រាជធានីភ្នំពេញ ៖ ជីវភាពរបស់ប្រជាពលរដ្ឋខ្មែរ រស់នៅប្រទេសវៀតណាម តែងតែទទួលបានការយកចិត្តទុកដាក់ពីសំណាក់ បក្ស រដ្ឋ និងអាជ្ញាធរមូលដ្ឋានវៀតណាម យកចិត្តទុកដាក់ទំនុកបម្រុង អនុវត្តគោលនយោបាយ…
រាជធានីភ្នំពេញ ៖ ជីវភាពរបស់ប្រជាពលរដ្ឋខ្មែរ រស់នៅប្រទេសវៀតណាម តែងតែទទួលបានការយកចិត្តទុកដាក់ពីសំណាក់ បក្ស រដ្ឋ និងអាជ្ញាធរមូលដ្ឋានវៀតណាម យកចិត្តទុកដាក់ទំនុកបម្រុង អនុវត្តគោលនយោបាយ និងយុទ្ធសាស្ត្រ ប្រកបដោយភាពស៊ីសង្វាក់ និងមានប្រសិទ្ធភាព សំដៅបង្កើនធនធាន ជំរុញការអភិវឌ្ឍន៍សេដ្ឋកិច្ចសង្គម បង្កើនប្រាក់ចំណូល លើកកម្ពស់ជីវភាពរស់នៅ និងកសាងសហគមន៍ជនបទថ្មី ដែលមានភាពរុងរឿងសម្បូរសប្បាយ ។
អាជ្ញាធរស្រុក ជៅ ថាញ់ (Chau Thanh) ស្ថិតនៅចំទីតាំងយ៉ាង នៅក្នុងទឹកដីវៀតណាម បានលើកឡើងថា ជា “ច្រកចេញចូល” នៃខេត្ត សុក ត្រាំង (Soc Trang) មានប្រជាជនជិត៥០% ដែលភាគច្រើនជាជនជាតិខ្មែរ។ ក្នុងប៉ុន្មានឆ្នាំចុងក្រោយនេះ អាជ្ញាធរមូលដ្ឋាន បានបង្កើនការទាក់ទាញវិនិយោគ យកចិត្តទុកដាក់លើការអភិវឌ្ឍជនបទ លើកកម្ពស់ជីវភាពរស់នៅ បង្កើតការងារ បើកទូលាយការអភិវឌ្ឍសេដ្ឋកិច្ចគ្រប់ទម្រង់ បានជួយឱ្យជីវភាពរស់ នៅរបស់ប្រជាជន នៅតំបន់ ជៅ ថាញ់ ជាពិសេសបងប្អូនជនជាតិនៅទីនោះ មានភាពកាន់តែល្អប្រសើរឡើង និងផ្លាស់ប្តូរយ៉ាងឆាប់រហ័ស ។
ចំពោះខេត្ត ត្រា វិញ (Tra Vinh) ដែលមានប្រជាពលរដ្ឋខ្មែរ ជាង២០% រស់នៅ។ ពួកគេធ្វើការយ៉ាងលំបាក ក្នុងវិស័យផលិតកម្ម ភាគច្រើន ក្នុងវិស័យកសិកម្ម វារីវប្បកម្ម និងមួយចំនួនតូច ប្រកបរបរតម្បាញ សិប្បកម្ម និងសេវាកម្មពាណិជ្ជកម្ម។ ក្នុងប៉ុន្មានឆ្នាំចុងក្រោយនេះ ទោះបីជាមានការលំបាកមួយចំនួន ប៉ុន្តែដោយមានការយកចិត្តទុកដាក់ណែនាំ និងការចង្អុលបង្ហាញពីសំណាក់រដ្ឋាភិបាលថ្នាក់កណ្តាល ថ្នាក់ដឹកនាំគ្រប់លំដាប់ និងគ្រប់វិស័យ ខេត្តបានយកចិត្តទុកដាក់ណែនាំ និងបានធ្វើឱ្យមានផ្លាស់ប្តូរគ្រប់បែបយ៉ាង នៅក្នុងតំបន់ ដែលមានជនជាតិខ្មែររស់នៅ សំដៅជំរុញឱ្យមានកំណើនជីវភាពរស់នៅ ដោយផលិតផលក្នុងស្រុកសរុបសម្រាប់មនុស្សម្នាក់ កើនដល់ ៣,០០០ដុល្លារ/ឆ្នាំ នាំឱ្យជីវភាពរស់នៅកាន់តែប្រសើរឡើង ។ មិនអាចរៀបរាប់អស់ពីសមិទ្ធិផល ដែលទទួលបានពីការអភិវឌ្ឍភូមិ ស្រុក ថ្មី នោះទេ។ កម្មវិធីគោលដៅជាតិ នៅតំបន់ជនជាតិ រួមជាមួយនឹងកម្មវិធីរបស់អាជ្ញាធរមូលដ្ឋាន ខេត្ត វីញ ឡុង (Vinh Long) បានបង្កើនការអភិវឌ្ឍ និងការផ្លាស់ប្តូរថ្មីជាបណ្តើរៗ នៅក្នុងតំបន់ជនជាតិខ្មែរ។ រហូតមកដល់ពេលនេះ ប្រាក់ចំណូលជាមធ្យមបានឈានដល់ ៣,១០០ដុល្លារ/ម្នាក់/ឆ្នាំ ។ ហេដ្ឋារចនាសម្ព័ន្ធ នៃតំបន់ជនជាតិខ្មែរ ត្រូវបានវិនិយោគយ៉ាងល្អប្រសើរ ដោយមានផ្លូវក្រាលកៅស៊ូ អាចឱ្យរថយន្តធ្វើដំណើរបាននៅទូទាំងឃុំ មានផ្លូវបេតុង អាចឱ្យរថយន្តធ្វើដំណើរបាននៅទូទាំងភូមិ។ សាលារៀន បន្ទប់រៀន និងមន្ទីរពេទ្យ មានគ្រប់ទីកន្លែង ។ ដោយទទួលបានទុនពីប្រភពនានា ក្នុងរយៈពេលពីឆ្នាំ២០១៩-២០២៤ ខេត្ត វីញ ឡុង បានសាងសង់ និងជួសជុលផ្ទះចំនួន ៧៨៥ខ្នង ជូនគ្រួសារខ្មែរក្រីក្រ ហើយនៅឆ្នាំ២០២៥ បានសាងសង់រួចរាល់ផ្ទះចំនួន ៤១ខ្នង។ ជារួម ខេត្តបានលុបបំបាត់ទាំងស្រុង ផ្ទះបណ្តោះអាសន្ន និងដែលមានភាពទ្រុឌទ្រោម ក្នុងតំបន់ ដែលមានជនជាតិខ្មែររស់នៅ។ តាមរយៈគោលនយោបាយអនុគ្រោះជាច្រើនលើដើមទុន ការបណ្តុះបណ្តាលវិជ្ជាជីវៈ ការបង្កើតការងារ និងមុខរបរ បានជួយឱ្យគ្រួសារខ្មែរជាច្រើនមានជីវភាពល្អប្រសើរ ។
តំណាងអាជ្ញាធរឃុំ ឡន មី (Loan My) ខេត្ត វីញ ឡុង លោក ថាច់ សូផាត បានឲ្យដឹងថា នាពេលថ្មីៗនេះ សហគមន៍ជនជាតិខ្មែរ ក្នុងឃុំ បានទទួលការយកចិត្តទុកដាក់ និងលើកទឹកចិត្ត ជាគោលនយោបាយជាច្រើន ដែលបានជួយទាន់ពេលវេលាដល់គ្រួសារពួកគាត់ ឱ្យមានលទ្ធភាពកែលម្អលំនៅដ្ឋាន ដីធ្លី លើកកម្ពស់ជីវភាពរស់នៅឱ្យមានភាពល្អប្រសើរ និងមានស្ថិរភាពជាបណ្តើរៗ ។
លោកបន្តថា ការវិនិយោគលើហេដ្ឋារចនាសម្ព័ន្ធ នៅតំបន់បងប្អូនជនជាតិខ្មែរវិញ មិនត្រឹមតែយកចិត្តទុកដាក់លើជីវភាពរស់នៅរបស់ប្រជាពលរដ្ឋប៉ុណ្ណោះទេ ការកំណត់ពីសារៈសំខាន់ នៃការដឹកជញ្ជូន និងហេដ្ឋារចនាសម្ព័ន្ធនៅតំបន់ជនបទ ដែលមានការលំបាកជាច្រើន អាជ្ញាធរមូលដ្ឋាន នៃតំបន់ ដែលមានជនជាតិខ្មែររស់នៅ បានដាក់ចេញនូវគោលនយោបាយ និងយុទ្ធសាស្ត្រដ៏ត្រឹមត្រូវ និងស្របទៅតាមតម្រូវការរបស់ប្រជាជនជាច្រើន ដោយពន្លឿនដំណើរការកសាង ហេដ្ឋារចនាសម្ព័ន្ធ ដឹកជញ្ជូនជនបទ ឱ្យកាន់តែពេញលេញ ជួយឱ្យមុខមាត់នៅទីជនបទ មានការផ្លាស់ប្តូរថ្មី។ បច្ចុប្បន្ននេះ នៅតាមបណ្តាខេត្ត ដែលមានជនជាតិខ្មែររស់នៅ មានផ្លូវច្រើនខ្វាត់ខ្វែង។ ផ្លូវ ដែលមានភក់ពីមុន នៅតំបន់ដាច់ស្រយាល ពេលនេះ ត្រូវបានជំនួសដោយផ្លូវបេតុង និងផ្លូវក្រាលកៅស៊ូ តភ្ជាប់ភ្នារវាងភូមិ-ឃុំ ផ្តល់ងាយស្រួលសម្រាប់ការធ្វើដំណើរ និងចរាចរទំនិញ គ្រប់ប្រភេទ ។
