ខេត្តកំពង់ឆ្នាំង ៖ ប្រជាពុទ្ធបរិស័ទចំណុះជើងវត្ត និងអាជ្ញាធរមូលដ្ឋាន បានបញ្ជាក់យ៉ាងច្បាស់ដោយគ្មានការសង្ស័យថា ព្រះអង្គធម្មវនវាសី ចន្ទ មុន្នី ចៅអធិការវត្តចន្ទប្បជោត្តនារាម ហៅវត្តតាសុត…
ខេត្តកំពង់ឆ្នាំង ៖ ប្រជាពុទ្ធបរិស័ទចំណុះជើងវត្ត និងអាជ្ញាធរមូលដ្ឋាន បានបញ្ជាក់យ៉ាងច្បាស់ដោយគ្មានការសង្ស័យថា ព្រះអង្គធម្មវនវាសី ចន្ទ មុន្នី ចៅអធិការវត្តចន្ទប្បជោត្តនារាម ហៅវត្តតាសុត ស្ថិតនៅក្នុងភូមិប៉ាតឡាង ឃុំក្រាំងលាវ ស្រុករលាប្អៀរ ពិតជាបាននិមន្តចាកចេញពីវត្តទៅគង់នៅក្នុងព្រៃភ្នំប្រាកដមែន ហើយការនិមន្តចាកចេញនោះក៏មិនមាននរណាម្នាក់បានដឹងដែរ តែអាចសន្និដ្ឋានថានៅវេលាទៀបភ្លឺ ។
លោក ជា ប៉ី មេឃុំក្រាំងលាវ បានប្រាប់នៅរសៀលថ្ងៃទី២០ ខែឧសភា ឆ្នាំ២០២៥ថា ព្រះអង្គធម្មវនវាសី ចន្ទ មុន្នី ពិតជាបានចាកចេញពីវត្តកាលពីវេលាម៉ោង៤ទៀបភ្លឺថ្ងៃទី១៨ ខែឧសភា ឆ្នាំ២០២៥ពិតមែន ហើយបច្ចុប្បន្ននេះក្នុងវត្តមិនមានវត្តមានព្រះអង្គទេ ។
លោកមេឃុំបានបញ្ជាក់ថា នៅថ្ងៃដែលព្រះអង្គនិមន្តចាកចេញទៅ គឺដូនជីតាជីនៅវត្តពុំបាន
ដឹងទេ មានតែកូនសេក្ខលោកឈ្មោះ រ៉ាវី ម្នាក់ប៉ុណ្ណោះជាអ្នកបើករថយន្តផ្ទាល់របស់ព្រះអង្គ ជូន
ព្រះអង្គទៅកាន់ភ្នំមួយ ដែលកូនសេក្ខលោកមិនស្គាល់ ។ ពេលសួរព្រះអង្គក៏ព្រះអង្គមិនប្រាប់ថា ទៅទីណា ភ្នំណាដែរ គ្រាន់តែដឹងថាភ្នំនោះនៅលើទឹកដីខេត្តពោធិ៍សាត់ ដែលនៅតាមផ្លូវ គឺជួបការលំបាកខ្លាំងណាស់ ។
លោកមេឃុំបានបន្តដោយស្រង់សម្តីកូនសេក្ខលោកឈ្មោះ រ៉ាវី ថា នៅពេលទៅដល់ជើងភ្នំព្រះអង្គបាននិមន្តចេញពីរថយន្តផ្ទាល់ខ្លួន ហើយនិមន្តចូលព្រៃឡើងភ្នំទៅដោយប្រាប់កូនសេក្ខលោកថាដល់គោលដៅហើយ ឲ្យយករថយន្តត្រឡប់ទៅវត្តវិញចុះ ។ ការទាក់ទងទៅកាន់សេក្ខជំនិតរបស់លោកមិនបានទទួលជោគជ័យឡើយ ដើម្បីបញ្ជាក់ ។
