ទីក្រុងប៉េកាំង៖ បន្ទាប់ពីរដ្ឋាភិបាលរបស់លោកត្រាំគ្រោងបង្កើតសំណាញ់មេឃាសម្រាប់ការពារការវាយប្រហារដោយគ្រាប់មីស៊ីលពីប្រទេសដទៃដែលលោកឱ្យឈ្មោះថាហ្គោលដឹនដូម (Golden Dome) ប្រទេសចិនចាប់ផ្ដើមខ្វាយខ្វល់ចំពោះបញ្ហានេះ។ នៅល្ងាចថ្ងៃពុធ អ្នកនាំពាក្យក្រសួងការបរទេសចិនបានជំរុញឱ្យទីក្រុងវ៉ាស៊ីនតោនបោះបង់ចោលផែនការនេះវិញ។
ដំណើរការសាងសង់ហ្គោលដឹនដូមត្រូវបានមើលការខុសត្រូវដោយឧត្ដមសេនីយ៍ម៉ៃឃើល ហ្គូអេតលេន (Michael Guetlein) ក្នុងនាមលោកជាអនុប្រធានផ្នែកប្រតិបត្តិការសឹកកងទ័ពអវកាស។ អ្នកនាំពាក្យក្រសួងការបរទេសចិន លោកស្រីម៉ៅនីង ថ្លែងថាការស្ថាបនាសំណាញ់មេឃាស៊េរីទំនើបនេះជាការបង្ហាញឱ្យឃើញនូវចរិតកំណាច។ លោកស្រីថានេះជាការបង្កហានិភ័យកាន់តែខ្លាំងចំពោះការធ្វើយោធូបនីយកម្មនៅក្នុងទីអវកាស និងនាំឱ្យរត់ប្រណាំងផ្នែកសព្វាវុធនាពេលអនាគត។
លោកស្រីថ្លែងថាដោយអនុវត្តតាមមាគ៌ានយោបាយតម្កល់ផលប្រយោជន៍ជាតិរបស់ខ្លួនជារឿងទី១ អាមេរិកហាក់ដូចជាផ្ដោតសំខាន់ទៅលើការការពារសន្តិសុខរបស់ខ្លួនខ្លាំងពេក។ ដូច្នេះ ជាហេតុធ្វើឱ្យប៉ះពាល់តុល្យភាព និងស្ថិរភាពជាសាកល។ លោកស្រីថ្លែងបន្តទៀតថារដ្ឋាភិបាលចិនកំពុងយកចិត្តទុកដាក់ចំពោះបញ្ហានេះ។ លោកស្រីស្នើសុំឱ្យវ៉ាស៊ីនតោនបោះបង់ចោលការសាងសង់សំណាញ់មេឃានេះ ហើយខិតខំពង្រឹងជំនឿទុកចិត្តជាមួយប្រទេសមហាអំណាចធំៗ។
លោកត្រាំថ្លែងថាសំណាញ់មេឃានេះអាចនឹងដាក់ឱ្យដំណើរការនៅចុងអាណត្តិដឹកនាំរបស់លោក។ លោកនិយាយរំលឹកឡើងវិញថាកាលពីពេលឃោសនាបោះឆ្នោត លោកធ្លាប់សន្យាថានឹងខិតខំកសាងខែលការពារមីស៊ីលដ៏ទំនើបបំផុត។ ថ្ងៃនេះ លោកមានកិត្តិយសសូមជម្រាបជូនថាលោកបានសម្រេចជ្រើសរើសជាផ្លូវការនូវគម្រោងសាងសង់ខែលនោះហើយ។
នៅពេលដាក់ឱ្យដំណើរការ សំណាញ់មេឃាហ្គោលដឹនដូមនឹងក្លាយជាអាវុធដំបូងគេដែលអាមេរិកបញ្ជូនទៅឈរជើងនៅទីអវកាសដើម្បីតាមស្ទាក់ចាប់ និងកម្ទេចគ្រាប់មីស៊ីលដែលហោះចេញពីប្រទេសដទៃសំដៅទៅវាយប្រហារប្រទេសអាមេរិក។ មានន័យថាខែលការពារមីស៊ីលដទៃទៀតដែលយើងធ្លាប់ឃើញកន្លងមកស្ថិតនៅលើដីនោះវាគ្រាន់តែជាខែលធម្មតាតែប៉ុណ្ណោះ។ ប៉ុន្តែខែលការពារមីស៊ីលហ្គោលដឹនដូមចាប់មីស៊ីលពីលើអាកាសមកវិញ។
ដូច្នេះ ទោះបីមីស៊ីលហោះលឿនកម្រិតណាក៏មិនងាយគេចផុតពីខ្សែចក្ខុរបស់ខែលការពារនេះដែរព្រោះកែវភ្នែករបស់វាអាចសម្លឹងឃើញវែងឆ្ងាយនៅលើផែនដីទាំងមូល។ លោកត្រាំអះអាងថានៅពេលសាងសង់ប្រព័ន្ធនេះបានពេញលេញ វាអាចស្ទាក់ចាប់មីស៊ីលគ្រប់ប្រភេទទោះបីហោះចេញពីជ្រុងណាមួយនៃផែនដី និងទោះបីមីស៊ីលបាញ់ចេញពីទីអវកាសក៏ដោយ។ លោកអះអាងថាទាល់តែខ្លាំងដលកម្រិតនេះទើបអាចធានាថាប្រទេសរបស់យើងមានជោគជ័យ និងរួចផុតពីការគំរាមកំហែងតាមគ្រប់រូបភាព។
លោកត្រាំអះអាងថារដ្ឋាភិបាលត្រូវការប្រើប្រាស់ថវិកាជាតិ១៧៥ពាន់លានដុល្លារដើម្បីសាងសង់ និងថែរក្សាគុណភាពរបស់សំណាញ់មេឃាហ្គោលដឹនដូម។ ប៉ុន្តែសភាអាមេរិកប៉ាន់ស្មានថាការដំឡើងប្រព័ន្ធរ៉ាដានៅក្នុងទីអវកាសសម្រាប់ស្ទាក់ចាប់គ្រាប់មីស៊ីលអន្តរទ្វីបត្រូវចំណាយថវិកាចន្លោះពី១៦១ទៅ៥៤២ពាន់លានដុល្លារសម្រាប់រយៈពេលម្ភៃឆ្នាំ៕
ចែករំលែកព័តមាននេះ