ចំណែកលោក ឡឹម ហៀប (Lam Hiep) ឃុំ ភូ តិន Phu Tan ស្រុក ជៅ ថាញ់ Chau Thanh ខេត្ត សុក ត្រាំង Soc Trang បានឲ្យដឹងថា លោកពិតជាមានសេចក្តីសោមនស្សរីករាយក្រៃលែង ដែលផ្លូវថ្នល់ នៅតំបន់ជនជាតិខ្មែររស់នៅ បានសាងសង់រួចរាល់ ក្រាលកៅស៊ូ និងមានភាពធំទូលាយ ។
លោកបានចែករំលែកថា ៖ «ប្រជាជននៅទីនេះ សប្បាយចិត្តណាស់ រួមទាំងអ្នកស្រុកផ្សេងទៀត ឆ្លងកាត់ផ្លូវនេះ ឬប្រជាពលរដ្ឋ និងកម្មករទៅធ្វើការនៅសួនឧស្សាហកម្មក្បែរនោះ ក៏មានភាពងាយស្រួលផងដែរ ដោយផ្លូវថ្មី ការធ្វើដំណើរមានភាពងាយស្រួល គ្រោះថ្នាក់ចរាចរណ៍មានការថយចុះ ។ នៅតាមសងខាងផ្លូវមានទន្លេ និងវាលស្រែ ពេលដល់រដូវច្រូតកាត់ ប្រជាពលរដ្ឋ អាចធ្វើដំណើរបានស្រួល ទេសភាពក៏មានការផ្លាស់ប្តូរខ្លាំង ផ្ទះថ្មីកាន់តែច្រើន…» ។
ប្រភពពីប្រជាពលរដ្ឋខ្មែរ ដែលរស់នៅទីនោះ បានឲ្យដឹងថា ដោយមានការយកចិត្តទុកដាក់ និងវិនិយោគលើគោលនយោបាយជាក់ស្តែង និងមានប្រសិទ្ធភាពជាច្រើន មុខមាត់របស់ជនជាតិខ្មែរនៅខេត្ត វីញ ឡុង (Vinh Long) អាន យ៉ាង (An Giang) ត្រា វិញ (Tra Vinh) ជាដើម មានការផ្លាស់ប្តូរកាន់តែខ្លាំងឡើង រួមទាំងឃុំជាច្រើន បានក្លាយជាឃុំ ជនបទគំរូថ្មី ។ ប្រជាជនយល់ដឹងកាន់តែច្បាស់អំពីទំនួលខុសត្រូវរបស់ខ្លួន ពឹងលើខ្លួនឯង និងរួមចំណែកយ៉ាងសកម្មជួយដល់មាតុភូមិ និងប្រទេសជាតិ ។
ពាក់ព័ន្ធរឿងរ៉ាវខាងលើ លោក ថាច់ ដឿង (Thach Duong) ប្រធានស្តីទី មន្ទីរជនជាតិ និងសាសនាខេត្ត វិញ ឡុង បានលើកឡើងថា ដោយមានទំនៀមទំលាប់ស្នេហាជាតិ និងការចងសម្ព័ន្ធមេត្រីភាពយូរអង្វែងជាមួយទឹកដីភាគខាងត្បូង ប្រជាជនខ្មែរមិនត្រឹមតែខិតខំពុះពារជំនះការលំបាកក្នុងជីវភាពប៉ុណ្ណោះទេ ថែមទាំងចូលរួមចលនាប្រឡងបណាំងស្នេហាជាតិជាច្រើន ក្នុងមូលដ្ឋានផងដែរ ។ គ្រួសារជាច្រើនបានផ្លាស់ប្តូរទម្លាប់ដាំដំណាំ និងចិញ្ចឹមសត្វយ៉ាងសកម្ម ដោយអនុវត្តតាមបែបបច្ចេកទេសទំនើប