លោក សេង វិចិត្រ អភិបាលស្រុករលាប្អៀរ បានប្រាប់ថា ព្រះអង្គ ចន្ទ មុន្នី បានចាកចេញពីវត្តនៅវេលាម៉ោងជិត៤ទៀបភ្លឺថ្ងៃទី១៨ ខែឧសភា ដោយមិនដឹងថានិមន្តទៅគង់សមាធិឬទៅធុតង្គនៅទីណាទេ ។ ប៉ុន្តែមុនពេលចាកចេញ ព្រះអង្គបានបើកអង្គប្រជុំមួយកាលពីថ្ងៃទី១៤ ខែឧសភា ឆ្នាំ២០២៥កន្លងទៅ ដោយមានវត្តមានមន្ត្រីសង្ឃ សាលាអនុគណស្រុក មន្ត្រីការិយាល័យធម្មការ រួមជាមួយមន្ត្រីអាជ្ញាធរស្រុករលាប្អៀរផងដែរ ។ ក្នុងកិច្ចប្រជុំនោះព្រះអង្គបានផ្ទេរកិច្ចការងារគ្រប់គ្រងវត្តប្រគេនទៅព្រះគ្រូសូត្រស្ដាំព្រះនាម យ៉ាង សុផុយ និងតែងតាំងជាចៅអធិការស្ដីទី និងជាអ្នកគ្រប់គ្រងជំនួស ។
គួររំឭកថា វត្តចន្ទប្បជោត្តនារាម ហៅ វត្តតាសុត ស្ថិតក្នុងភូមិប៉ាតឡាង ឃុំក្រាំងលាវស្រុករលាប្អៀរ កាលដើមឡើយជាទីអាស្រមស្ងាត់ជ្រងំ ពុំសូវមានពុទ្ធបរិស័ទចូលទេ ។ ប៉ុន្តែក្នុងអំឡុងពេលព្រះអង្គ ចន្ទ មុន្នី និមន្តមកគង់នៅ បានកសាងពង្រីកពីទីអាស្រមដែលមានទំហំដីតូចត្រឹម ៧០អា ដែលបានពីការបរិច្ចាគដីរបស់លោកតាសុត ឱ្យក្លាយជាវត្តមានដីទំហំជាច្រើនហិកតា និងរីចម្រើនយ៉ាងផុលផុស ដោយមាន ឯកឧត្តម លោកជំទាវជាច្រើនជឿជាក់លើព្រះអង្គ និងបានកសាងវត្តនេះឱ្យក្លាយជាវត្តស្អាត ជាវត្តទេសចរណ៍ ។ បើទោះបីមានមតិមួយចំនួនបានផ្ទុយនឹងជំនឿលើព្រះអង្គយ៉ាងណាក្តី ក៏វត្តនេះនៅតែរីកចម្រើនឥតឈប់ឈរ រហូតល្បីល្បាញជាវត្តស្អាត ក្រោមស្នាដៃកសាងរបស់ព្រះអង្គ ។
មិនត្រឹមតែមានភាពរីកចម្រើនរបស់វត្តប៉ុណ្ណោះទេ ពុទ្ធបរិស័ទចំណុះជើងវត្តរួមនឹងអាជីវករនៅខេត្តកំពង់ឆ្នាំងមួយចំនួន ក៏បានសេដ្ឋកិច្ចធូរធារមួយកម្រិតដែរ ដោយការចូលទៅលក់ដូររបស់របរក្នុងវត្តដែរ ។ ការនិមន្តចាកចេញរបស់ព្រះអង្គ ធ្វើឲ្យមានការសោកស្ដាយ ពីពុទ្ធបរិស័ទចំណុះជើងវត្តក៏ដូចអ្នកមានជំនឿផងដែរ ។
ការនិមន្តចាកចេញរបស់ព្រះអង្គ ចន្ទ មុនី បានក្លាយជាចំណោទចោទសួរ និងមានចម្លើយចំនួន ២ជាមន្ទិល ទី១-ព្រះអង្គចាកចេញទៅរកផ្លូវធម៌ស្ងប់ស្ងាត់ជាលោកធុតុង្គ ទី២-អាចព្រះអង្គនឿយព្រះកាយពល ដែលព្រះអង្គខិតខំកសាងនិងជួបពុទ្ធបរិស័ទស្ទើរគ្រប់កន្លែងគ្មានលស់ពេលវេលា ហើយព្រះអង្គក៏និមន្តចាកចេញរកទីស្ងប់ស្ងាត់ក៏ថាបាន ។ ទោះជាយ៉ាងនេះក្តីក៏គ្មាននរណាដឹងពិតប្រាកដថា ព្រះអង្គនិមន្តចូលព្រៃភ្នំដើម្បីអ្វីឲ្យប្រាកដនោះ ៕
ចែករំលែកព័តមាននេះ