រាជធានីភ្នំពេញ ៖ សិស្សានុសិស្សស្រី តែងតែជួបការលំបាកមួយចំនួន នៅពេលមករដូវខែ ដែលប្រការនេះ មិនត្រឹមតែជះក្តីកង្វល់សម្រាប់សិស្សខ្លួនឯងផ្ទាល់ទេ តែក៏មួយចំនួនបានទទួលរងនូវការម៉ាក់ងាយ ការខ្ពើមរអើម ហើយមួយចំនួនទៀតបានឈប់សម្រាករៀនសូត្រថែមទៀត…
រាជធានីភ្នំពេញ ៖ សិស្សានុសិស្សស្រី តែងតែជួបការលំបាកមួយចំនួន នៅពេលមករដូវខែ ដែលប្រការនេះ មិនត្រឹមតែជះក្តីកង្វល់សម្រាប់សិស្សខ្លួនឯងផ្ទាល់ទេ តែក៏មួយចំនួនបានទទួលរងនូវការម៉ាក់ងាយ ការខ្ពើមរអើម ហើយមួយចំនួនទៀតបានឈប់សម្រាករៀនសូត្រថែមទៀត នៅពេលមករដូវខែម្តងៗ ។
លោក សាំង សុផល ប្រធានការិយាល័យសុខភាពសិក្សា មន្ទីរអប់រំយុវជន និងកីឡា បានលើកឡើងនៅក្នុងពិធីទិវាសុខភាពពេលមករដូវឆ្នាំ២០២៥ ក្រោមប្រធានបទ «យើងរួមគ្នាចូលរួមអំពាវនាវឱ្យមានសមធម៌ អំឡុងពេលមានរដូវ» ក្នុងទិវាសុខភាពមករដូវ ដែលបានរៀបចំឡើងនាវិទ្យាល័យ ឫស្សីកែវ ក្នុងរាជធានីភ្នំពេញ នៅថ្ងៃទី២៤ ខែឧសភា ឆ្នាំ ២០២៥ បានឲ្យដឹងថា សម្រាប់សិស្សស្រី នៅពេលដែលពួកគាត់មករដូវ តែងជួបបញ្ហាលំបាកមួយចំនួន ហេតុនេះ ចាំបាច់ណាស់ ត្រូវអប់រំផ្សព្វផ្សាយសំដៅធ្វើយ៉ាងណា ជួយគាត់ឱ្យបានចូលរៀន កាត់បន្ថយការមាក់ងាយ និងការរើសអើងជាដើម។
លោកបានបញ្ជាក់ថា ៖ យើងត្រូវរួមគ្នា ក្នុងការលុបបំបាត់ការមាក់ងាយ បង្កើនការយល់ដឹងអំពីសារៈសំខាន់ នៃការអប់រំសុខភាពពេលមករដូវ និងការគ្រប់គ្រងអនាម័យ ពេលមករដូវ ដូចជាសំឡីអនាម័យ ទីកន្លែងសុវត្ថិភាព សម្រាប់សិស្សស្រីៗ ។
លោកប្រធានការិយាល័យសុខភាពសិក្សា មន្ទីរអប់រំយុវជន និងកីឡា បានឱ្យដឹងដែរថា នៅទូទាំងពិភពលោក ស្ត្រីប្រមាណ ៥០០លាននាក់ តែងជួបប្រទះ នឹងភាពលំបាក ក្នុងពេលមានរដូវ រួមទាំងកង្វះលទ្ធភាពទទួលបានផលិតផលសុខភាពពេលមករដូវ កន្លែងសុវត្ថិភាព កង្វះអនាម័យ និងការទទួលយករបស់សហគមន៍។ ឧបសគ្គទាំងនេះ រួមជាមួយនឹងការមាក់ងាយ អាចនាំទៅរកលទ្ធផលប៉ះពាល់សុខភាព ការបោះបង់សាលារៀន និងផលប៉ះពាល់សុខភាពផ្លូវចិត្ត ។
ចំណែកលោកវេជ្ជបណ្ឌិត ចន ផាន់ណា ប្រធានគ្រប់គ្រងកម្មវិធីប្រចាំប្រទេស នៃអង្គការ មូលនិធិថែទាំសុខភាពអ្នកជំងឺអេដស៍ បានឱ្យដឹងថា ទិវាសុខភាព ពេលមករដូវមានគោលបំណង ដើម្បីកាត់បន្ថយការមាក់ងាយ ការមិនបានយកចិត្តទុកដាក់ និងកាត់បន្ថយកង្វះខាតសម្ភារៈអនាម័យពេលមករដូវ។ ទិវាសុខភាពពេលមករដូវកំពុង នឹងត្រូវបានប្រារព្ធជារៀងរាល់ឆ្នាំនៅថ្ងៃទី ២៨ ខែឧសភា ។
លោកបានលើកឡើងថា នៅទូទាំងពិភពលោក ស្ត្រី និងកុមារី ជាពិសេ ក្នុងអនុតំបន់អាហ្វ្រិកសាហារ៉ា ប្រឈមមុខនឹងការឆ្លងមេរោគអេដស៍ខ្លាំង។ កង្វះការទទួលបានសំឡីអនាម័យ បង្ខំឱ្យក្មេងស្រីជាច្រើន ខកខានមិនបានចូលរៀន និង បោះបង់ចោលការសិក្សា បោះបង់ការងារ។ ទាំងនេះហើយ ដែលនាំមានកើនឡើង នូវទំនាក់ទំនងមានការរួមភេទ ជាមួយការខ្វះខាតជំនាញ ក្នុងការចរចាការរួមភេទ ប្រកបដោយសុវត្ថិភាព និងមិនមានហានិភ័យខ្ពស់ នៃការឆ្លងមេរោគអេដស៍ ។
លោកវេជ្ជបណ្ឌិត ចន ផាន់ណា ប្រធានគ្រប់គ្រងកម្មវិធីប្រចាំប្រទេស នៃអង្គការ មូលនិធិថែទាំសុខភាពអ្នកជំងឺអេដស៍បានឱ្យដឹងថា ទិវាសុខភាពពេលមករដូវមានគោលបំណង ដើម្បីកាត់បន្ថយការមាក់ងាយ ការមិនបានយកចិត្តទុកដាក់ និងកាត់បន្ថយកង្វះខាតសម្ភារៈអនាម័យពេលមករដូវ។ ទិវាសុខភាពពេលមករដូវកំពុង នឹងត្រូវបានប្រារព្ធជារៀងរាល់ឆ្នាំនៅថ្ងៃទី ២៨ ខែឧសភា ។
គួរបញ្ជាក់ថា ប្រារព្ធពិធី «ទិវាសុខភាពពេលមករដូវ » ដែលរៀបចំឡើងដោយ អង្គការមូលនិធិថែទាំសុខភាពអ្នក ជំងឺអេដស៍ (AHF) ដើម្បីលុបបំបាត់ការមាក់ងាយ និងការរើសអើង និងការមិនយកចិត្តទុកដាក់ ដែលធ្វើឲ្យរាំងស្ទះការរីកចម្រើនស្រមគ្នាជាមួយរាជរដ្ឋាភិបាល នៃរាជាណាចក្រកម្ពុជា លើកកម្ពស់សុខភាពស្ត្រី និងក្មេងស្រី ៕
ចែករំលែកព័តមាននេះ