និងទទួលបានប្រសិទ្ធភាពសេដ្ឋកិច្ចខ្ពស់ រួមចំណែកដល់ការលុបបំបាត់ភាពអត់ឃ្លាន កាត់បន្ថយភាពក្រីក្រ និងក្លាយជាអ្នកមានចំណូលធូរធារជាបន្តបន្ទាប់ ។ ជាពិសេស តួនាទី និងកិត្យានុភាពរបស់ប្រជាពលដ្ឋខ្មែរនៅទីនោះ ត្រូវបានលើកកម្ពស់យ៉ាងច្បាស់ ក្នុងចំណោមប្រជាពលរដ្ឋខ្មែរ។ ពួកគាត់ គឺជាស្ពានភ្ជាប់ដ៏សំខាន់មួយរវាងរដ្ឋាភិបាល និងប្រជាជន សកម្មផ្សព្វផ្សាយ និងប្រមូលផ្តុំប្រជាជនអនុវត្តគោលនយោបាយរបស់បក្ស និងច្បាប់របស់រដ្ឋ ចូលរួមក្នុងការរក្សាសន្តិសុខសណ្តាប់ធ្នាប់ និងលើកកម្ពស់អត្តសញ្ញាណវប្បធម៌ប្រពៃណីជាតិ។ ព្រះសង្ឃ ឥស្សរជនសាសនា និងឥស្សរជនល្បីៗជាច្រើន កំពុងធ្វើជាគំរូ ក្នុងការកៀរគរប្រជាជនបរិច្ចាកដី និងរួមចំណែកជាកម្លាំងពលកម្ម ការខិតខំកសាងផ្លូវសម្រាប់ធ្វើចរាចរណ៍ សាលារៀន មណ្ឌលវប្បធម៌ ជាដើម ដើម្បីសម្រេចឱ្យបានជាបណ្តើរៗតាមលក្ខណៈវិនិច្ឆ័យក្នុងកម្មវិធីសាងសង់ជនបទថ្មី ។ ជាមួយនឹងការអនុវត្តប្រកបដោយប្រសិទ្ធភាព នូវគោលនយោបាយគាំទ្រ សេដ្ឋកិច្ចគ្រួ សារជនជាតិខ្មែរ នៅប្រទេសវៀតណាម មានការរីកចម្រើនជាបន្តបន្ទាប់ ហើយជីវភាពរស់នៅរបស់ប្រជាជនក៏ត្រូវបានកែលម្អ និងលើកកម្ពស់ឥតឈប់ឈរ ។
នាពេលខាងមុខ បក្ស និងរដ្ឋវៀតណាម នឹងបន្តអនុវត្តគោលនយោបាយជនជាតិ ប្រកបដោយភាពស៊ីសង្វាក់គ្នា និងមានប្រសិទ្ធភា ព ជាពិសេសគោលនយោបាយគាំទ្រជាក់ស្តែង សម្រាប់តំបន់ជនជាតិខ្មែរ។ បង្កើតលក្ខខណ្ឌសមស្រប ដើម្បីឱ្យប្រជាជនចូលរួមយ៉ាងសកម្មក្នុងការអភិវឌ្ឍសេដ្ឋកិច្ចគ្រួសារ ការពារបរិស្ថាន ថែរក្សាអត្តសញ្ញាណវប្បធម៌ជាតិ និងកសាងជីវភាពរស់នៅតាមបែបស៊ីវិល័យ និងទំនើបថ្មី រួមចំណែកអភិវឌ្ឍរួម នៅតំបន់ជនជាតិខ្មែរ ក្នុងសម័យឧស្សាហូបនីយកម្ម ទំនើបកម្ម និងសមាហរណកម្មអន្តរជាតិ ។
សូមជម្រាបថា គោលនយោបាយថែទាំ ទំនុកប្រមុងជីវភាពរស់នៅដល់ប្រជាពលរដ្ឋខ្មែរ នៅប្រទេសវៀតណាមទាំងខាងសម្ភារៈ និងស្មារតី ដូចជាកម្មវិធីគោលដៅជាតិ ស្តីពីការអភិវឌ្ឍសេដ្ឋកិច្ច សង្គមសម្រាប់ជនជាតិភាគតិច និងតំបន់ភ្នំ ដំណាក់កាល ២០២១-២០២៥ របស់ប្រទេសវៀតណាម ទទួលបានប្រសិទ្ធភាពជាក់ស្តែង និងបានរួមចំណែកលើកកម្ពស់ជីវភាពរស់នៅរបស់ប្រជាជននៅទូទាំងតំបន់ទាំងមូល ជាពិសេសនៅតាមបណ្តាខេត្តមួយចំនួន ៕
ចែករំលែកព័តមាននេះ