ខេត្តព្រៃវែង ៖ ជនសង្ស័យជាមុខសញ្ញាអ្នកជួញដូរថ្នាំញៀន ចំនួន ៣នាក់ ត្រូវបានកម្លាំងកងរាជអាវុធហត្ថខេត្តព្រៃវែង ចាប់ឃាត់ខ្លួនបានជាបន្តបន្ទាប់ និងដកហូតបានវត្ថុតាងថ្នាំញៀន សរុបជិត ៤គីឡូក្រាម…
ខេត្តព្រៃវែង ៖ ជនសង្ស័យជាមុខសញ្ញាអ្នកជួញដូរថ្នាំញៀន ចំនួន ៣នាក់ ត្រូវបានកម្លាំងកងរាជអាវុធហត្ថខេត្តព្រៃវែង ចាប់ឃាត់ខ្លួនបានជាបន្តបន្ទាប់ និងដកហូតបានវត្ថុតាងថ្នាំញៀន សរុបជិត ៤គីឡូក្រាម ។
លោកវរសេនីទោ ផាត់ សុជោត ប្រធានមន្ទីរស្រាវជ្រាវ និងបង្ក្រាបបទល្មើស កងរាជអាវុធហត្ថខេត្តព្រៃវែង បានឱ្យដឹងថា ប្រតិបត្តិការបង្ក្រាបករណីជួញដូរគ្រឿងញៀននេះ ធ្វើឡើងដោយប្រើរយៈពេល ២ថ្ងៃ និងមានការចូលរួមសហការពីកម្លាំងកងរាជអាវុធហត្ថចំនួន ២ខេត្តផងដែរ គឺអាវុធហត្ថខេត្តព្រៃវែង និងអាវុធហត្ថខេត្តកណ្ដាល ក្រោមការជួយសម្របសម្រួលពីលោកព្រះរាជអាជ្ញាទាំង២ខេត្ត ។
លោក ផាត់ សុជោត បានបន្តទៀតថា នៅវេលាម៉ោង៤ និង៣០នាទី ថ្ងៃទី១៨ ឧសភា ចំណុចខាងមុខសាលាឃុំអ្នកលឿង កម្លាំងកងរាជអាវុធហត្ថខេត្តព្រៃវែង បានចាប់ឃាត់ខ្លួនជនសង្ស័យជាមុខសញ្ញាជួញដូរថ្នាំញៀន បានចំនួន២នាក់ គឺឈ្មោះ ឃុន សីហា ភេទប្រុស អាយុ ២២ឆ្នាំ និងឈ្មោះ ឌុច ចន្ថា ភេទប្រុស អាយុ ២៤ឆ្នាំ និងដកហូតបានវត្ថុតាងថ្នាំញៀនម្សៅក្រាមពណ៌សចំនួន ២កញ្ចប់ ។
ក្រោយពីត្រូវបានចាប់ឃាត់ខ្លួន ជនសង្ស័យឈ្មោះឌុច ចន្ថា បានឆ្លើយសារភាពថា ថ្នាំញៀនដែលរូបគេយកមកលក់ចែកចាយនៅទីប្រជុំជនអ្នកលឿង គឺរូបគេយកពីឈ្មោះ យួន នៅស្រុកលើកដែក ខេត្តកណ្ដាល ប៉ាមួយរយៈចម្លើយសារភាពនេះទើបនៅថ្ងៃទី១៩ ឧសភា កម្លាំងអាវុធហត្ថខេត្តព្រៃវែង បានធ្វើការពន្លាតដែនដី ដោយសហការជាមួយកម្លាំងអាវុធហត្ថស្រុកលើកដែកបានចុះទៅចាប់ឃាត់ខ្លួនជនសង្ស័យបានម្នាក់ ទៀតឈ្មោះ ង្វៀង យ៉ាំងឌឹក ហៅ យួន អាយុ ២១ឆ្នាំ នៅភូមិកំពង់ចម្លង ឃុំព្រែកទម្លាប់ ស្រុកលើកដែក ខេត្តកណ្ដាល និងដកហូតបានវត្ថុតាងថ្នាំញៀនម្សៅក្រាមពណ៌សចំនួន ២៧កញ្ចប់ ស្មើនឹងទម្ងន់ ៣៦៩៨.២ក្រាម ។
ក្រោយពីត្រូវបានចាប់ឃាត់ខ្លួន ជនសង្ស័យទាំង៣នាក់ រួមជាមួយនឹងវត្ថុតាង ត្រូវបានបញ្ជូនមកកាន់បញ្ជាការដ្ឋានកងរាជអាវុធហត្ថខេត្តព្រៃវែង កសាងសំណុំរឿង ហើយនៅរសៀលថ្ងៃទី២២ ឧសភា ទាំងវត្ថុតាងនិងជនសង្ស័យទាំងអស់ ត្រូវបានបញ្ជូនទៅសាលាដំបូងខេត្តព្រៃវែង ចាត់ការបន្តទៅតាមនីតិវិធី ៕
ចែករំលែកព័តមាននេះ