ទីក្រុង​ប៊ី​ល​បាវ ៖ ក្រុម​មាន់​ខ្នាយ​មាស Tottenham Hotspur ផ្តួល​ក្រុម​បិសាច​ក្រហម Manchester United នៅ​វគ្គ​ផ្តាច់ព្រ័ត្រ​ដោយ​លទ្ធផល ១​ទល់​នឹង​០ ដើម្បី​គ្រង​ជើងឯក​ពានរង្វាន់ UEFA Europa League រដូវ​កាល ២០២៤-២៥ ស្គាល់​រសជាតិ​ឈ្នះ​ពាន លើក​ដំបូង បន្ទាប់​ពី​ខកខាន​អស់​រយៈពេល​១៧​ឆ្នាំ​កន្លង​មក​ហើយ​។

ជំនួប​វគ្គ​ផ្តាច់ព្រ័ត្រ​រវាង​ក្រុម​មក​ពី​អង់គ្លេស​ទាំង​ពីរ កាលពី​ថ្ងៃ​ទី​២១ ខែឧសភា ឆ្នាំ​២០២៥ ធ្វើ​ឡើង​នៅ​ក្នុង​កីឡដ្ឋាន San Mamés ដែល​មាន​មូលដ្ឋាន​ក្នុង​ទីក្រុង​ប៊ី​ល​បាវ (Bilbao) ប្រទេស​អេ​ស្ប៉ា​ញ ក្លាយជា​ទីតាំង​សម្រាប់​អបអរ​ជើងឯក​របស់​ក្រុម Spurs ក្រោយ​ខ្សែប្រយុទ្ធ​សញ្ជាតិ​ន័​រ​វែ​ស Brennan Johnson រក​គ្រាប់​ជ័យជម្នះ​លើ​ក្រុម Man Utd នៅ​នាទី​៤២ ហើយ​មួយ​គ្រាប់​នេះ គ្រប់គ្រាន់​សម្រាប់​ក្រុម​របស់​លោក Ange Postecoglou គ្រង​ជើងឯក​ពានរង្វាន់ UEFA Europa League រដូវ​កាល​នេះ ហើយ​ក័​ជា​លើក​ទី​៣ (១៩៧១-៧២, ១៩៨៣-៨៤, ២០២៤-២៥) នៅ​ក្នុង​ប្រវត្តិសាស្ត្រ​របស់​ក្លិប​។ មិន​ត្រឹមតែ​ប៉ុណ្ណោះ ក៏​ជា​ការ​ឈ្នះ​ពាន​លើក​ដំបូង​របស់​ពួក​គេ បន្ទាប់​ពី​ខកខាន​អស់​រយៈពេល​១៧​ឆ្នាំ​កន្លង​មក​ហើយ ដោយ​ការ​ឈ្នះ​ចុង​ក្រោយ​គឺ​ពានរង្វាន់ EFL Cup កាលពី​ឆ្នាំ​២០០៨​មក​ម្ល៉េះ​។

ស្រប​ពេល​ខ្សែប្រយុទ្ធ​សញ្ជាតិ​កូរ៉េ​ខាងត្បូង Son Heung-min ក៏​ស្គាល់​រសជាតិ​ឈ្នះ​ពានរង្វាន់​ជា​លើក​ដំបូង​ជាមួយ Spurs ផង​ដែរ បន្ទាប់​ពី​ចំណាយពេល​ជិត​១០​ឆ្នាំ​ជាមួយ​ក្រុម​មាន​មូលដ្ឋាន​នៅ​ភាគ​ជើង​ទីក្រុង​ឡុ​ង​ដ៍​មួយ​នេះ ចាប់តាំងពី​ផ្លាស់​មក​ពី​ក្លិប Bayer Leverkusen កាលពី​ឆ្នាំ​២០១៥​។

ក្នុង​នាម​ជា​ម្ចាស់​ជើងឯក​ពានរង្វាន់​លំដាប់​ទី​២​ប្រចាំ​ទ្វីបអឺរ៉ុប រដូវ​កាល​នេះ Spurs ធានា​បាន​កៅអី​ពាន​លំដាប់​ទី​១ UEFA Champions League រដូវ​កាល​ក្រោយ បើ​ទោះបីជា​ពួក​គេ​បច្ចុប្បន្ន​កំពុង​ឈរ​ចំណាត់ថ្នាក់​ទី​១៧ នៃ​លី​គ​កំពូល​អង់គ្លេស Premier League យ៉ាងណា​ក្តី​។ ដ្បិត​ក្រុម​របស់​លោក Ruben Amorim គ្មាន​សិទ្ធិ​លេង​ពានរង្វាន់​អឺរ៉ុប​ណាមួយ​ឡើយ​រដូវ​កាល​ក្រោយ​។

រហូត​មក​ទល់​ពេល​នេះ អង់គ្លេស​រក​ឃើញ​៣​ក្រុម​ហើយ រួម​មាន Liverpool, Arsenal និង Spurs ក្នុង​ចំណោម​៦​ក្រុម​ឈ្នះ​កៅអី​ស្វ័យប្រវត្តិ​លេង​វគ្គ​ជម្រុះ​ក្នុង​លី​គ​តែ​មួយ ឬ​League Phase ពានរង្វាន់ UEFA Champions League រដូវ​កាល​ក្រោយ ខណៈ​៣​ក្រុម​ផ្សេង​ទៀត នឹង​រក​ឃើញ​ក្រោយ​ការ​ប្រកួត​បិទ​លី​គ​នៅ​ចុង​ស​ប្តា​ហ៍​នេះ​៕