ដ៏​អស្ចារ្យ​របស់ Ronaldo គឺ​ខ្សែប្រយុទ្ធ​ឆ្នើម​អា​ហ្ស​ង់​ទី​ន Lionel Messi ដែល​នឹង​លេង​ក្នុង​ការ​ប្រកួត​បើក​ឆាក​នា​ថ្ងៃ​ទី​១៤ ខែមិថុនា​សម្រាប់​ក្រុម Inter Miami សមាជិក​លី​គ​កំពូល​អា​មេ​រិ​ក​។ បន្ទាប់​មក​ប្រធាន​សហព័ន្ធ​ពិភពលោក​បាន​បន្ថែម​ដូច្នេះ​ថា «​ហើយ Ronaldo ប្រហែលជា​លេង​ឱ្យ​ក្រុម​ណាមួយ​ផង​ដែរ​នៅ​ព្រឹត្តិការណ៍ FIFA Club World Cup​។ យើង​មានការ​ពិភាក្សា​ជាមួយ​ក្លិប​មួយ​ចំនួន ដូច្នេះ​ប្រសិនបើ​ក្លិប​ណាមួយ​កំពុង​មើលឃើញ​ការ​សម្ភាសន៍​នេះ និង​ចាប់អារម្មណ៍​ក្នុង​ការ​នាំ​យក Ronaldo ទៅ​រួម​ក្រុម​ពួក​គេ​សម្រាប់​ការ​ប្រកួត FIFA Club World Cup ខណៈ​ដែល​នៅ​តែ​ប៉ុន្មាន​ស​ប្ដា​ហ៍​ទៀត នឹង​សប្បាយ​ហើយ​»​។

សូម​ជម្រាប​ថា ព្រឹត្តិការណ៍ FIFA Club World Cup ឆ្នាំ​នេះ នឹង​ក្លាយជា​ការ​ប្រកួត​ដំបូង​គេ​ក្នុង​រដូវក្តៅ និង​ជា​លើក​ដំបូង​ដែល​មាន​ក្រុម​ចូលរួម​ច្រើន​ជាង​៨​ក្រុម​។ ដូច្នេះ​ហើយ ទើប​បានជា FIFA បើក​ទីផ្សារ​ដោះ​ដូរ​កីឡាករ​បន្ថែម​ចាប់ពី​ថ្ងៃ​ទី​១ ដល់​ថ្ងៃ​ទី​១០ ខែមិថុនា ឆ្នាំ​២០២៥ ដើម្បី​អនុញ្ញាត​ឱ្យ​ក្លិប​ទាំងអស់​បញ្ចប់​កិច្ចព្រមព្រៀង​ដោះ​ដូរ​កីឡាករ​របស់​ខ្លួន ទាន់​ពេលវេលា​សម្រាប់​ការ​ប្រកួត​នៅ​លើ​ទឹកដី​សហរដ្ឋអាមេរិក​។ ស្រប​ពេល​ព្រឹត្តិការណ៍​នៅ​ឆ្នាំ​នេះ FIFA នឹង​ចំណាយ​ថ្លៃ​ប្រាក់​រង្វាន់​សរុប​រហូត​ដល់​១​ពាន់​លាន​ដុល្លារ​អា​មេ​រិ​ក​។

តើ Cristiano Ronaldo អាច​នឹង​ចូលរួម​ជាមួយ​ក្លិប​ណាខ្លះ?

ប្រភព​ពី​កាសែត​អេ​ស្ប៉ា​ញ Marca បាន​រាយការណ៍​កាលពី​ពេល​ថ្មី​ៗ​នេះ​ថា ក្លិប​ប្រេ​ស៊ី​ល​ដែល​មិន​បញ្ចេញ​ឈ្មោះ​មួយ​បាន​ដាក់​សំណើរ​ទៅ Ronaldo ស្រប​ពេល Botafogo គឺជា​ក្រុម​មួយ​ក្នុង​ចំណោម​ក្រុម​ប្រេ​ស៊ី​ល​ទាំង ៤ ដែល​មាន​កៅអី​លេង Club World Cup ឆ្នាំ​នេះ ហើយ​គ្រូបង្វឹក​ពួក​គេ លោក Renato Paiva ក៏​ត្រូវ​បាន​សួរនាំ​អំពី​វត្តមាន Ronaldo កាលពី​ថ្ងៃអាទិត្យ​ស​ប្តា​ហ៍​មុន​ផង​ដែរ ខណៈ​ប្រធាន​ក្រុម​ជម្រើសជាតិ​ព័រ​ទុ​យ​ហ្គា​ល់​រូប​នេះ កំពុង​ពិចារណា​ចាក​ចេញពី​ក្លិប Al Nassr​។ លោក Renato បាន​សើច​មុន​និយាយ​បែប​លែង​សើ​ប​ថា «​បុណ្យ​ណូអែល​គឺ​នៅ​ខែធ្នូ​តែ​ប៉ុណ្ណោះ ប៉ុន្តែ​ប្រសិនបើ Ronaldo មក អ្នក​មិន​អាច​និយាយ​ថា​ទេ​ចំពោះ​កីឡាករ​បែប​នោះ​»៕ ប្រភព ៖ BBC